YOHANE 3
3
Ta Yesu loko a vulavula na Nikodema.
1A ku ri ni munhu wa ka Vafarisi, vito ra yena a a ri Nikodema; a a ri hosanyana ya Vayuda; 2a ta eka Yesu nivusiku, a ku eka yena: “Rabi, ha swi tiva leswaku u mufundhisi la humaka eka Xikwembu, hikuva a ku na munhu la nga endlaka mahlori lawa u ma endlaka, loko Xikwembu xi nga ri na yena.” 3Yesu a hlamula, a ku eka yena: “Kunenenene ndzi ri eka wena: Loko munhu a nga tswariwi ra vumbirhi, a nga ka a nga voni ku fuma ka Xikwembu.” 4Nikodema a ku eka yena: “Xana munhu loko a dyuharile, a nga tswarisiwa ku yini? Xana a nga tlhela a vuyela ekhwirini ra mana wa yena, a tlhela a tswariwa xana?” 5Yesu a hlamula, a ku: “Kunenenene ndzi ri eka wena: Loko munhu a nga tswariwi hi mati ni Moya, a nga ka a nga ngheni eku fumeni ka Xikwembu. 6Leswi tswariweke hi nyama, i nyama; kambe leswi tswariweke hi Moya, i Moya. 7U nga hlamali loko ndzi ku eka wena: ‘Swa fanela leswaku mi tswariwa ra vumbirhi.’ 8Moya wu hungela laha wu rhandzaka kona, kutani u twa mpfumawulo wa wona, kambe a ku tivi laha wu humaka kona, ni laha wu yaka kona. Swi tano ni ka hinkwavo lava tswariweke hi Moya.” 9Nikodema a hlamula, a ku eka yena: “Swilo leswi, swi nga endlekisa hi ku yini xana?” 10Yesu a n'wi hlamula, a ku: “U mufundhisi wa Israele, kasi a ku tivi timhaka leti xana? 11Ndzi vurisile ndzi ri eka wena: Hi vula leswi hi swi tivaka, kutani hi vula vumbhoni bya leswi hi swi voneke; kambe a mi amukeri vumbhoni bya hina.
12“Kungakuloko ndzi mi byela swa laha emisaveni, kutani mi nga pfumeri, xana mi ta pfumerisa ku yini loko ndzi mi byela swa le tilweni? 13A ku na munhu la tshamaka a tlhandlukela etilweni, loko a nga ri la xikeke etilweni, a nga N'wana wa Munhu la nga etilweni. 14Kukotisa Muxe loko a hayekile nyoka emananga, N'wana wa Munhu u fanekele ku hayekisiwa sweswo; 15leswaku un'wana ni un'wana la pfumelaka eka yena a nga tshuki a lova, kambe a va ni vutomi lebyi nga heriki.” 16Hikuva Xikwembu xi rhandzile misava swonghasi, xi ko xi nyika N'wana wa xona la nga tswariwa a ri swakwe, leswaku un'wana ni un'wana la pfumelaka eka yena, a nga tshuki a lova, kambe a va ni vutomi lebyi nga heriki. 17Hikuva Xikwembu a xi rhumanga N'wana wa xona emisaveni ku ta avanyisa misava, kambe hileswaku misava yi ponisiwa ha yena. 18La pfumelaka eka yena, a nga avanyisiwi; kambe la nga pfumeriki, wa avanyisiwa, hikuva a nga pfumelangi vito ra N'wana wa Xikwembu la nga tswariwa a ri swakwe. 19Ku avanyisa hi kuloku: Ku vonakala ku tile emisaveni, kambe vanhu va rhandzile munyama ku tlurisa ku vonakala, hikuva mitirho ya vona a yi ri leyo biha. 20Hikuva un'wana ni un'wana la endlaka leswo biha, u venga ku vonakala, kutani a nga ti eku vonakaleni, mitirho ya yena yi nga ti tshuka yi tshinyiwa. 21Kambe la endlaka swinene, wa ta eku vonakaleni, mitirho ya yena yi ta vonaka leswaku yi endleriwa Xikwembu.
Ta vumbhoni byin'wana bya Yohane Mukhuvuri.
22Endzhaku ka sweswo, Yesu a ya etikweni ra Yudiya a ri ni vadyondzisiwa va yena, kutani a tshama kona na vona, a khuvula vanhu. 23Yohane na yena, a a khuvula le Enoni, ekusuhi na Salime, hikuva mati a ma tele kona, ni vanhu a va ya kona ku ya khuvuriwa; 24hikuva Yohane a a nga si nghenisiwa ekhotsweni.
25Kutani ku humelela ku kanetana emhakeni ya ku tibasisa exikarhi ka vadyondzisiwa va Yohane ni Vayuda. 26Va ta eka Yohane va ku eka yena: “Rabi, loyi ngi u ri na yena entsungeni wa hase wa Yordani, loyi u nga vula vumbhoni ehenhla ka yena, wa khuvula na yena, kutani hinkwavo va ya eka yena.” 27Yohane a hlamula, a ku: “Munhu a nga ka a nga amukeri nchumu loko xi nga ri lexi a xi nyikiweke hi tilo. 28N'wina mi timbhoni ta mina leswaku ndzi vurile ndzi ku: ‘A hi mina Kriste, kambe ndzi rhumiwile ku n'wi rhangela emahlweni.’ 29Loyi a fuwaka mutekiwa, i muteki; kambe xangwana ya muteki leyi yimaka yi n'wi yingisa, yi tsaka hi ku tsaka lokukulu, loko yi twa rito ra muteki; hi kona ku tsaka ka mina loku hetisekeke. 30Yena u fanele ku kula, mina ndzi tsongahala.” 31La humaka etilweni u le henhla ka hinkwavo; la humaka emisaveni, i wa misava, kutani u vulavula hi swa misava; la humaka etilweni u le henhla ka hinkwavo. 32Kutani lexi a xi voneke, ni lexi a xi tweke, hi lexi a xi tiyisaka; kambe a ku na munhu la amukelaka vumbhoni bya yena. 33La amukelaka vumbhoni bya yena, u tiyisile leswaku Xikwembu xa tshembeka. 34Hikuva la rhumiweke hi Xikwembu, u vula marito ya Xikwembu, hikuva Xikwembu xi n'wi nyika Moya ku nga ri hi mpimo. 35Tatana u rhandza N'wana, u vekile swilo hinkwaswo emavokweni ya yena. 36La pfumelaka eka N'wana, u ni vutomi lebyi nga heriki; kambe la nga yingisiki N'wana, a nga ka a nga voni vutomi, kambe ku kariha ka Xikwembu ku tshame ehenhla ka yena.
Currently Selected:
YOHANE 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.