YOHANE 8
8
Ta wansati wa vuoswi.
1Kutani Yesu a ya eNtshaveni ya Mitlhwari.
2Ni mixo, a tlhela a ya etempeleni, kutani vanhu lavo tala va ta eka yena; a tshamisa a va dyondzisa. 3Kavaloko vatsari ni Vafarisi va n'wi tisela wansati la khomiweke a endla vuoswi; kuteloko va n'wi vekile exikarhi, 4va ku eka yena: “Mufundhisi, nsati loyi, u khomiwile evuoswini. 5Kutani Muxe u hi lerisile enawini ku khandla lavo tano hi maribye; wena-ke, u ri yini?” 6Va vurisa sweswo ku n'wi ringa, ni ku kuma leswi va nga ta n'wi hehla ha swona. Kambe Yesu a korhama a tsala ehansi hi ritiho. 7Kutani, hikuva va n'wi sindzisa hi ku n'wi vutisa, a ololoka, a ku eka vona: “La nga riki na xidyoho eka n'wina, a a ve yena la sungulaka ku n'wi khandla hi ribye.” 8A tlhela a korhama, a tsala ehansi. 9Kuteloko va twile ku hlamula ka yena, va tshinyiwa hi mapfalo, kutani va tisukela va longolokile, ku sungula hi lavakulu, ku hetelela hi lave ndzhaku; Yesu a sala a ri swakwe; wansati yena a yime xikarhi. 10Kutani Yesu a ololoka; kakuloko a nga ha voni munhu, loko a nga ri wansati ntsena, a ku eka yena: “Wansati, vahehli va wena va kwihi-ke? Xana a ku na munhu la ku avanyiseke?” 11A ku: “A nga kona, Hosi.” Kutani Yesu a ku eka yena: “Na mina, a ndzi ku avanyisi; famba, u nga ha tlheli u dyoha.”
Yesu i ku vonakala ka misava.
12Kutani Yesu a tlhela a vulavula na vona, a ku: “Hi mina ku vonakala ka misava; la ndzi landzelaka, a nga ka a nga fambi emunyameni, kambe u ta va ni ku vonakala ka vutomi.” 13Hikwalaho Vafarisi va ku eka yena: “U tivulela vumbhoni, kambe vumbhoni bya wena a byi tiyanga.” 14Yesu a hlamula a ku eka vona: “Hambi ndzi tivulela vumbhoni, vumbhoni bya mina byi tiyile, hikuva ndzi tiva laha ndzi humaka kona, ni laha ndzi yaka kona; kambe n'wina a mi tivi laha ndzi humaka kona, ni laha ndzi yaka kona. 15N'wina, mi avanyisa hi mukhuva wa nyama; mina, a ndzi avanyisi munhu. 16Loko ndzi avanyisa, ku avanyisa ka mina hi lokunene; hikuva a ndzi tshami ndzi ri swanga, kambe ndzi na Tatana la ndzi rhumeke. 17 Swi tsandza ni le nawini wa n'wina, ku tsariwile leswaku vumbhoni bya vanhu vambirhi byi tiyile. 18Ndzi tivulela vumbhoni, kutani Tatana la ndzi rhumeke u ndzi vulela vumbhoni, na yena.” 19Kwalaho va ku eka yena: “Tata wa wena u kwihi?” Yesu a hlamula, a ku: “A mi ndzi tivi, a mi tivi na Tatana, loko ngi ma ndzi tiva, a mi ta tiva na Tatana.”
20Yesu a vula marito lawa, evuhlayiselweni bya mali, a ri karhi a dyondzisa etempeleni; kambe a ku vanga na munhu la n'wi khomaka, hikuva nkarhi wa yena a wu nga si fika.
21A tlhela a ku eka vona: “Ndza famba, kutani mi ta ndzi lava, kambe mi ta fela eku dyoheni ka n'wina; laha ndzi yaka kona, mi nga ka mi nga ti.” 22Kutani Vayuda va ku: “Xana u ta tidlaya, leswi a nge: ‘Laha ndzi yaka kona, mi nga ka mi nga ti’?” 23A ku eka vona: “N'wina, mi va la hansi; mina, ndzi wa le henhla; n'wina, mi va misava leyi; mina, a ndzi wa misava leyi. 24Hikwalaho ndzi mi byerile, ndzi ku: Mi ta fela eku dyoheni ka n'wina. Kungakuloko mi nga pfumeri leswaku hi mina loyi, mi ta fela eswidyohweni swa n'wina.” 25Kavaloko va ku eka yena: “Hi wena mani xana?” Yesu a ku eka vona: “Ndzi ni mhaka yihi ni ku vulavula na n'wina xana? 26Ndzi ni timhaka leto tala ku ti vula hi n'wina ni ku avanyisa; kambe la ndzi rhumeke wa tshembeka; kutani timhaka leti ndzi ti tweke eka yena, ndzi ti byela vanhu.”
27A va swi twanga leswaku a a va byela swa Tata wa yena.
28Yesu a ku eka vona: “Kutakuloko mi tlakusile N'wana wa Munhu, hi kona mi nga ta tiva leswaku ndzi mani, ni leswaku a ndzi endli nchumu ndzi ri swanga, kambe ndzi vulavula timhaka teto hilaha Tatana a ndzi dyondziseke hakona. 29La ndzi rhumeke u na mina. Tatana a nga ndzi tshikanga ndzi ri swanga, hikuva ndzi endla hi masiku leswi n'wi tsakisaka.” 30Kakuloko a vula timhaka teto, lavo tala va pfumela eka yena.
Ta ku tshunxiwa hi Yesu Kriste.
31Kutani Yesu a ku eka Vayuda lava pfumeleke eka yena: “Kungakuloko mi tiyisela eritweni ra mina, mi ta va vadyondzisiwa va mina kunene; 32kutani mi ta tiva ntiyiso, kutani ntiyiso wu ta mi tshunxa.” 33Va n'wi hlamula, va ku: “Hi rixaka ra Abrahama, a hi si fuyiwa hi munhu ni siku ni rin'we; u vurisa ku yini, loko u ku: ‘Mi ta tshunxiwa’?” 34Yesu a va hlamula, a ku: “Ndzi vurisile ndzi ri eka n'wina: Un'wana ni un'wana la dyohaka hi xidyoho, i khumbi ra xidyoho. 35Kutani khumbi ri nga ka ri nga tshami ekaya hi masiku; kambe n'wana u tshama kona hi masiku. 36Hikwalaho loko N'wana a mi kutsula, mi ta va mi kutsuriwile hakunene. 37Ndza swi tiva leswaku mi rixaka ra Abrahama, kambe mi rhandza ku ndzi dlaya, hikuva rito ra mina a ri nghenisisi eka n'wina. 38Loko ndzi ri mina, ndzi mi byela lexi ndzi xi voneke eka Tatana, na n'wina mi endla lexi mi xi voneke eka tata wa n'wina.” 39Va hlamula, va ku eka yena: “Tata wa hina i Abrahama.” Yesu a ku eka vona: “Loko ngi mi ri vana va Abrahama, a mi ta endla mitirho ya Abrahama. 40Kasi sweswi, mi rhandza ku ndzi dlaya, mina ndzi nga munhu la mi byeleke leswi tiyeke, leswi ndzi swi tweke eka Xikwembu; Abrahama a nga endlanga sweswo. 41N'wina, mi endla mitirho ya tata wa n'wina.” Kutani va ku eka yena: “Hina a hi velekiwanga vuoswini, hi na tatana a ri un'we, xi nga Xikwembu.” 42Yesu a ku eka vona: “Loko ngi Xikwembu a ri tata wa n'wina, a mi ta ndzi rhandza, hikuva ndzi huma eka Xikwembu, ndzi pfa ka xona; hikuva a ndzi tanga ha mina, kambe hi xona lexi ndzi rhumeke. 43A mi twi ha yini-ke, ku vulavula ka mina? Hikuva ma tsandzeka ku yingisa rito ra mina. 44N'wina mi huma eka tata wa n'wina a nga Diyavulosi, kutani mi rhandza ku endla ku navela ka tata wa n'wina. A a ri mudlayi ni le ku sunguleni, a nga tshamanga entiyisweni, hikuva a ku na ku tshembeka eka yena. Loko a vulavula mavunwa, a tisungulela swa yena, hikuva i muhembi ni tata wa mavunwa. 45Kambe mina, hi leswi ndzi vulaka leswi tiyeke, a mi ndzi pfumeri. 46I mani eka n'wina la nga ta ndzi khorwisa leswaku ndzi ni xidyoho? Kutani loko ndzi vula leswi tiyeke, a mi ndzi pfumeri ha yini-ke? 47Loyi a nga wa Xikwembu u yingisa marito ya Xikwembu; n'wina, a mi yingisi, hikuva a mi va Xikwembu.”
Abrahama, loko a nga si va kona, Yesu a a ri kona.
48Kutani Vayuda va hlamula va ku eka yena: “Xana a hi vuri swona loko hi ku: U Musamariya, ni leswaku u ni rihuhu xana?” 49Yesu a hlamula, a ku: “Mina, a ndzi na rihuhu, kambe ndzi chava Tatana, kutani n'wina ma ndzi sandza. 50A ndzi lavi ku dzunisiwa; u kona la ku lavaka ni la avanyisaka. 51Ndzi vurisile ndzi ri eka n'wina: Kungakuloko munhu a hlayisa rito ra mina, a nga ka a nga voni rifu, ni siku ni rin'we.” 52Kutani Vayuda va ku eka yena: “Sweswi, ha swi tiva leswaku u ni rihuhu; Abrahama u file, na vona vaprofeta; kutani wena u ri: ‘Loko munhu a hlayisa rito ra mina, a nga ka a nga twi rifu ni siku ni rin'we.’ 53Xana u nkulukumba eka Abrahama, tata wa hina xana? Yena u file ni vaprofeta va file; wena u tiendla mani xana?” 54Yesu a hlamula, a ku: “Loko ndzi tidzunisa, ku tidzunisa ka mina a hi ka nchumu; la ndzi dzunisaka hi Tatana, loyi mi nge i Xikwembu xa n'wina, 55kasi a mi n'wi tivanga, kambe mina, ndza n'wi tiva; loko ndzi nga vula ndzi ku: A ndzi n'wi tivi, ndzi nga kotisa n'wina, ndzi va ni vunwa; kambe ndza n'wi tiva, kutani ndzi hlayisa rito ra yena. 56Abrahama, tata wa n'wina, u tsakele ku vona siku ra mina, kambe u ri vonile, a vuya a tsaka.” 57Kutani Vayuda va ku eka yena: “Malembe ya wena a ma si va ntlhanu wa makume, kutani u ri u vonile Abrahama xana?” 58Yesu a ku eka vona: “Ndzi vurisile ndzi ri eka n'wina: Loko Abrahama a nga si va kona, mina a ndzi ri kona.” 59Kutani va rhola maribye ku n'wi hoxetela, kambe Yesu a tumbela, kutani a huma etempeleni.
Currently Selected:
YOHANE 8: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.