Acts 1
1
Luke Theophilus hadih yulhni
1Syadan Theophilus, hadih. ꞋUdechoo ꞌookꞌuneꞌúguz ꞌukꞌu nusúsguz-i Jesus ntsꞌoh te neꞌústꞌen ꞌinkꞌez nehodulhꞌeh ꞌet huwun ndet dude ꞌutꞌen wheꞌ yudilhꞌen, 2ꞌinkꞌez ndet dzin ndo yakꞌuz whenája ꞌet whutsꞌun. ꞋEt ndo yakꞌuz natiltelh whutso ndunne dune whelꞌaꞌne ubulhtsi, Ndoni gha buba núhizyeꞌ. 3Jesus dazsai hukwꞌélhꞌaz dit whunizyat dzin ndoohoolyiz lhat whe bunalhtsꞌet nusúya ꞌet whuz unꞌa ꞌalhaꞌ khuna ꞌaw whutsꞌu hoodódlaiꞌ ꞌaitꞌoh. Hinilhꞌen ꞌinkꞌez Yakꞌusda dune kꞌúneꞌ bulꞌen-un huwun bubulh yálhduk.
Ndoni butsꞌu yoosdzi
4ꞋEt ꞌilhoh hudilhtsꞌi whe bugha khúni ninꞌai whe ubúlhni, “Jerusalem huwu toohdilh junih! SBá ye nóhtsꞌu náhizya-i, ꞌi ooba oolhꞌéꞌ. Ndai la nohgha títꞌalh-i huwun nohdúsni inleꞌ. 5John dune too be ꞌulhꞌen-un, ꞌen too be too beꞌ nohulhꞌen inleꞌ, ꞌet hoontsꞌi ꞌaw lhadzin iloh inleꞌ de, sBá Ndoni nohtsꞌo tlꞌaidutiꞌalh ꞌinkꞌez ꞌen be too beꞌ nohtilelh,” ubúlhni.
6ꞋEt huwa whelꞌaꞌne Jesus te ꞌilhunahosdil whe ꞌet Jesus huyoodulhkut, “NeMoodihti, ꞌawet eh whusahónzut Israel ootsꞌu hainzutne doo cha za buyun kꞌut butlꞌa naootanꞌalh?”
7ꞋEt Jesus ubúlhni, “Ntsꞌo whude ꞌuwhutánelh-un ꞌaw nohni tꞌeoonózin huba lheꞌhóotꞌoh. SBá, ꞌen za tꞌewhunínzun. 8ꞋEt hoontsꞌi Ndoni nohyudíltsꞌut de soo nohdzi ulhtus whe Jerusalem ꞌet si sba dune whunulhtunne tihle, Judea yun kꞌut ndulcho whe cha, Samaria yun kꞌut cha, ꞌinkꞌez ndi yun kꞌut ndulcho whe cha,” ubúlhni.
Jesus Christ yakꞌuz whenája
9ꞋEt ndi yughu yatílhduk whe ꞌawet ndo yakꞌuz whenája. ꞋEt hinilhꞌen whuz za kwꞌus yo tsꞌe hooloh suliꞌ.
10ꞋEt ꞌawhuz ndo yat tsꞌe hika itísꞌen whe khuntsul nane dune ꞌulhyul ꞌi be dune unlíne buzih bube hóodiltsai. 11“Galilee whutꞌenne, di ha ꞌet núdulhya ꞌinkꞌez ndo yat tsꞌe whunulhꞌen? Ndun Jesus ndo yakꞌuz tsꞌe nohghu whenája-un ꞌandit nulhꞌen ndo yakꞌuz whenája, whuz unꞌa za whusanátidalh,” ꞌubuhútni.
Tenahudutidli huba ꞌet ꞌilhuhodulh
12ꞋEt whelꞌaꞌne dzulh Olive huyúlhni-i hiye nádidil whe Jerusalem tsꞌe nahoosdil keyoh whutsꞌun dzoh nilhdzaꞌ wheꞌ hoontꞌoh. 13Jerusalem tsꞌe náhoosdil whe, ꞌaho ndo yoh huwhutꞌi-un danáhundil. Peter, John, James ꞌinkꞌez Andrew, Philip ꞌinkꞌez Thomas, Bartholomew ꞌinkꞌez Matthew, James Alphaeus ooyeꞌ, Simon Lizwifne ba huwu daóoditꞌowh-un, ꞌinkꞌez Judas James ooyeꞌ, ꞌenne ꞌet yoh hudilhtsꞌi. 14ꞋAhoolhyiz ꞌilhuhodulh tenahudutidli hukwa. Tsꞌekoo bulh cha, Jesus bulhutsinke, ꞌinkꞌez Mary ooloo cha, tsꞌiyawh tenahududli.
Judas kꞌenádija-un
15ꞋEt ꞌoh daꞌ dzin yugha hodilꞌeꞌne ꞌilhúhozdil (ꞌalhgoh 120 ꞌatꞌénne dune). ꞋEnne butoh Peter bubulh yátilhduk ha dudinya, 16ꞌinkꞌez ubúlhni, “Sulhutsinke ndi Yakꞌusda ooghuni ꞌukꞌu nusgúz-i ꞌet lhaóodotneh hubaꞌ hoontꞌoh. Ndet David hónꞌen Ndoni ꞌen gha Judas datínelh ꞌet yughu yalhduk. Judas ꞌen húbunilhtan whe ꞌoh daꞌ Lizwifne Jesus huyílhchoot inleꞌ. 17ꞋEn cha nebulh óotꞌen ha ꞌutahálti inleꞌ. ꞋEt huwa Judas wheni kꞌunꞌa ꞌen cha whelꞌaꞌ-un inleꞌ.”
18(Ndi sooniya Judas oogha íninkat nintaꞌantꞌen huwa ꞌi be yun lhadíntꞌoh-i ꞌonket. ꞋEt Judas nadílduz ꞌinkꞌez ooyustꞌe ndulcho bé ha hooltal. 19Jerusalem whutꞌenne tsꞌiyawh whulh ꞌúhudantsꞌo ꞌinka nahahoozi “Akeldama” huwhútni. ꞋI khuni, “ꞋUskaiꞌ Yun” ni whe ꞌutni.)
20Peter ꞌet cha ndutni, “Yakꞌusda ooghuni ꞌukꞌu nusgúz-i kꞌut ‘Shun’ huyúlhni, ꞌi ndutni,
‘Ooyoh ꞌaw dune lhuhóotꞌih hooleꞌ.’
ꞋInkꞌez cha ndutni,
‘Oobe ꞌutꞌen kꞌoh ꞌuyoon yukꞌenádoojaꞌ.’
21-22ꞋEt huwa ꞌuyoon netaóoyaꞌ Jesus Christ dunadija-un huwun nela tsꞌihꞌun ꞌudooniꞌ ha. Mbe la dune ꞌutaháztilhtelh-un, ꞌen ꞌahoolhyiz huba nebulh ꞌítꞌen inleꞌ, ꞌen ꞌuztilelh. ꞋUdechoo Jesus neMoodihti nebulh tizya daꞌ ꞌet whutsꞌun, ꞌet ndet la John dune too be ꞌulhꞌen-un too béꞌ yinla daꞌ ꞌinkꞌez ndo yakꞌuz negho whenája ꞌet whutsꞌun.”
23Hukwꞌelhꞌaz Peter budániꞌ-un, ꞌinka nane dune ꞌutahábahalhti. ꞋIlhoghun Joseph ꞌen la Barsabbas huyúlhni, Justus cha huyúlhni. ꞋInkꞌez Matthias huyúlhni. 24ꞋEt tenahudidli whe nduhútni, “NeMoodihti nyun tsꞌiyanne dune budzi yo tꞌéoonínzun. ꞋEt huwa whunénilhtun kꞌus umbe ꞌen neba ꞌutuhaílhti. 25Judas nintaꞌantꞌen whe huba ꞌantꞌoh tsꞌe wheínya, ꞌet huwa ndun yukꞌenádutidalh-un, ꞌen whelꞌaꞌ-un whunénilhtun mbe suba ꞌutsꞌooleh.” 26ꞋEt nahúltꞌoh bubooziꞌ tse kꞌehúyinguz ꞌinkꞌez huyuntílhgai kꞌus umbe booziꞌ ndo nádilhtsꞌut-un, ꞌen ꞌutahatíltelh. ꞋInkꞌez Matthias ꞌen whelꞌaꞌne whunizyane ꞌon ꞌat ꞌilhoghun hinli whe butanínya.
Currently Selected:
Acts 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.