HOSIYA 1
1
Ta vuoswi bya Israele.
1Hi rona rito ra Yehovha leri teleke Hosiya, n'wana Beri, emikarhini ya Uziya, na Yotamu, na Akazi, na Hezekiya, tihosi ta Yuda, ni le mikarhini ya Yerobuwamu, n'wana Yowasi, hosi ya Israele.
2Siku Yehovha a sungulaka ku vulavula na Hosiya, a ku eka yena: “Famba, u ya titekela nsati wa vuoswi ni vana va vuoswi; hikuva tiko hinkwaro ri ni vuoswi, ri sukele Yehovha.”
3Kutani a ya teka Gomere, n'wana Diblayimi; loyi ingi kuteloko a tikile, a n'wi velekela wandzisanyana. 4Kutani Yehovha a ku eka Hosiya: “N'wi thye vito ra Yizriele, hikuva ku nga ri kungani, ndzi ta ba yindlu ya Yehu, hikwalaho ka ngati leyi halatiweke Yizriele, ndzi va ndzi herisa ku fuma ka yindlu ya Israele; 5kutani esikwini lero, ndzi ta tshova vurha bya Israele enkoveni ya Yizriele.”
6Kutani a engeta a tika, a veleka wanhwanyana; kutani Yehovha a ku eka Hosiya: “N'wi thye vito ra Lo-Ruhama (la nga tsetseleriwangiki); hikuva a ndzi nga ha tsetseleli yindlu ya Israele hi ku yi rivalela. 7Loko yi ri yindlu ya Yuda, ndzi ta yi tsetselela, ndzi yi ponisa ha Yehovha, Xikwembu xa yona, ndzi nga ka ndzi nga va ponisi hi miseve; ni tlhari, ni ku lwa, ni tihanci, ni vakhandziyi.”
8Kutani Gomere a lumula Lo-Ruhama, a tika, a veleka wandzisanyana; Yehovha a ku eka Hosiya: “U n'wi thya vito ra Lo-Ami, (la nga riki tiko ranga), 9hikuva a mi vanhu va mina; mina a ndzi nga ha vi Xikwembu xa n'wina.
10“Kambe vunyingi bya vana va Israele byi ta kotisa sava ra lwandle leri nga ringanisiwiki, ni loko ku ri ku hlayiwa; kutaku exivandleni lexo va nga byeriwa ka xona, leswaku ‘a mi vana va mina’, hi kona ku nga vuriwa leswaku: ‘Mi vana va Xikwembu lexi hanyaka.’ 11Kutani vana va Yuda, ni vana va Israele va ta hlengeletana kun'we, kutani va ta tivekela hosi yin'we va huma etikweni; hikuva ri ta va lerikulu siku ra Yizriele.
Currently Selected:
HOSIYA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.