Habakuk 1
1
Fas toktok
1Hem ya profesi wea Yawe hemi talemaot long Profet Habakuk.
Profet Habakuk hemi kraeaot long Yawe
2 (Profet) !O Yawe! ?Fo hao long nao bae yu no lisin kam nomoa long mi, taem mi gohed fo kraeaot go long yu fo helpem mifala? ?Fo hao long nao bae yu no sevem mifala, taem olketa nogud pipol i gohed fo barava mekem mifala safa? 3?Waswe nao yu letem mi fo lukim olketa ravis samting ya? ?Hao nao yu save letem olketa ravis samting i gohed fo hapen olsem, bat no duim nomoa enisamting fo stopem? Evriwea raonem mi, pipol i gohed fo kilim man dae, an gohed fo spoelem evrisamting. Long evri ples, pipol i gohed fo raoa, an gohed fo faet. 4Pipol no falom olketa tising blong yu, an olketa nating falom stretfala wei blong yu fo jaj. Olketa nogud pipol i gohed fo sensim stretfala wei ya fo ravis wei. Hem nao olketa gohed fo tekova from olketa stretfala pipol.
Yawe hemi ansarem Profet Habakuk
5An Yawe hemi tok olsem, ?Olketa pipol blong mi. Yufala mas lukluk gudfala long olketa narafala kantri ya. Bae yufala seke fogud long olketa samting wea bae yufala lukim. No longtaem, bae wanfala samting hemi hapen. An taem yufala herem nius abaotem, yufala nating save bilivim nomoa.#Aposol 13:41. 6Bae mi givim paoa long olketa blong Babilonia. Wei blong olketa ya nao hemi fo mekem narafala pipol i safa tumas. Olketa go kuiktaem long evri ples fo faet an tekova long lan blong olketa narafala pipol.#2 Kings 24:2. 7Olketa tingse olketa nao garem nambawan paoa long disfala wol, an falom nomoa tingting blong olketa seleva. Olketa praod tumas, an tingse evrisamting olketa duim hemi stret. Oltaem olketa gohed fo mekem evri pipol barava fraetem olketa tumas.
8?Evri hos blong olketa save go kuiktaem tumas winim bikfala wael puskat wea olketa kolem lepad. An wei blong olketa fo faet hemi raf tumas winim olketa wael dog wea i hanggre tumas an laek fo kaikai. Olketa hos ya i gohed fo skrasim graon, bikos olketa hariap fo go. An olsem wea igol hemi flae kuiktaem kamdaon fo kasholem animol fo kaikaim, olketa soldia hu i raedem hos i kam kuiktaem from farawe ples fo spoelem enemi blong olketa.
9?Tingting blong olketa ya nao, fo barava spoelem evri enemi blong olketa. Taem ami ya hemi kam kolsap fo faet, evri pipol i fraet an seksek tumas. Oltaem, olketa soldia i kasholem staka pipol wea no eniwan nao save kaontem. 10Olketa lukdaonem olketa king blong evri narafala kantri, an gohed fo laf long evri bikman blong olketa king ya. No eni strongfala sefples hemi fitim fo stopem olketa. Olketa save hipimap nomoa ston an graon long botom blong wolston long ples ya, mekem hem isi fo klae go insaet an tekova long hem. 11Taem olketa go pas, olketa spoelem evrisamting olsem saekloun. Olketa pipol ya i nogud tumas, bikos olketa trastem nomoa paoa blong olketa seleva, olsem hem nao god blong olketa.?
Profet Habakuk hemi kraeaot moa long Yawe
12 (Profet) Lod Yawe. Longtaem bifoa evrisamting hemi stat ka-kam kasem tude, yu nao yu God. Yu nomoa yu Holi God blong mi, an bae yu stap fo evritaem olowe. Yawe God blong mi, yu nao yu olsem strongfala Rok wea hemi sefples blong mi. Yu nao yu siusim olketa blong Babilonia an givim paoa long olketa fo panisim mifala. 13Yu barava holi tumas, an yu nating laek fo luk long olketa ravis samting. ?So hao nao yu save lukim olketa ravis samting wea olketa nogud pipol blong Babilonia i gohed fo duim, bat yu nating duim nomoa enisamting fo stopem? ?Hao nao yu save stap kuaet nomoa taem olketa ravis pipol i spoelem narafala pipol hu i stret lelebet winim olketa?
14?Hao nao yu save gohed fo tritim pipol olsem fis long si o olsem olketa anis wea i no garem eni lida fo lidim olketa? 15Olketa blong Babilonia i gohed nomoa fo kasholem pipol olsem fis wea olketa kasem long huk. Olketa ya i fosim pipol fo lusim ples blong olketa, olsem fis wea olketa pulum insaet long net. An taem olketa duim olsem, olketa singaot bikfala, bikos olketa hapi tumas. 16Paoa blong olketa fo winim pipol, hemi olsem god blong olketa. Ya, hemi olsem wea olketa wosipim nomoa net fo kasem fis. An olketa mekem sakrifaes long net ya an bonem insens fo wosipim. Olketa gohed fo duim olsem, bikos net ya nao hemi helpem olketa fo garem staka gudfala samting. 17?Waswe, bae enisamting save stopem olketa nomoa fo no yusim net ya fo spoelem pipol long olketa kantri? !Olketa ya i nating sore nomoa long eniwan!
Currently Selected:
Habakuk 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.