Mateo 26
26
Tummagan igal-amismalad Jesús-mesgal
(Marcos 14:1-2; Lucas 22:1-2; Juan 11:45-53)
1Tegin Jesús tulemalga pél chunmasgu, aga e-chapinganga chogal:
2—Imi pemal pato wismaldo, Pab-Najad-Itoged ibboje naigunoniko. Tenal te ibegin an-Te-Tule-Chunna uklenoniko nakrusgin pioklegal.
3Tenal teun tule-irwal-Pabzhe-kolmalad-e-tummagan tegin Judio-chelegan-tummagan, tule-irwal-Pabzhe-koled-pul-tummad-Caifás-e-neg-tummadgin ormasmal. 4Tenal we Judio-tummagan igal-aminanimal otukal Jesús-kagal, tegin Jesús-mesgalbal. 5Tenal Judio-tummagan chogalmalbal:
—Tenal anmal Pab-Najad-Itoged-naidgin melle Jesús-kamalo. Tegil tulemal ulualmalal, neg-impabal aknidmalo anmalbak urwegal.
Ome Jesús-nonogin ti-wawad imajad
(Marcos 14:1-9; Juan 12:1-8)
6Imi Jesús Betania-neg-kweburgin-maidgin, teun Jesús Simón-lepra-poni-nika-nad-neggin mas kuntii. 7Tegin Jesús ampa mas kunchiidgin, ome-walgwen Jesúszhe noni. Tegin we ome alabastro-pudegin ti-wawad-peyedzhe-karked cheinoni. Tegin ome Jesús-nonogin ti-wawad imas.
8Tenal Jesús-e-chapingan ome-takchamalgu Jesúsgin-ti-wawad-imas, istar ome-takalmal. Tegin Jesús-e-chapingan chogalmal:
—¿Imi we omede, ibiga pinche ti-wawadgin mani owes-wede? 9Imi we ti-wawad yer karkegu-choggu, al mani-tummadgin ukchalen, pul nabirin, we manigin tule-wilemalad-pentagal.
10Tenal Jesús e-chapingan-chunmajad itosgu, aga e-chapinganga chogal:
—¿Ibiga pe we omegin urwenanimal-wede? We ome anka ib-nued imas. 11-12Tenal ome an-purkwed-iktual ankin ti-wawad imas tule-tigzhogalidyob. Imi tule anka immal-ukpiel, imis anka ukenab. Tenal antin pemalbak ilgwen-kwen-nadguojul, tenal tule-wilemalad kwen chulguojul-kuo, pemalbak keg-chulgu kudigumalo.
13“Tenal an chunchunnad pemalga chogdo: imi iti-napkin meke-pia an-kaka-nuegan choglegoedgin, we ome imis ankin ti-wawad-imajad ampa choglemogo, tulemal we omegin wis pinzhemalgal.”
Judas-Iscariote manibal Jesúsgin akpitchad
(Marcos 14:10-11; Lucas 22:3-6; Juan 13:21-30)
14Tegin Jesús-e-chapingan-walambe-kakabogwad-walgwen Judas-Iscariote-nugad tule-irwal-Pabzhe-kolmalad-e-tummaganzhe nad, manigin Jesús-ukegal. 15Tegin Judas Judio-tummaganga chogal:
—¿Igi-mani anka pe uko, an pega Jesús-ukegal?
Tegin Judio-tummagan ilgwen Judasga mani-chibu-tulabogiid-kwa-tulagwen-kakaambe ukchamal. 16Al Judas teun-akar igal-aminaigual Judio-tummaganga Jesús-ukegal.
Jesús aga e-chapinganbak napi mas kuchad
(Marcos 14:12-25; Lucas 22:7-23; Juan 13:21-30; 1 Corintios 11:17-34)
17Tegin Madu-Ina-Nikchulid-Kunned-Ibe kep-naigudedgin, e-chapingan Jesúszhe nonimal chogalmal:
—¿Tummad, pia pe pei, anmal pega neg nudamalgal Pab-Najad-Itogedgin mas kunmalgal?
18Tegin Jesús aga e-chapinganga chogal:
—Imi pe neg-kweburzhe nemalo, tule-an-pega-chogoedzhe. Tenal pe we tulega chogo: ‘Tule-oturdaked chog, e-wilub pato omodani-choggu, al ede aga e-chapinganbak pe-neggin Pab-Najad-Itoged-mas wis kunpimal.’
19Tegin Jesús-e-chapingan Jesús-ega-chogzhadyob pél immal imasmal. Tenal Jesús-e-chapingan Pab-Najad-Itogedgin mas imasmalzhun. Tenal Jesús kep te-cholbal nonimojun aga e-chapinganbak mes mas kunkal.
20Tegin neg-chedosgu, Jesús aga e-chapingan-walambe-kakabogwadbak mes mas kunchimo. 21Tenal Jesús mas-kunpukwadgin aga e-chapinganga chogal:
—Imi an chunchunnad pemalga chogdo: pemal-walgwen manibal ankin akpinnoniko.
22Al Jesús-e-chapingan peyedzhe pukib-itononimal. Tenal e-chapingan-ilbal Jesúsga chogalmal:
—¿Tummad, an pegin akpinnonikodé? Chulá.
23Tegin Jesús aga e-chapinganga chogalbal:
—Tenal pemal-walgwen anpak mes madu wartichajal, we tule ankin-akpinnonikoed. 24Tenal Pab-kartagin nermakal-maidyob an-Te-Tule-Chunnagin kunoniko. Tenal tule-ankin-akpinnonikoed sapejul oturdalegoedbal peyedzhe wilesma. Al we tule pul mimmileszhulilen, pul nabirin.
25Tenal Judas-Jesúsgin-akpinnonikoed Jesúszhe ekichial:
—¿Tule-oturdaked, áni?
Tegin Jesús Judasga chogal:
—Pedo.
26Tegin Jesús aga e-chapinganbak ampa mas-kunpukwadgin Jesús madu chus. Tegin Jesús tog-nuedi Pab Tummadga chogzha. Tegin Jesús purwi-purwi madu pipichisgu, aga e-chapinganga madu ukcha. Tegin Jesús aga e-chapinganga chogalbal:
—Chu. Kunmal. Wedin an-chan.
Tegin Jesús-e-chapingan we madu kuchamalzhun.
27Tegin Jesús kobed chusbalgu, tog-nuedi Pab Tummadga chogzhabal. Tegin Jesús aga e-chapinganga kobed ukchabal. Tegin Jesús aga e-chapinganga chogalbal:
—Pemal-pel-kwapa we kobed pe kobmalo. 28Imi we kobed an-abe. Tenal an-abedin oyonai, Pab-Tummad-kaka-pin-ukchad ib-chunchunnad. Al an-abe milenoniko, tulemalga-ichejul iskued eligal. 29Tenal an pega chogdo: imi antin imis-akar uva-nis pal kwen kobojul, an-Pab-neg-takmaidgin pemalbak kannan uva-nis kobbaloedzhe. Pitogua.
Tegin Jesús-e-chapingan we kobed kobzhamalzhun.
30Tegin Jesús aga e-chapinganbak namakedgin Pab-otummosmalgu, ilgwen nadmal, Olivo-yalzhe.
Jesús Pedroga chogzhagujad: “Pedin ankin chogdago: ‘An Jesús-kwen-wichul’ ”
(Marcos 14:26-31; Lucas 22:31-34; Juan 13:36-38)
31Tegin Jesús aga e-chapinganga chogal:
—Pemal imis-mutik pel-kwapa an-midmalo, Pab-kartagin chogzhadyob. Tenal Pab Tummad purpal chogzhado:
Antin oveja-taked-mejo,
tegin ovejamal akne-akne abarmadmalo.
Zac. 13:7
32Tegin Jesús chogalbal:
—Imi an purkwaled-akar an kannan tullejal, an pe-iktual Provincia-Galileaje nao.
33Tenal Pedro Jesúsga chogal:
—Imi tule-pimalad pél pe-midmalal, tenal antin meke-igi pe-kwen-metojul.
34Tegin Jesús Pedroga chogal:
—Imi an chunchunnad pega chogdo: imis-neg-kabgwen ampayo kallin-mastad namakeddu, pedin ilapá ankin chognoniko: ‘Antin Jesús-kwen-wichul.’
35Tegin Pedro Jesúsga chogalbal:
—Chulá. Imi an pebak purkwejogel, an akalzhul pebak purkwemogo. Tenal antin pegin kwen chogojul, an pe-kwen-wichul.
Tenal Jesús-e-chapingan-pimalad ampa Pedro-chogzhad-yopí chogalmalmo.
Jesús Getsemanígin Pabzhe napi kochad
(Marcos 14:32-42; Lucas 22:39-46)
36Tegin Jesús aga e-chapinganbak nadmalzhun Getsemaní-neg-nugadzhe. Tegin Jesús Getsemaní omosmalgu, aga e-chapinganga chogal:
—Imi pemal wegin peimalgwelo. Tenal antin webal Pab Tummadzhe wis kolnegwelo.
37Tegin Jesús walapá aga e-chapingan-ches, Pedro tegin Zebedeo-machimal-walbo. Tenal Jesús ega ib-kuoedgin peyedzhe-pukib-itononikidbal chuli-pinzhe-kual. 38Tegin Jesús aga e-chapingan-walapágwadga chogal:
—Imi an ulubgin peyedzhe-pukib-itogedbal ankin purkwed ode. Imi pemal wegin an-abintagwelo. Tenal pemal anpak mes alamakenabmalmo Pabzhe kolgal, tenal pe melle kabmalo.
39Tegin Jesús iche-ukin wis nadgu, ilgwen tullu-chigwis nono-napche. Tegin Jesús Pabzhe kolal chogal: “An-Pabye, imi an ina-kakpid-kobneedyob wilegoedgin nabir noo pe an-takel, pe an-onogoye. Tenal an-itolegedbal-chul, tenal pe-itolegedbalye.”
40Tegin Jesús Pabzhe kochagu, kannan e-chapingan-pukwadzhe nonibal. Tegin Jesús e-chapingan-taknoni pato kabmamimal. Tegin Jesús aga e-chapingan-otasgu, Pedroga chogal:
—¿Imi pemal anpak mes wachilgwen pel atabijulmaldé Pabzhe kolgal? 41Tenal pemal atagenabmal. Tegin pe Pabzhe kolenabmalbal imis-immal-kuoedgin pe melle wilub-taklegal, tegin pe melle an-midmalgal. Tenal pe-purpadin peien Pabzhe kolgal, tenal pe-chandin lolló.
42Tegin Jesús kannan nadbal Pabzhe kolgal. Wegin Jesús ilabogus Pabzhe-kolgus. Tenal Jesús Pabzhe kolalbalgu, chogalbal: “An-Pabye, imi an inna-kakpid-kobneedyob an peyedzhe wilegoed-akar keg noo pe an-takel, pe akalzhul pe-itolegedbal an-imajunnoye.”
43Tegin Jesús kannan e-chapinganzhe nonibalgu, e-chapingan-taknoni pato kabmamimalbal. Tenal Jesús-e-chapingan-e-imiadin pela-pela kabbiedbal a-ito chaktilebimal. 44Tenal Jesús aka-pukwa e-chapingan-ebesgu, kannan nadbal Pabzhe kolgal. Wegin Jesús ilapá-kuo Pabzhe-kolgus. Tenal Jesús ampa akpenegwadyob kannan Pabzhe kolalbal.
45Tegin Jesús kannan e-chapinganzhe nonibalgu, aga e-chapinganga chogal:
—¿Imi pemal ampa kabmamimal ulukumamimalyé? Imi an-wilub pato noni. Al an-Te-Tule-Chunna tule-iskanaje uklenoniko. 46Imisgin pe kwisgumaldo. Nemal. Imi tule-manigin-ankin-akpitchad pato wegin tani.
Judio-tummagan Jesús-kasmalad
(Marcos 14:43-52; Lucas 22:47-53; Juan 18:1-11)
47Tegin Jesús ampa aga e-chapinganga chunma-kwichidgin Judas-Jesús-e-chapingan-walambe-kakabogwad-walgwen noni. Tenal tulemal-ichejul Judasbak irmanonimalmo. Tenal tule-nonimalad es-pilacheed-annik nonimal. Tegin we tulemal chowal-oro-annik nonimalbal. Tenal tule-nonimalad, tule-irwal-Pabzhe-kolmalad-e-tummagan tegin Judio-chelegan-tummagan-tar-palmialmalad Jesús-kagal.
48Imi teun takalgu, Judas-Jesúsgin-akpitchad iktual tule-nonimaladbak igal-mezhis ka chogzhado: “Imi anmal we tule-abingujal, an we tule-wagal us pe an-takel, pe we tule-kao.” 49Al Judas ilgwen Jesús-abir kwisgunonigu, chogal:
—Anná. ¿Tule-oturdaked, pede?
Tegidgin Judas Jesús-wagal us.
50Tegin Jesús Judasga chogal:
—An-ai, imi pe aga noni-choggu, imisgin pe imado.
Tegin tulemal-Judasbak-nonimalad Jesús-abir kwisgunonimalgu, ilgwen Jesús-kasmalzhun. 51Tegin tulemal Jesús-kadmalgu, Jesús-e-pakad-walgwen es-pilacheed unnus. Tegin Jesús-pakad tule-irwal-Pabzhe-koled-pul-tummad-e-mos-chiktegu, chuchubi kaledap-idirrí.
52Tenal Jesús e-pakadga chogal:
—Wejego. Es pe kannan uka-yabal yoo. Imi tule-pel-kwapa esgin urwemalal, esgin etimial purkwemogo. 53¿Imi an Pabzhe kolelen, pemal ebinzhe Pabde imis-imis anka mili-tulapá-kakaambe-angelmal-palmidagojul an-pentagal? Pab anka palmidagodo. 54Tenal an-chogzhadyob kuelen, ¿tede igi kuo Pab-kartagin-nermakal-maidyob kunonigal? Keg kue. Tenal antin yabli kaleged-wilub.
55Tegin Jesús apka-tégin tulemal-e-kanonimaladzhe ekichial chogal:
—¿Ibiga pemal es-pilacheed-annik tegin chowal-oro-annik an-kadanimal-wede, an-kantikidgin-immal-aturzheed-tuleyob? Imi antin pane-pane Pabzhe-koled-neggin tulemal-oturdadi-kus. Tenal pemal an-kwen-kabijulmal. 56Tenal pél weob immal kunaid, Pab-kaka-palchogmalad akpene Pab-kartagin-nermajad-yopí kunonigal.
Tegidgin Jesús-e-chapingan pél Jesús-midmal, walagwen Jesús-ebesmal.
Judio-tummagan Jesúsga igal-itosmalad
(Marcos 14:53-65; Lucas 22:66-71; Juan 18:19-24)
57Tegin tule-Jesús-kasmalad tule-irwal-Pabzhe-koled-pul-tummad-Caifászhe Jesús-chesmal. Tenal teun takalgu, Caifás-neggin Moisés-igalgin-tulemal-oturdamalad tegin Judio-chelegan-tummagan ormanonimal. 58Tenal Pedrodin Jesús-cholbal untar-panku pinna-pinna nad, Caifás-negzhe. Tegin Pedro neg-impaje togzhagu, Pabzhe-koled-neg-takmaladbak mes chigwismo takegal, Judio-tummagan igi Jesús-imamalo-dewa.
59Tegin tule-irwal-Pabzhe-kolmalad-e-tummagan tegin Judio-tummagan-wala-tulapá-kakaambegwad walbo tule-aminaigualmal kakanzheedgin yopí chogmalgal Jesús Pab-Tummadgin-ataszhulidbal purkweenab. Tenal Judio-tummagan tule-kwen-onoszhulmal Jesúsgin yopí choggal. 60Tenal tulemal-íchejul Jesúsgin pinche kakanzhasmalan, tenal we tulemal yopí kwen chogzhajulmal. Al Judio-tummagan kwen unnijul-kusmal Jesúsgin choggal, Jesúsde purkweenab. 61Tenal napigin tule-walbo chognonimal:
—Imi we tule chogzhado ede nabir we Pabzhe-koled-neg eyaro. Tegin ede ibapágin kannan pel-kwapa Pabzhe-koled-neg chobbalo.
62Tegin tule-irwal-Pabzhe-koled-pul-tummad okwichial, Jesúsga chogal:
—¿Imi we tule pegin chogzhadgin pe chogojulmoyé?
63Tenal Jesús ilgwen yakír pes.
Tegin tule-irwal-Pabzhe-koled-pul-tummad Jesúsga chogalbal:
—Imi Pab-Tummad-Tulad-nuggin an pega chog: pedin keg-chulgu anka chogenab, pedin Cristo, Pab-Machi-chunchunnad o chul.
64Tegin Jesús Judio-tummadga chogal:
—Antin, Pab-Machido. Tenal an pemalga chogmodo: pemal imis-akar pe an-takmalo, an-Te-Tule-Chunna Pab-pela-pela-kannaleged-nikad-nuedzhik tule-tummadga chii. Tegin pemal an-takmalbalo nikpa mogil-impabal aktedani.
65Tegidgin tule-irwal-Pabzhe-koled-pul-tummad istar-Jesús-chunmajad-itojadbal aga chiir mol imas. Tenal tule-irwal-Pabzhe-koled-pul-tummad Judio-tummagan-pimaladga chogal:
—Imi we tule-chunmajad istar Pab Tummadgin chunmas. ¿Ibiga anmal tule-pid-pal-amio, we tulegin choggal wedin tule-iskana? Imi pemal-pel-kwapa-pukwad ual itosmal, ede istar Pab Tummadgin chunmas. 66¿Tenal igi pe chogmalmódin?
Tegin Judio-tummagan chogalmal:
—Imi we Jesúsdin keg-chulgu purkweenab.
67Tegin Judio-tummagan kep Jesús-wagalgin kwi-mialmal, tegin chunkalgin Jesús-sakismalbal. Tenal tule-wal-walgwen Jesús-e-takchulidgin twas Jesús-imasmalbal. 68Tenal tule-Jesús-sakijad Jesúsga chogalmal:
—Imi pe Cristo-Pab-akpene-chogzhad-palmidagoed-tule-choggu, imisgin pe chogdo, toa pe-ebios.
Tenal Jesús we tulemalga immal kwen chogzhajul-kus, ilgwen yakir pes.
Pedro ilapá Jesúsgin chogzhagujad ede Jesús-kwen-wichul
(Marcos 14:66-72; Lucas 22:54-62; Juan 18:15-18, 25-27)
69Tegin Pedro neg-impabal ampa chiidgin, puna-mos-walgwen Pedroga chognoni:
—¿Imi pe we Jesús-Galileaginedbak pe kudimoganzhulzhí?
70Tegin Pedro pel-kwapa-tulemal-wagin chogal:
—Chulá. An wichí toagin pe chunmanai.
71Tegin Pedro kwisgudgu, nad. Tegin Pedro wanagak omosgu, puna-pid tar-takalbal. Tenal puna tule-aka-pukmaladga chogal:
—We tule, Jesús-Nazaretkinedbak kudimogan.
72Tegin Pedro chogalbal:
—Chulá. Imi an napírra chunchunnad an pega chogdo: antin we tule-kwen-wichul.
73Tegin apka te-cholbal, tule-aka-pukmalad Pedroje nonimal chogalmal:
—Tenal an penzhul pedin we tule-e-pakadmo. Imi pe-chunmaked ampa tule-kalejad-yopí chunmamo.
74Tegin Pedro chogalbal:
—Imi an kakanzheelen, Pab akalzhul sapejul an-oturdakoen. Tenal antin we tule-kwen-wichul.
Tegidgin kallin-mastad apka-pakal namakal. 75Tegin Pedro kep wisgud-nad, akpene igi Jesús ega chogzhagujad. Tenal Jesús akpene Pedroga chogzhado: “Yo kallin-mastad namakeddu, pe ilapá ankin chogo: ‘An Jesús-kwen-wichul.’ ” Tegin Pedro ilgwen magadbal nodgu, pela-pela-pukib-itogedbal pononijun.
Currently Selected:
Mateo 26: kvn
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.