Joel 1
1
Fas toktok
1Hem ya nao Mesij blong Yawe wea hemi talemaot long Profet Joel, san blong Petuel.
Olketa grashopa i spoelem lan
2 (Profet) !Lisin kam gudfala long toktok blong mi, yufala olketa olo an evri pipol long lan blong Jiuda! ?Waswe, enisamting olsem ya hemi hapen yet long disfala taem blong yufala, o long taem blong olketa olo blong yufala bifoa? 3Yufala mas talem olketa pikinini blong yufala, mekem olketa tu save talem pikinini blong olketa abaotem. An olketa pikinini blong olketa bae i talem moa olketa pikinini wea bae i bon kam bihaen long olketa. 4Fofala taem nao olketa grashopa i gohed fo kam. Olketa i plande fogud an kavaremap finis evri gaden. Olketa samting wea olketa fas grashopa i no kaikaim, samfala grashopa moa i kam an kaikaim. An olketa samting wea olketa mektu grashopa ya i no kaikaim, samfala grashopa moa i kam an kaikaim. An evri narafala samting wea hemi stap yet, olketa narafala grashopa moa i kam an barava finisim nao.
5!Wekap an krae, yufala evri drang man! Olketa grep fo mekem niufala waen hemi finis nao. 6Olketa grashopa ya i olsem wanfala bikfala ami wea hemi kam fo spoelem lan blong yumi. Olketa i strong tumas, wea no eniwan save winim olketa. An olketa i plande tumas, wea no eniwan save kaontem olketa. Tit blong olketa hemi barava sap tumas olsem tit blong laeon.#Revelesin 9:8. 7Olketa grashopa ya i spoelem finis nao olketa grep tri blong yumi, an kaikaim finis tu olketa fig tri blong yumi. Olketa kaikaim finis skin blong olketa tri ya, nao olketa waet brans nomoa i stap, bikos olketa nating garem nao eni skin long olketa.
8Yufala evriwan mas sore an krae, olsem wea wanfala gele hemi krae long dae blong boe wea olketa mektambu long tufala fo marit. 9No eni kaikai o waen hemi stap nao, fo tekem go olsem ofaring long Tambuhaos blong Yawe. Hem nao olketa prist hu i waka long Tambuhaos ya i barava sore an krae. 10Hemi olsem wea graon tu hemi gohed fo sore an krae, bikos olketa gaden i barava nogud tumas nao. Olketa wit, an olketa grep tri, an olketa oliv tri, olketa evriwan i dae nao.
11Yufala olketa wakaman long gaden, yufala mas sore. Yufala wea i gohed fo lukaftarem olketa plantesin blong grep, yufala mas krae. Bikos olketa wit an olketa bali, an evri kaikai long gaden blong yufala, olketa grashopa i spoelem finis nao. 12Olketa grep tri ya an olketa fig tri i dae finis. Ya, evri narafala frut tri tu i dae evriwan nao. Olketa samting wea hemi save mekem pipol hapi, hemi barava finis nao.
Olketa mas tane kambaek long Yawe
13 (Profet) Yufala olketa prist hu i mekem olketa sakrifaes long olta, yufala mas tekemaot olketa spesol kaleko blong prist an werem olketa ravis kaleko fo somaot dat yufala sore tumas. Yufala go long Tambuhaos an krae go-go kasem delaet, bikos no eni kaikai o waen nao hemi stap fo tekem go olsem ofaring long God blong yumi. 14Kolem olketa pipol fo kam tugeta, an tokstrong long olketa fo no kaikai. Ya, kolem olketa olo wetem evri pipol blong Jiuda, fo hipap kam long Tambuhaos blong Yawe hu hemi God blong yumi, an krae go long hem.
15!Ooo! !Datfala De blong Yawe fo jaj, bae hemi barava had tumas! De ya hemi kolsap kam nao, wea Yawe hu hemi garem evri paoa, bae hemi spoelem finis plande samting long disfala wol.#Aesaea 13:6; Esikiel 30:2-3; Sefenaea 1:14—2:3.
16Yumi bin lukim dat evri kaikai blong yumi hemi finis nao. An yumi no save hapi moa taem yumi go long Tambuhaos blong God fo wosip. 17Olketa sid wea yufala plantem i dae evriwan, bikos graon hemi drae tumas. An no eni sid nao hemi stap mekem yufala save plantem moa. Olketa stoa haos fo putum olketa kaikai long hem i emti evriwan. Olketa evriwan i foldaon an kamap nogud tumas nao. 18Evri buluka i gohed fo krae bikfala an i gohed fo go olobaot, bikos olketa no garem eni moa gras fo kaikaim. Ya, olketa sipsip tu i gohed fo safa fogud.
19!O Yawe! !Mi krae go long yu! Distaem hemi barava olsem wea faea nao hemi bonem olketa gras wea olketa animol blong mifala i kaikaim, an evri tri tu. 20Olketa wael animol tu i gohed fo krae go long yu, bikos olketa springwata i barava drae, an faea ya hemi spoelem evri kaikai blong olketa.
Currently Selected:
Joel 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.