Hibrus 1
1
San Blong God talemaot toktok blong hem
1Long plande taem an long plande wei nao, God hemi toktok go long olketa olo blong yumi long bifoa. Hemi kolem olketa profet fo talemaot toktok blong hem. 2Bat long distaem wea hemi no longtaem fo wol ya bae hemi finis, God hemi sendem kam San blong hem fo talemaot toktok blong hem long yumi. Long San blong hem nao, God hemi mekem skae an wol ya, an God hemi siusim hem fo onam evrisamting ya. 3Hem nao hemi somaot saen blong bikfala paoa blong God. Hemi barava olsem God nao, an hemi holem skae an wol ya strong wetem toktok blong hem, wea hemi garem bikfala paoa. Taem hemi tekemaot sin blong olketa pipol finis, hemi go sidaon long heven long raetsaet blong God hu hemi garem evri paoa.
San Blong God hemi bikfala moa winim olketa enjel
4God hemi mekem San blong hem fo kamap bikfala tumas moa winim olketa enjel, bikos disfala nem wea God hemi givim long hem, hemi hae an bikfala tumas moa winim olketa. 5God#Sams 2:7; 2 Samuel 7:14; 1 Kronikols 17:13. hemi no talem eni enjel wanem hemi talem go long San blong hem, wea hemi sei,
“Yu nao San blong mi.
Stat long tude, mi nao Dadi blong yu.”
An God hemi sei moa,
“Bae mi nao Dadi blong hem,
an bae hem nao San blong mi.”
6An#Diutronomi 32:43. taem God hemi sendem kam fasbon San blong hem long wol ya, hemi sei olsem,
“Letem evri enjel blong mi i wosipim hem.”#1:6 Disfala ves hemi kam from olfala Grik translesin blong Oltestamen wea olketa bin raetem fastaem long Hibru langguis. Ves ya long Hibru long Diutronomi 32:43 hemi sei, “Bae hemi peimbaek olketa ravis wei blong olketa enemi blong hem.”
7Nao#Sams 104:4. God hemi tokabaotem olketa enjel olsem,
“Mi mekem olketa enjel fo waka olsem win,
an mi mekem olketa wakaman blong mi fo waka olsem faea.”
8Bat#Sams 45:6-7. taem God hemi tok long San blong hem, hemi sei olsem,
O God. Bae yu gohed fo rul evritaem an olowe.
An wei blong yu fo rul hemi barava stret.
9Yu laekem tumas wei wea hemi stret,
bat yu heitem wei wea hemi nogud.
Dastawe God hu hemi God blong yu, hemi siusim yu
an mekem yu hapi moa winim olketa fren blong yu.
10An#Sams 102:25-27. God hemi talem hem olsem moa,
“O Lod. Long stat blong evrisamting, yu nao bin mekem disfala wol,
an yu seleva nao bin mekem skae.
11Evrisamting ya bae hemi finis, bat bae yu stap olowe.
No longtaem bae olketa i yusles nomoa olsem olketa olfala kaleko.
12Bae yu rolemap olketa olsem wanfala sote,
olsem wanfala man hemi sensim kaleko blong hem.
Bat yu, bae yu stap semsem olowe nomoa,
an bae yu no save dae enitaem.”
13God#Sams 110:1. hemi no talem eni enjel wanem hemi talem go long San blong hem, wea hemi sei,
“Yu sidaon kam long raetsaet blong mi.
Bae mi putum olketa enemi blong yu andanit long paoa blong yu.”
14Bat olketa enjel ya, olketa i gudfala spirit hu i duim waka blong God. An God hemi sendem olketa kam fo helpem olketa pipol hu bae hemi sevem olketa.
Currently Selected:
Hibrus 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.