John 21
21
Jesus yugha hodulꞌehne lho haꞌ hutꞌen-un, ꞌet doo cha za bunalhtsꞌet haínya
1Njan ꞌoh te neꞌwhustꞌen hukwꞌelhꞌaz, doo cha za Jesus yugha hodulꞌehne bunalhtsꞌet haínya. Bunghun Tiberias huwhútni-un, ꞌet ꞌuja.#21:1 Ndi bunghun ꞌi Galilee cha huyúlhni. ꞋInkꞌez diz ꞌuna bunalhtsꞌet haínya whe, 2Simon Peter, Thomas ꞌutꞌudándaꞌ-un, Nathanael, ꞌen keyoh Cana Galilee yun kꞌut whuzꞌai, ꞌet whutꞌen-un, Zebedee ooyeꞌke cha, ꞌinkꞌez ꞌuyoonne nane Jesus yugha hodulꞌehne cha, ꞌenne tsꞌiyawh ꞌalhgoh hudilhtsꞌi whe 3ꞌet Simon Peter ubúlhni, “Lho haꞌ tistꞌelh.” ꞋEt ꞌuhuyulhni, “Wheni cha la nyulh ꞌúztoodilh.” ꞋEt ꞌaho tsꞌi cho be hándil. ꞋUlhdzis ndúwhulyiz whe nuteꞌhuleꞌ, ꞌet hoontsꞌi ꞌaw lheꞌhílooh.
4Ꞌom bun bundadaꞌ sa haínꞌai whe Jesus taba usyin hitilhꞌen, ꞌet hoontsꞌi ndunne yugha hodulꞌehne ꞌaw Jesus ꞌen ꞌuntꞌoh tꞌéhonúszun.
5ꞋEt Jesus ubúlhni, “Tsꞌoodunne#21:5 ꞋOh daꞌ whuloh te whuz unꞌa duyadanke bulh yáhalhduk. ꞌaw eh lheꞌáhlooh?” “Gak,” huyúlhni.
6ꞋEt ubúlhni, “Nohlembil tsꞌi ooghu naílhni tsꞌe whuz talhkat, ꞌet de la be ꞌóohloo.” ꞋInka whuz tahiyalhkat, lho whuz lhai huzdlooh kꞌet, ꞌaw lhembilh ha náhuyoolelh ꞌaítꞌoh.
7ꞋEt ndun ꞌilhoghun Jesus kꞌus yúkꞌensiꞌ-un, ꞌen Peter ꞌulhni, “NeMoodihti ꞌutꞌen.” ꞋEt neMoodihti ꞌutꞌen ni Peter yudántsꞌo whe soo ꞌa cho yoo ꞌaz tsꞌe ye usdá-i yunállhoh, ꞌankwꞌus ꞌustꞌet ꞌuntꞌoh ínleꞌ ꞌinka, ꞌinkꞌez bunghun tooz tállhoh. 8ꞋAw taba howu nilhdzaꞌ iloh ꞌuhutꞌen, whunizyat ꞌon ꞌat whunizyat negan ghútistni atꞌen ꞌuwhuldzoh. ꞋInka nyoonne yugha hodulꞌehne tsꞌiyaz be hándil ꞌinkꞌez lhembilh lho tubulh toot huyigus whe yaháyulhdlat. 9Yanáhuski whe taba kwunyaz dízkꞌun ꞌinkꞌez lho ookꞌut butá ꞌuneh ꞌinkꞌez lhes cha ꞌet ꞌusꞌai huwhutilhꞌen.
10ꞋEt Jesus ꞌubulhni, “Nyoo lho suhlooh-i ooloh dizáhlelh.”
11ꞋEt Simon Peter tsꞌi yenya, ꞌinkꞌez lhembilh taba yáyuzguz. Lho soo ncha-i za dizbun, 153 ꞌultsuk. Tube lhai ꞌinkꞌez undaz, ꞌet hoontsꞌi lhembilh ꞌaw kꞌulhíchꞌulh. 12ꞋEt Jesus ꞌubulhni, “ꞋAnih, njan naꞌuhtꞌalh.” Huyéntsaz whe ꞌaw ꞌilhoghun hoontsꞌi mbe ꞌuntꞌoh-un hukwa lhahuyoodulhkut, ꞌudaꞌ tꞌehonínzun neMoodihti ꞌen ꞌuntꞌoh ꞌinka. 13ꞋEt Jesus whuz oozya, lhes yílhchoot ꞌinkꞌez bugha íninꞌai. ꞋEt whuz unꞌa za lho cha bugha íninla. 14ꞋEt ꞌawet yaidlane toh dunadija whutsꞌun, whulh tat Jesus yugha hodulꞌehne bunalhtsꞌet hainya.
15ꞋAwet naꞌhitꞌal hukwꞌelhꞌaz, Jesus Simon Peter yoodulhkut, “Simon Jonas ooyeꞌ, ndunne, ꞌenne buba nús eh skꞌeinsiꞌ?” ꞋEt Peter uyúlhni, “A sMoodihti, nyunchꞌoh tꞌéwhunínzun nyadan usdli.” “ꞋEt de se ꞌusbaiyazne bube ꞌolhꞌalh,” yúlhni.
16Doo cha za whulh nat yoodulhkut, “Simon Jonas ooyeꞌ, ꞌuskꞌeinsiꞌ eh?” ꞋEt Peter ꞌuyulhni, “A sMoodihti, nyunchꞌoh tꞌéwhunínzun nyadan usdli.” “ꞋEt de se ꞌusbaine bughonleꞌ,” yúlhni.
17Whulh tat yoodulhkut, “Simon Jonas ooyeꞌ ꞌalhaꞌ eh syadan inli?” ꞋEt Peter tube ooba dzoh suliꞌ, Jesus whulh tat-un yoodulhkut whe uyúlhni, “Syadan inli eh?” uyúlhni. ꞋEt Peter uyúlhni, “SMoodihti, nyunchꞌoh tsꞌiyantsuk tꞌéwhúnínzun. ꞋInkꞌez nyunchꞌoh tꞌéwhunínzun nyadan usdli.” ꞋEt doo cha Jesus uyúlhni, “Se ꞌusbaine bube ꞌilhꞌalh!
18Soo tsꞌihꞌun unꞌa nyudúsni, soo chilh inli daꞌ soo cho soo nadintꞌih ꞌinkꞌez ntsꞌe la hukwaꞌ ninzun, ꞌoh teninya inleꞌ. ꞋEt hoontsꞌi hoonyan sinliꞌ de, nla nusóontun ꞌinkꞌez ꞌuyoon dune nla yéꞌdinguz, ꞌi tꞌaz ntsꞌe hukwa lheꞌnínzun, ꞌoh te hoontsꞌi núnyutilhtelh,” yulhni. 19ꞋEt Jesus ndúyulhni whe ntsꞌenꞌa la datítsah whuz unꞌa Moodihti yudutálhtiꞌ, ꞌet wheínulhtun whe ꞌutni. ꞋEt ndi daniꞌ hukwꞌelhꞌaz ꞌet, “Sunanyalh,” yúlhni.
20ꞋEt Peter ꞌawh nalhꞌa whe nyoon mbe Jesus kꞌus yúkꞌensiꞌ-un, ꞌen ꞌuja ꞌudekꞌez naꞌhútꞌalh-un yutsꞌun leꞌ ꞌuja ꞌinkꞌez yoodulhkut, “SMoodihti, mbe ꞌuja nyeꞌ ꞌónket?” yúlhni, ꞌet Peter ꞌawh nalhꞌa whe ꞌen ꞌubuniyalh whe yutilhꞌen, 21Peter yanꞌen whe Jesus uyúlhni, “SMoodihti, ndun ꞌen doꞌ datínelh?”
22ꞋEt Jesus uyúlhni, “Whusanátisdalh whutsꞌun ꞌet hoonaꞌ hukwaꞌ nuszun de, nyun mba lheꞌhootꞌoh. ꞋEt nyun sunanyalh.” 23Mbene la lhulhutsinke suliꞌne ꞌet ndi khuni Jesus ye yátilhduk-i tsꞌiyawh butoh nídilhtsꞌut, nyoon Jesus yukꞌentsiꞌ-un ꞌaw dálhtisa. ꞋEt hoontsꞌi Jesus Peter ꞌaw lhidínel ndun ꞌen ꞌaw dálhtisa. ꞋAntsꞌi yúlhni, “Whusanátisdalh whutsꞌun ꞌet ꞌen hoonaꞌ hukwaꞌ nuszun de, nyun mba lheꞌhootꞌoh?”
24ꞋEt ndun yugha hodulꞌeh-un, mbe Jesus ꞌukꞌenus yukꞌentsiꞌ-un, ꞌen ꞌudaniꞌ njan howu yailhduk ꞌinkꞌez ꞌukꞌehoonguz ꞌinkꞌez daja daniꞌ la soo ꞌalha ꞌuhoontꞌoh ꞌet tꞌétsꞌonínzun.
25ꞋOn ꞌun cha tube lhat-un Jesus neꞌústꞌen. ꞋEt huwun tsꞌiyawh ꞌukꞌé hooguz de, ꞌudustlꞌus lhai kꞌet ndi yun kꞌut ꞌet hoontsꞌi ꞌaw soo lheꞌhoolcho ooleꞌ daꞌ ꞌet tilalh wheni núszun. ꞋEt ndo honeh.
Currently Selected:
John 21: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.