TIPISALEMA 30

Xikhongelo xa loyi a pfuniweke evuvabyini.

Pisalema. Risimu ra Davhida, ra ku khangula yindlu.

1Yehovha, ndza ku kurisa hikuva u ndzi tshunxile;

A ku tshikanga valala va mina va tsaka ha mina.

2Yehovha, Xikwembu xa mina,

Ndzi huwelele eka wena, kutani u ndzi horisile.

3Yehovha, u humesile moya wa mina exivandleni xa vafi,

U ndzi hanyisile exikarhi ka lava xikelaka esirheni.

4Yimbelelani Yehovha, n'wina lava n'wi rhandzaka,

Mi dzunisa vito ra yena leri kwetsimaka, mi ri tsundzuka.

5Hikuva vukari bya yena i bya nkarhinyana ntsena,

Kambe tintswalo ta yena, i ta vutomi hinkwabyo;

Swirilo swi nga hambukela eka munhu nimadyambu,

Kambe nimixo i ku tsaka.

6Eku tiphineni ka mina, a ndzi ku: “Ndzi nga ka ndzi nga tsekatseki, ni siku ni rin'we?”

7Yehovha! Hi tintswalo ta wena, u tiyisile ntshava ya mina;

Kambe u fihle mombo wa wena, kutani ndzi kanakana.

8Oho Yehovha! Ndzi huwelele eka wena;

Ndzi khongerile Yehovha, ndzi ku:

9“Xana u nga fuwa yini hi ngati ya mina,

Loko ndzi xikela esirheni?

Xana ntshuri wu nga ku dzunisa?

Xana wu nga vula ku tshembeka ka wena xana?

10Yehovha, ndzi yingise, u va u ndzi twela vusiwana;

Yehovha, u va mupfuni wa mina!”

11U hundzuluxile mihloti ya mina ku tsaka,

U tshunxile nguvu ya mina leyo khwaxa,

kutani u ndzi ambexe ku tsaka,

12Leswaku mbilu ya mina yi ku yimbelela yi nga miyeli.

Yehovha, Xikwembu xa mina, ndzi ta ku dzunisa hi masiku.

Currently Selected:

TIPISALEMA 30: TSO29

Highlight

Compare

Copy

Want to have your highlights saved across all your devices? Sign up or sign in

Learn More About Xitsonga (Bibele)