YOHANE 16
16
Ta ku xanisiwa.
1“Ndzi mi byerile timhaka leti, leswaku mi nga tshuki mi khunguvanyeka. 2Va ta mi hlongola emasinagogeni; kambe nkarhi wa ta lowu un'wana ni un'wana la nga ta mi dlaya a nga ta ehleketa leswaku u tirhela Xikwembu. 3Va ta mi endla hinkwaswo leswi, hikuva a va tivi Tatana na mina. 4Kambe ndzi mi byerile timhaka leti, leswaku loko nkarhi wa tona wu fikile, mi ta tsundzuka leswaku ndzi mi byerile tona. A ndzi mi byelanga tona ka ha ri eku sunguleni, hikuva a ndzi ri na n'wina.
Ta ntirho wa Moya lowo Kwetsima.
5“Sweswi, ndzi ya eka loyi a ndzi rhumeke, kutani a ku na un'we wa n'wina la ndzi vutisaka, a ku: ‘U ya kwihi?’ 6Kambe leswi ndzi mi byeleke sweswo, timbilu ta n'wina ti tele tingana. 7Hambiswiritano, ndza mi byela leswi tiyeke, ndzi ri: Swi sasekile eka n'wina loko ndzi famba; hikuva loko ndzi nga fambi, Muchaveleri a nga ka a nga ti eka n'wina; kambe loko ndzi famba, ndzi ta n'wi rhuma eka n'wina. 8Kutakuloko yena a ta, u ta khorwisa misava leswaku ku dyoha ku kona, ni ku lulama, ni ku avanyisa. 9Ku dyoha ku kona, hikuva a va pfumeri eka mina; 10ku lulama ku kona, hikuva ndzi ya eka Tatana, kutani a mi nga tshami mi ndzi vona; 11ku avanyisa ku kona, hikuva hosi ya misava leyi, yi avanyisiwile.
12“Ndza ha ri ni timhaka leto tala leti ndzi nga mi byelaka tona, kambe loko ku ri sweswi, ti nga mi tikela. 13Kambe kutakuloko yeloyi a ta, wu nga Moya wa ntiyiso, wu ta mi fambisa entiyisweni hinkwawo; hikuva wu nga ka wu nga vulavuri wu tisungulela swa wona; kambe hinkwaswo leswi wu swi tweke, wu ta swi vula; na swona wu ta mi tivisa leswi nga ta ta. 14Wona wu ta ndzi dzunisa, hikuva wu ta teka leswi nga swa mina, wu mi tivisa swona. 15Hinkwaswo leswi Tatana a nga na swona, i swa mina; hikwalaho ndzi nge: Wu ta teka leswi nga swa mina, wu mi tivisa swona.
Ta ku lela ni ku khongotela ka Yesu.
16“Ku nga ri kungani, a mi nga ha ndzi voni; kambe ku nga ri kungani, mi ta tlhela mi ndzi vona hikuva ndzi ya eka Tatana.” 17Vadyondzisiwa va yena van'wana va vutisana; va ku: “Mhaka leyi a hi byelaka yona, hi leyo yini, loko a ku: ‘Ku nga ri kungani mi nga ka mi nga ha ndzi voni, kambe ku nga ri kungani mi ta tlhela mi ndzi vona’; ni loko a ku: ‘Ndzi ya eka Tatana’?” 18Kutani a va ku: “Hi ku yini loko a ku: ‘Ku nga ri kungani’? A hi tivi lexi a xi vulaka.”
19Kuteloko Yesu a tiva leswaku va rhandza ku n'wi vutisa, a ku eka vona: “Mi vutisana lexi ndza ha ku xi vulaka, loko ndzi te: ‘Ku nga ri kungani mi nga ka mi nga ha ndzi voni, kambe ku nga ri kungani, mi ta tlhela mi ndzi vona’? 20Ndzi vurisile ndzi ri eka n'wina: Mi ta rila, mi va mi kolola, kutani yona misava yi ta tsaka; mi ta va ni ku vaviseka, Kambe ku vaviseka ka n'wina ku ta hundzuka ku tsaka. 21Loko wansati a veleka, u twa ku vaviseka, hikuva nkarhi wa yena wu fikile; kambe loko a velekile n'wana, a nga ha anakanyi ku xaniseka ka yena, hi ku tsaka ka yena, hikuva ku velekiwile munhu emisaveni. 22Na n'wina ma vaviseka sweswi, kambe ndzi ta tlhela ndzi mi vona, timbilu ta n'wina ti ta tsaka, kutani a ku na munhu la nga ta mi tekela ku tsaka ka n'wina.
23“Hi siku rero, a mi nga ndzi vutisi nchumu. Ndzi vurisile ndzi ri eka n'wina: Swilo hinkwaswo leswi mi nga ta swi kombela eka Tatana hi vito ra mina, u ta mi nyika swona. 24Ku fikela sweswi, a mi si kombela nchumu hi vito ra mina; kombelani, mi ta nyikiwa, leswaku ku tsaka ka n'wina ku hetiseka.
25“Ndzi mi byerile timhaka leti, hi swifaniso; kambe nkarhi wa ta, lowu ndzi nga taka ndzi nga mi byeri nchumu hi swifaniso; kambe ndzi ta mi tivisa swa Tatana hi ku hlamusela. 26Enkarhini wolowo, mi ta kombela hi vito ra mina, kambe a ndzi mi byeri leswaku ndzi ta mi khongelela eka Tatana; 27hikuva na yena Tatana wa mi rhandza, hikuva mi ndzi rhandzile, ni ku pfumela leswaku ndzi huma eka Xikwembu. 28Ndzi humile eka Tatana, kutani ndzi tile emisaveni; sweswi, ndzi tlhela ndzi suka emisaveni ndzi ya eka Tatana.”
29Vadyondzisiwa va yena va ku eka yena: “Waswivo, sweswi, u hlamuserile, a wa ha vulavuri hi xifaniso. 30Sweswi, ha swi tiva leswaku u tiva hinkwaswo, a ku faneri ku vutisiwa nchumu hi munhu; hikwalaho ha pfumela leswaku u huma eka Xikwembu.” 31Yesu a va hlamula, a ku: “Sweswi, ma pfumela xana? 32Vonani, nkarhi wa ta, ni sweswi, wu tile, lowu mi nga ta hangalaka ha wona, un'wana ni un'wana a famba hi ndlela ya yena, mi ndzi siya ndzi ri swanga, kambe a ndzi swanga hikuva Tatana u na mina. 33Ndzi mi byerile timhaka leti, leswaku mi va ni ku rhula ka mina. Mi ta va ni nhlomulo emisaveni, kambe tiyisani timbilu, ndzi hlurile misava.”
Currently Selected:
YOHANE 16: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.