Juan 9
9
Jesús tule-kusgu-aku-ataged-nudajad
1Tegin Jesús natapidgin tule-walgwen-takcha, kusgu mimmilejad-akar aku-ata. 2Tegidgin e-chapingan Jesúszhe ekichialmal:
—Tule-oturdaked, ¿we tulede, toa-iskuedbal mimmilejad-akar aku-ata-wede? ¿E-pabganbal o aga tukin?
3Tegin Jesús aga e-chapinganga chogal:
“Chulá. We tule e-iskuedgin aku-kwen-atajul, tegin e-pabgan-iskuedgin pel chulbal. ¿Ibiga we tulega weob kus? Nabir. Imi Pab-Tummad-immal-taktijulid-imaked, we tulebal mag taklenonigal.
4“¿Ibiga pe wisgubimal-ade, we tule igi kus? Imi tule ampa neg-taledgin e-tummadga arpagenab. Tenal neg-mutikid tanikil, tule mag pal kwen takojul-kuo e-tummadga arpagal. Al an ampayo purkweddu, tegin ampa an igal-nikadgin, anmal Pab-Tummad-an-palmialidga arpagenabmal. 5Tenal an iti-napkin ampa kudiidgin, an tule-iti-napkin-pukmaladga igal-chunchunnad oyonai, tadgwa neg-otalonaidyob.”
6Tegin Jesús e-chogzhad-cholbal napkin kwi-akcha, tegin nap-kwibied wes. Tegin Jesús olma-olma nap imas. Tegin Jesús kep tule-aku-ataged-imiagin yan-yan-yan olli imas. 7Tegin Jesús tule-aku-atagedga chogal:
—Imisgin pe naddo, Siloé-ti-tummad-wilagwal-chiidzhe, imia enukkal.
(Imi Siloé choglege: Palmilegalid.)
Tegin tule-aku-ataged nadzhun Siloé-ti-chiidzhe imia enukkal. Tegin tule aga imia enusgu, kannan akpirisgu, imia mag atanonijun.
8Tegin tule-e-neg-tikalbal-mamimalad tegin tule-mani-ekichi-tar-taktimalad aga emal-emal ekichialmal:
—¿We tulede anmal taktijulzhí, mani ekichii?
9Tegin tule-wal-walgwen chogalmal:
—A-tuledo.
Tegin tule-pimalad chogmalmo:
—Chulá. We-tule ajuli, pinche ayob-taklege.
Tegin tule-nabir-atanonikid aga tukin chogal:
—Antin, an mani-ekichii-taed-tuledo.
10Tegin tulemal, tule-nabir-atanonikidga chogalmalzhun:
—¿Pe igi nabir atanoni-adé?
11Tegin tule-nabir-atanonikid tulemalga chogal:
—Imi tule-Jesús-nugad napkin kwi-akchagu, olma-olma nap-imas, tegin an-imiagin yan-yan-yan olli-imas. Tegin Jesús anka chogzhado: ‘Pe nad, Siloé-ti-chiidzhe imia enukne.’ Tegin an nadzhun imia enukkal. Tegin an imia enusgu, an nabir atanonijun.
12Tegin tulemal, tule-nabir-atanonikidzhe ekichialmal:
—¿Imide tule-pe-nudajadde pia naddé?
Tegin tule-nabir-atanonikid tulemalga chogal:
—An wichí pia nad.
Pariseomal tule-nabir-atanonikidzhe ekichismalad: “¿Pe igi nugus?”
13Tegin tulemal Pariseomalzhe tule-nabir-atanonikid-chesmal oyogal. 14Imi teun takalgu, Jesús ulukued-ibegin tule-aku-atagedga imiagin yan-yan-yan olli imas, tegin we tulega nabir imia atanonijun. 15Tegin Pariseomal tule-nabir-atanonikidzhe ekichialmalzhun:
—¿Pe igi nabir atanoni-adé?
Tegin tule-nabir-atanonikid Pariseomalga palchogalzhun:
—Imi tule an-imiagin yan-yan-yan olli imasgu, an tigin imia enus. Tegin an-imia nabir atanonijun.
16Tegin Pariseomal-wal-walgwen chogalmal:
—Imi tule-pe-nudajad, Pab-Tummad-akar kwen tanijul. ¿Ibiga an teob chog? Imi we tule ulukued-ibe-igalgin kwen ataszhul.
Tenal Pariseomal-pimalad chogalmal:
—Chulá. ¿Imi tule-iskued-nikad igi kuneé, weob immal-taktijulid imagal? Keg kue.
Imi teun Pariseomal aga yopí kwen chogzhajulmal.
17Tegin Pariseomal kannan tule-nabir-atanonikidzhe ekichialmalbal:
—¿Imi tule-pe-imia-nudajadgin, pe igi chogmójun?
Tegin tule-imia-nugujad Pariseomalga chogal:
—Imi tule-an-imia-nudajad, Pab-kaka-palchoged.
18Tenal Pariseomal we tulegin kwen ibzhaszhulmal, we tule akpene aku-atage-nad, tenal imisdin mag atanoni. Al Pariseomal tule-nabir-atanonikid-e-pabganzhe kochamal. Tegin e-pabgan nonimalgu, Pariseomal e-pabganzhe ekichialmal chogalmal:
19—¿Imi we, pe-machiyé?
Tegin machi-e-pab tule-tummaganga chogal:
Eye, an-machido.
Tegin Pariseomal ekichialmalbal:
—Imi tulemal chogmal, pe-machide kusgu aku-ata mimmiles. ¿Nabir chogmal o chul? ¿Tede ibiga pe-machide nabir imia atanonijun?
20Tegin machi-e-pabgan Pariseomalga chogalmalzhun:
—Imi anmal wismaldo, wedin an-machi, tenal an-machi kusgu aku-ata mimmiles. 21Tenal anmal wichul, igi nabir imia-atanoni. Tenal an wichulbal, toa-tule an-machiga imia nudas. Tenal an-machi pato chered-choggu, al pe machije ekisdo. Tenal an-machi aga tukin pega chogo, toa e-nudas.
22Imi teun Judio-tummagan pato igal-mezhismal, meke-ibi-tule Jesúsgin chogzhal, Jesús, Cristo-Pab-akpene-chogzhad-palmidagoed-tule, we tuledin Judio-ormaked-negzhe-naneed-akar kantikidgin tar-onomalo. 23Al tule-nabir-atanonikid-e-pabgan Judio-tummagan-tobgualmal. Al machi-e-pabgan chogzhamaldo: “An-machi chered-choggu, al an-machije pe immal ekismaldo.”
24Tegin Pariseomal kannan tule-nabir-atanonikidzhe kochamalbal. Tegin Pariseomal tule-imia-atanonikidga chogalmal:
—Imi pe Pab-wagin chunchunnad anmalga nuekwá chogenab, pe igi nugus. Tenal anmal nued wismaldo, we tule-pe-nudajad, tule-iskana. ¿Tenal pedin, pe igi chogmojun, we tule, tule-nued o tule-iskana?
25Tegin tule-nabir-atanonikid Pariseomalga chogalzhun:
—An wichí ibi-tule, tule-nued o tule-iskana. Tenal an wisdo, an aku atagen, tenal imidin an nabir atanoni.
26Tegin Pariseomal tule-nabir-atanonikidzhe ekichialmalbal:
—¿Imi tule-pe-nudajad, igi pe-imas? ¿Tegin we tule igi nabir atagal pe-imasbal?
27Tegin tule-nabir-atanonikid Pariseomalga chogal:
—Imi an pemalga pato pellallé chogzha. ¿Pe an-itoszhulzhí, an chunmajaddé? ¿Tede ibiga pe kannan anche ekisdanibal-adé? ¿Tegil pemal e-chapinganga togbimalmodé? ¿Al pe weob chogmoyé?
28Tegin Pariseomal tule-nabir-atanonikidzhe ulualmal. Tegin Pariseomal tule-imia-atanonikidgin istar todoalmal chogalmal:
—Imi pedin we tulebak naigus. Tenal anmaldin, anmal Moisés-igalbal-turdamalad. 29Tenal anmal wismaldo, Pab Tummad Moisésga chunmas. Tenal anmal we tule-kwen-wichulmal pia-akar tani.
30Tegin tule-nabir-atanonikid Pariseomalga chogal:
“¿Teobí? ¿Igi taklebalzhun? Pemal wichulmalde, we tulede pia-akar tani. Tenal we tule yabli an-imia nudas. 31Tenal anmal nued wismaldo, Pab Tummad tule-iskana-kwen-itojul, eje koled. Tenal Pab tule-egin-atamalad tegin tule-e-chogzhad-pallí-tamalad ito, eje koled.
32“Tenal anmal kwen itodijulmal, tule-mimmilejad-akar-imia-aku-ataged nugus. 33¿Imi we tule Pab-Tummad-akar tanijulilen, chun weob immal imakoen? Keg kue.”
34Tegin Pariseomal tule-nabir-atanonikidga chogal:
—Tenal pedin iskuedgin mimmiles. ¿Tede pede igi Pab-igalgin anmal-oturdaneé? Keg kue.
Tegin Pariseomal Judio-ormaked-negzhe-naneed-akar kantikidgin tule-nabir-atanonikid-onodmalzhun.
Jesús tule-purpal-aku-immal-takmaladgin chunmajad
35Tegin Jesús wisgus Pariseomal kantikidgin Judio-ormaked-negzhe-naneed-akar tule-nabir-atanonikid-onodmal. Tegin Jesús te-cholbal tule-nabir-atanonikid-abingusgu, tule-imia-atanonikidga chogal:
—¿Imi pe Te-Tule-Chunnagin ibzhe o chul?
36Tegin tule-nabir-atanonikid Jesúsga chogal:
—¿Imi Te-Tule-Chunnade toajun? Tummad, imi an pei, pe anka chog, an we tulegin ibzhegal.
37Tegin Jesús tule-nabir-atanonikidga chogal:
—Imi pedin akpene we tule-takcha, tegin pe imis we tulebak chunmajibal.
38Tegin tule-nabir-atanonikid Jesúsga chogal:
—Tummad, an pegin ibzhedo.
Tegin tule Jesús-abir chimtisgu, Pab Tummadyob Jesús-otummoal.
39Tegin Jesús tule-nabir-atanonikidga chogalbal:
—Imi antin iti-napche noni, pidzhi-pidzhi tulemal-urpegal, tulemal-purpal-aku-immal-takmalad, mag purpal immal taknonigal. Tegin tulemal-purpal-mag-immal-takmalad, purpal aku immal taknonigalbal.
40Tegin Pariseomal-Jesúsbak-pukmalad Jesús-chogzhad itosgu, Jesúsga chogalmal:
—¿Imi pede ebinzhe anmalde purpal aku immal takmalmo? Pe immal-kwen-wichulidyob anmal-takmalma.
41Tegin Jesús Pariseomalga chogal:
—Imi pemal chogmalalen: ‘An purpal aku immal tak,’ pemal iskued kwen nikchulmalan. Tenal pemal aga tukin chogmal: ‘Anmal purpal mag immal takmal,’ al pemal ampa iskued nika-nemal.
Currently Selected:
Juan 9: kvn
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.