Jon 12
12
Meri kapsaetem gudfala oel long lek blong Jisas
(Matiu 26:6-13; Mak 14:3-9)
1Taem siksfala de hemi stap yet bifoa hemi kasem Fist blong Pasova, Jisas hemi gobaek moa long vilij long Betani wea Lasaros hemi stap, disfala man hu Jisas hemi bin mekem hem fo laefbaek moa. 2Long ples ya olketa redim kaikai fo Jisas, an Mata nao hemi helpem olketa fo givimaot kaikai ya. An Lasaros tu hemi wanfala long olketa pipol hu i sidaon fo kaikai wetem Jisas. 3Nao#Luk 7:37-38. Meri hemi tekem kam wanfala botol wea hemi fulap long oel#12:3 “oel” Oel ya olketa kolem “nad” an olketa mekem long wankaen flaoa wea hemi save grou long olketa hae maonten long kantri long India. wea hemi smelgud tumas, an wea hemi dia tumas tu. An Meri hemi kapsaetem oel ya go long tufala lek blong Jisas, an hemi mekem drae moa wetem longfala hea blong hem. An haos ya hemi fulap long gudfala smel blong disfala oel ya nao. 4An Jiudas Iskariot, disfala disaepol hu bae hemi givim Jisas go long han blong olketa enemi, hemi toktok go olsem nao, 5“Disfala oel ya sapos hemi salem, bae hemi kasem 300 seleni#12:5 “300 seleni” Long langguis long Grik hemi sei,“denarion”. Diswan hemi olsem wejis blong wanfala leba wea hemi bin waka fo wanfala ful yia. Lukim “Seleni” long diksonari. nao wea hemi save givim long olketa pua pipol.” 6Bat Jiudas hemi no talem diswan bikos hemi sore long olketa pua pipol, bat bikos hemi wanfala man fo stil ya. Hem nao man fo lukaftarem seleni blong olketa disaepol, an hemi save yusim nomoa samfala seleni fo hem seleva.
7An Jisas hemi tok olsem, “!Ei, yu no stopem woman ya! Hemi kipim disfala oel ya fo yusim long bodi blong mi long taem wea bae olketa berem mi ya. 8Olketa#Diutronomi 15:11. pua pipol ya, bae olketa stap olowe wetem yufala ya, bat mi nao bae mi no stap olowe wetem yufala.”
Plan fo kilim Lasaros dae
9Plande long olketa Jiu i save dat Jisas hemi stap long vilij ya nao, so olketa kam long hem. An olketa no kam bikos olketa wande fo lukim Jisas nomoa, bat olketa kam bikos olketa wande fo lukim Lasaros tu, disfala man hu Jisas hemi bin mekem hem fo laefbaek moa. 10So olketa hedprist ya mekem plan fo kilim Lasaros dae tu. 11Bikos taem olketa Jiu olketa lukim Lasaros hemi laefbaek, plande long olketa nao olketa lusim olketa hedprist ya an olketa biliv long Jisas nomoa.
Jisas somaot dat hemi King
(Matiu 21:1-11; Mak 11:1-11; Luk 19:28-40)
12Long#Matiu 21:1-11; Mak 11:1-11; Luk 19:28-40. neks de, plande pipol hu i kam fo olketa bikde ya, olketa herem dat Jisas hemi wakabaot kam fo Jerusalem nao. 13So#Sams 118:25-26. olketa go an tekem olketa lif blong pam tri, an olketa holem go fo mitim Jisas nao. An olketa go-gohed fo singaot olsem, “!Preisim God! !God, yu blesim disfala man ya hu hemi kam long nem blong yu! !God, yu blesim disfala King blong mifala long Israel!”
14An Jisas hemi tekem wanfala dongki an hemi sidaon antap long hem. Diswan hemi falom wanem Buktambu hemi talem, wea hemi sei,
15“!Yufala#Sekaraea 9:9. olketa pipol long Saeon,#12:15 “Saeon” Hemi nara nem blong Jerusalem. yufala no fraet!
Yufala lukim, king blong yufala hemi kam nao.
Hemi raed kam antap long wanfala yang dongki ya.”
16Fastaem, olketa disaepol blong Jisas olketa no savegud yet long olketa samting ya. Bat taem Jisas hemi laefbaek moa an hemi gobaek finis long heven, olketa jes tingimbaek nao, wea wanem hemi hapen long Jisas ya hem nao wanem Buktambu hemi talem kam finis abaotem hem.
17Nao olketa pipol hu i stap wetem Jisas taem hemi singaotem Lasaros fo kamaot long kev ya an hemi mekem hem fo laefbaek moa, olketa go an talemaot diswan olobaot nao. 18So taem olketa pipol i herem dat Jisas hemi bin mekem disfala mirakol ya, olketa kam fo lukim hem nao. 19Bat olketa Farasi olketa go-gohed fo tok olsem tugeta long olketa seleva nao, “!Yufala lukim, nomata yumi tingim enikaen, yumi no save duim enisamting nao! !Lukim, evriwan i go-go falom man ya nao!”
Samfala Grik i kam lukim Jisas
20Nao samfala long olketa Grik tu olketa go long Jerusalem fo prea long taem blong olketa bikde ya. 21An olketa go lukim Filip, disfala disaepol blong Jisas hu hemi kam from Betsaeda long Galili, an olketa askem hem olsem, “Bikman, mifala wande fo lukim Jisas ya.”
22Filip hemi go an talem diswan long Andru, an tufala go moa fo talem diswan long Jisas. 23An Jisas hemi ansarem tufala an hemi tok olsem, “Hemi kasem taem fo olketa pipol luksave dat San Blong Man hemi garem saen blong bikfala paoa blong God nao. 24Mi talem yutufala tru samting nao, sapos wanfala sid blong wit hemi foldaon long graon an hemi dae, niufala wit bae hemi grouap an bae hemi garem plande frut long hem nao. Bat sapos sid ya hemi no foldaon long graon an dae, bae wanfala sid nomoa hemi stap seleva olowe. 25Man#Matiu 10:39; 16:25; Mak 8:35; Luk 9:24; 17:33. hu hemi lavem tumas laef blong hem seleva, bae hemi lusim ya. Bat man hu hemi no lavem laef blong hem long disfala wol, bae hemi holem tru laef wea hemi no save finis. 26Eniwan hu hemi waka fo mi, hemi mas falom mi nao, mekem wakaman blong mi hemi stap long ples wea mi stap long hem. An eniwan hu hemi waka fo mi bae Dadi blong mi hemi tinghae long hem ya.”
Jisas tokabaotem dae blong hem
27Nao Jisas hemi sei moa, “Long distaem, tingting blong mi hemi barava trabol tumas nao. ?An wanem nao bae mi save talem? ?Bae mi sei, ‘Oo Dadi, plis yu no letem disfala had samting fo kasem mi’? Nomoa, mi mas go insaet long disfala hadtaem nao ya. Dastawe nao mi kam long disfala wol ya. 28!Dadi, yu somaot saen blong bikfala paoa blong yu!”
Long taem ya nomoa, toktok hemi kamdaon long heven wea hemi sei, “Mi somaot finis saen blong bikfala paoa blong mi, an bae mi somaot moa.”
29Olketa evriwan hu i stap long ples ya olketa herem diswan, so samfala long olketa i sei hemi noes blong tanda ya, bat samfala sei wanfala enjel nao hemi toktok kam long hem.
30Bat Jisas hemi sei long olketa, “Disfala toktok wea yumi herem ya, hemi no fo helpem mi bat hemi fo helpem yufala nao. 31Long distaem, God bae hemi jajem evriwan long disfala wol, an bae hemi aotem Seitan hu hemi rulim disfala wol ya. 32An taem olketa tekem mi fo putum mi go antap, bae mi lidim evriwan fo kam long mi nao.” 33Jisas hemi talem diswan fo mekem klia watkaen wei nao bae hemi dae long hem.
34Olketa#Sams 89:4, 36; 110:4; Aesaea 9:7; Esikiel 37:25; Daniel 7:14. pipol ya i tok olsem long hem nao, “Buktambu hemi sei disfala Mesaea ya, bae hemi no save dae. ?So hao nao yu save talem bae olketa putum San Blong Man i go antap? ?Hu nao disfala San Blong Man?”
35Jisas hemi ansarem olketa olsem, “Fo lelebet taem nomoa, bae laet hemi stap wetem yufala. So yufala mas wakabaot nao taem laet ya hemi stap yet wetem yufala, nogud tudak hemi kam kasem yufala. Eniwan hu hemi wakabaot long tudak hemi no save long ples wea hemi go-go long hem ya. 36Yufala mas biliv long laet ya taem hemi stap yet wetem yufala, mekem yufala kamap pipol blong laet.”
Olketa Jiu gohed fo no biliv
Taem Jisas hemi talem olketa samting ya finis, hemi lusim olketa nao an hemi haedem hem seleva long olketa. 37Nomata Jisas hemi bin mekem olketa mirakol an olketa pipol lukim, olketa nating biliv long hem nomoa ya. 38Diswan#Aesaea 53:1. hemi hapen, mekem toktok blong profet Aesaea hemi kamtru nao wea hemi sei,
“?Masta, hu nao hemi bilivim nius blong mifala?
?Hu nao hemi luksave long paoa wea Masta hemi somaot long olketa?”
Olketa Jiu gohed fo no biliv
39An God hemi bin mekem Aesaea fo talemaot waswe nao olketa no biliv, wea hemi sei,
40“Mi#Aesaea 6:10. satem ae blong olketa finis nao,
an mi mekem tingting blong olketa fo sat tu.
So long distaem, ae blong olketa i no save luksave,
an tingting blong olketa i no save minim,
an olketa no save kambaek moa long mi,
mekem mi save mekem olketa gudbaek moa.”
41Aesaea hemi talem olketa samting ya bikos hemi lukim finis saen blong bikfala paoa blong Jisas nao.
42Nomata olsem, plande long olketa bikman blong olketa Jiu nao olketa biliv long hem. Bat olketa no talemaot diswan long eniwan, bikos olketa fraet, nogud olketa Farasi i finisim olketa from preahaos. 43Olketa laekem tumas fo olketa pipol nomoa tinghae long olketa. Bat olketa no wari sapos God hemi tinghae long olketa o nomoa.
Yumi mas falom toktok blong Jisas
44Nao Jisas hemi toktok bikfala olsem, “Man hu hemi biliv long mi, hemi no biliv long mi seleva nomoa, bat hemi biliv long man hu hemi sendem mi kam. 45An taem hemi lukim mi, hemi lukim man hu hemi sendem mi kam nao. 46Mi kam insaet long disfala wol olsem laet, mekem evriwan hu i biliv long mi bae hemi no stap long tudak. 47An sapos eniwan hemi herem toktok blong mi bat hemi no obeim, bae mi no jajem hem ya. Bikos mi no kam fo jajem olketa long disfala wol ya, bat mi kam fo sevem olketa. 48Man hu hemi no hapi wetem mi an olketa toktok blong mi, wanfala samting nao bae hemi jajem hem. Olketa toktok blong mi ya nao, bae i jajem hem long Lasde. 49Bikos mi no toktok falom tingting blong mi seleva ya. Dadi blong mi hu hemi sendem mi kam, hem nao hemi talem long mi barava wanem fo talem. 50An mi save, wanem hemi talem, hemi mekem pipol fo kasem tru laef wea hemi no save finis. So olketa samting wea mi talem ya, hemi samting wea Dadi blong mi hemi bin mekem mi fo talemaot nao ya.”
Currently Selected:
Jon 12: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.