Sams 1
1
BUK WAN
(Sams 1—41)
Tufala Rod
(Toktok go long olketa pipol.)
1Olketa wea i no laek fo falom toktok blong olketa nogud pipol,
olketa ya nao i hapi.
An olketa wea i no laek fo falom wei blong sin,
olketa ya nao i hapi.
An olketa wea i no laek fo joen wetem olketa wea i gohed fo tokdaonem God,
olketa ya nao i hapi.
2Olketa pipol ya i hapi bikos olketa falom Lo blong Yawe,
an oltaem olketa gohed fo ridim an tingting long hem evri de an evri naet.
3Olketa ya i olsem olketa tri wea i grou long gudfala graon wea hemi garem wata.
Olketa tri ya i gohed fo garem frut long barava taem blong olketa, an lif blong olketa i no save dae.
An long sem wei ya tu, evrisamting wea olketa pipol ya i gohed fo duim i kamap gudfala.
4Bat olketa nogud pipol i nating olsem ya.
Olketa nogud pipol ya i olsem nomoa olketa dae lif wea win hemi bloum go.
5Bae God hemi jajem olketa, an bae hemi aotem olketa from olketa gudfala pipol blong hem.
6Olketa nogud pipol ya i go-go fo dae blong olketa nao ya,
bat God hemi gohed fo lukaftarem gogo blong olketa gudfala pipol.
Currently Selected:
Sams 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.