Revelation 2
2
Keyoh Ephesus dune Yakꞌusda ba ꞌilhunaoodúlhne ꞌudechoo whe Jesus Christ ꞌinkꞌez nohbulh dunene cha bukꞌehtsiꞌ inleꞌ, ꞌet whula dihtni, sba budóniꞌ
1“ꞋEt keyoh Ephesus dune Yakꞌusda ba ꞌilhunaoodúlhne bulizas ꞌen ootsꞌó kꞌeinges:
Mbe la lhtakꞌantꞌi sum nailhni oola kꞌet ꞌinkꞌez lhtakꞌantꞌi be hóotꞌen-i toh nuya-un, ꞌen njan ndutni:
2Nohꞌeꞌutꞌen kꞌoh tꞌeoonuszun, nohꞌeꞌutꞌen ulhtus-i cha. Nohba howa whulnaꞌ ꞌet hoontsꞌi whulh sahyin, ꞌinkꞌez ndunne ntsiꞌne ꞌaw bubulh óohtꞌeꞌ ꞌaitꞌoh. Mbene la whelꞌaꞌne naꞌdudilꞌine, ꞌet hoontsꞌi ꞌalhaꞌ ꞌaw whelꞌaꞌne lhuhíloh. ꞋEnne uboozílhdzai ꞌinkꞌez tꞌebunanzin whutsꞌitne ꞌuhintꞌoh.
3Sooziꞌ gha soo cho whulh áhyin ꞌinkꞌez ꞌaw hoonliyaz talhódahni whe tube ꞌihtꞌen ꞌet hoontsꞌi ꞌaw nélhnahtsil.
4ꞋEt hoontsꞌi ꞌilhughun whe ꞌutsꞌun unꞌa sba ꞌahtꞌoh. ꞋUdechoo Jesus Christ ꞌinkꞌez nohbulh dunene cha bukꞌehsiꞌ inleꞌ, ꞌet whula dihtni.
5ꞋEt whunaoolhnih ndet nálhtsꞌut-un. Lhtꞌananahdaih ꞌinkꞌez ꞌudechoo nohꞌeꞌ utꞌen-i nalhchoot. ꞋAw lhtꞌanalhníhdil de, khuntsul nohtsꞌun tísyalh ꞌinkꞌez nyoo nohbe hóotꞌen-i nohghu naitáschulh.
6ꞋEt hoontsꞌi ꞌilhoghun hoonzoo-un, ꞌet whahtꞌi, Nicolas unidulhne bube ꞌutꞌen ootsꞌu dahni. Si cha tube whutsꞌu dusni wheꞌ hoontꞌoh.
7Mbe ꞌuditsꞌone, Ndoni Yakꞌusda ba ꞌilhunaoodulhne, daja ubúlhni-un, ꞌen huyoozólhtsꞌaiꞌ hubaꞌ hoontꞌoh. Mbene la ꞌutꞌen ntsiꞌ-i yuchꞌaꞌ ꞌulhdehne, ndi duchun oogha khutna-i oomaiꞌ huyooꞌalh-un bugha óotasꞌalh. Ndi duchun ꞌi Yakꞌusda ookeyoh ꞌukꞌenus hoonzoo-un, ꞌet whuniz tsꞌe nadánꞌa.”
Keyoh Smyrna dune Yakꞌusda ba ꞌilhunaoodulhne, nohꞌeꞌutꞌen cha, be dzoh nahzut-i, ꞌinkꞌez whe télhꞌen-un cha, tsꞌiyawh tꞌeoonúszun, sba budóniꞌ
8“ꞋEt keyoh Smyrna dune Yakꞌusda ba ꞌilhunaoodúlhne bulizas ꞌen ootsꞌó kꞌeinges, njan ndudini:
Mbe ꞌudechoo-un ꞌinkꞌez ꞌudekꞌez-un, ꞌen dazsai inleꞌ, ꞌinkꞌez nahítnaꞌ, ꞌen njan ndutni:
9Nohꞌeꞌutꞌen cha, be dzoh nahdeh-i, ꞌinkꞌez whe télhꞌen-un cha, tsꞌiyawh tꞌeoonúszun. ꞋEt hoontsꞌi ꞌalhaꞌ hoonzooꞌ ꞌahtꞌoh. Ndunne nohchꞌaz ditnine nduhutni, wheni lizwifne ꞌutsꞌintꞌoh, ꞌet hoontsꞌi lizwifne lhuhiloh. ꞋEnne ndun Satan huyúlhni-un, ꞌen oolugliz ꞌet whuchꞌeꞌ hinli wheꞌ hintꞌoh, ꞌet cha tꞌeoonúszun.
10Ndet la whe dzoh nutihzut-un, ꞌawet nilhdukw nohghu whutáltsꞌulh. Whénoolhjut junih! Soo zúlhtsꞌai! ꞋAwet nilhdukw whulohne netsudule ꞌanohtilelh. ꞋEt whe ootálhdzih. ꞋEt whunizyat dzin ꞌet dzoh nutihdeh. ꞋEt yaitahdlah whutsꞌun ꞌet nohba ꞌalha ꞌuhoontꞌoh zaꞌ hótꞌeꞌ. ꞋEt hukwꞌelha ꞌilhiz khutihnalh-un nohghá whuntasꞌalh. ꞋOn ꞌun whuchꞌa oonúlhde, ꞌet cha nohgha whútasꞌalh.
11Mbene ꞌuditsꞌone, Ndoni Yakꞌusda ba ꞌilhunaoodulhne, dája ꞌubulhni, ꞌenne huyoozólhtsꞌaiꞌ. Mbene la ꞌutꞌen ntsiꞌ-i chꞌaꞌ nilhdene, ꞌet dune whúlh nat dahútitsah-un, ꞌi be ꞌaw hundódah ꞌaitꞌoh.”
Keyoh Pergamos dune Yakꞌusda ba ꞌilhunaoodulhne, seꞌ ꞌutꞌen kꞌoh whulohkhun whula dihtni, sba budóniꞌ
12“ꞋEt keyoh Pergamos dune Yakꞌusda ba ꞌilhunaoodulhne bulizas ꞌen ootsꞌó kꞌeinges. Ndi ndudini:
Mbe la saluzti lhchꞌaz tsꞌe khundiyin-i ꞌutꞌi-un, ꞌen njan ndutni:
13Nohꞌeꞌutꞌen kꞌoh ꞌinkꞌez ntsꞌe whahtꞌi-un tꞌeoonuszun. Ndet Satan ookwꞌutsꞌuzda cho diztiꞌ-i ꞌusꞌai-un, ꞌet whahtꞌi. Sooziꞌ, ꞌi dutsoo cho oohtun. Ntsꞌe Satan whutꞌi-un ꞌinkꞌez ꞌoh daꞌ ndun Antipas huyúlhni-un, ꞌen sooziꞌ gha nohtoh hizilhghi. ꞋEt hoontsꞌi nohba ꞌalhaꞌ ꞌustꞌoh-un ꞌaw whutsꞌulhoodáhdlai.
14ꞋEt hoontsꞌi oolohkhun ꞌutsꞌun unꞌa sba ꞌahtꞌoh. Whulohne nohtoh Balaam ooghuni ꞌi huyoontun ꞌet huwa. ꞋEn ꞌuntꞌoh Balak hodalhꞌeꞌ. ꞋEn ꞌuja Israel ootsꞌu haindene whubodalhꞌeꞌ but ꞌukꞌeltsi gha tꞌaih-i, ꞌi huyooꞌalh ꞌinkꞌez ꞌuyoonne tsꞌekoo ꞌinkꞌez ꞌuyoonne dune bulh cha nintaꞌhootꞌih whe uboolhgooh hukwaꞌ ꞌutꞌen.
15Nohni nohtoh ꞌet cha Nicolas ooghuni oontunne hoonli. ꞋI tube ootsꞌu dusni whe ꞌuntꞌoh.
16Lhtꞌananahdilh! ꞋEt ndúlhahnel de khuntsul nohtsꞌun tisyalh ꞌinkꞌez saluzti szah hainꞌai, ꞌi be ndunne Nicolas unidulhne, ꞌenne buchꞌaz nedútasdalh.
17Mbe la ꞌuditsꞌone, Ndoni Yakꞌusda ba ꞌilhunaoodulhne, daja ꞌubulhni, huyoozólhtsꞌaiꞌ hubaꞌ hoontꞌoh. Mbene ꞌutꞌen ntsiꞌ-i yuchꞌaꞌ ꞌulhdene, ꞌenne ndi ꞌutꞌalh-i manna huyúlhni-i, ꞌi dune buchꞌa ntistꞌi-i, ꞌi whuloh bugha ítasꞌalh. ꞋInkꞌez tse dulyul-i cha bughá ntasꞌalh. ꞋInkꞌez ndi tse ookꞌut ꞌandidi ooziꞌ ꞌi ookꞌeitáguz. ꞋAw dune booziꞌ tꞌehinuszun. Ndun oogha ídiltsꞌut-un, ꞌen za tꞌeyuntázin.”
Keyoh Thyatira dune Yakꞌusda ba ꞌilhunaoodulhne, whulohne tube tankꞌus neꞌutꞌenne, ꞌenne sba budóniꞌ
18“ꞋEt Keyoh Thyatira dune Yakꞌusda ba ꞌilhunaoodulhne bulizas ꞌen ootsꞌó kꞌeinges. Njan ndudini:
Yakꞌusda ooYeꞌ oona ꞌantsꞌi kwun kꞌunꞌa tizdi doútꞌen ꞌinkꞌez ooke dulkꞌun tꞌeh unzoo-i doútꞌen, ꞌen ꞌutni:
19Nohꞌeꞌutꞌen tꞌenuszun, be lhkꞌetsꞌusiꞌ-i, ꞌuyoonne laꞌ ꞌahtꞌen, be nohba ꞌalha ꞌuhoontꞌoh-i, ꞌinkꞌez hoonli talhódahni. ꞋI ꞌutꞌen ꞌudechoo wheꞌ dahtꞌen-un ꞌandit ꞌon nus soo ꞌahtꞌen. ꞋI cha tsꞌiyawh tꞌenuszun.
20ꞋEt hoontsꞌi hoontsool-unyaz whe sba ꞌutsꞌun unꞌa ꞌahtꞌoh. Nyoon tsꞌeke Jezebel nus hóoꞌen naꞌdudútni. Hubodulhꞌeh ꞌinkꞌez seꞌ ꞌulhnane tankꞌus úbunilhtꞌi. ꞋUyoonne dune ꞌinkꞌez ꞌuyoonne tsꞌekoo bulh nintaꞌhootꞌih. ꞋInkꞌez ꞌukꞌeltsi gha tꞌaih-i huyooꞌalh hukwaꞌ bulhꞌen. ꞋEn tsꞌeke ꞌaw whuchꞌa lhnuzáhyoot.
21Ndun tsꞌeke ꞌuyoonne dune bulh nintaꞌutꞌih-un, ꞌet ꞌetsul ooneh dúsnih, ꞌet ꞌaw dudzi kꞌoh nalheꞌyilel.
22Soo zúlhtsꞌai, lili kꞌut duntidaꞌ-un oogha óotasꞌalh. Mbene la dune yulh nintaꞌutꞌihne, ꞌenne cha nduhútꞌen-un, ꞌaw lhtꞌanalhonidulh de, dzoh nodideh-un bugha óotasꞌalh.
23ꞋInkꞌez ndun tsꞌeke buzkeh cha ubutisghan. ꞋInkꞌez Yakꞌusda ba ꞌilhunaoodulhne, tsꞌiyawh tꞌehontázin, si ꞌustꞌoh dune bubeni toh ꞌinkꞌez budzi bet cha hoonli hukwꞌu nústa. ꞋInkꞌez ꞌilhughun ꞌahli whe nohꞌeꞌutꞌen kꞌoh huwa nohba ꞌukꞌelha whutiselh.
24ꞋEt hoontsꞌi nohni ꞌinkꞌez ꞌuyoonne Thyatira whutꞌenne, ndun tsꞌeke ooghuni lhuhuyóotun de, ꞌinkꞌez Satan be ꞌutꞌen ꞌukꞌenus yoo yo ꞌuntꞌoh-i, whuz unꞌa nduhutni, ꞌi cha tꞌehinúszun de, nohdusni, ꞌaw ꞌon ꞌun howa whúlnaꞌ-un nohgha lhótuzasꞌal.
25ꞋEt hoontsꞌi whusatísyalh whutsꞌun, ndai ꞌutꞌen unzoo-i ꞌulhꞌen-i soo cho oohtun.
26Mbene la ꞌutꞌen untsiꞌ-i yuchꞌaꞌ ꞌulhdéhne ꞌinkꞌez ꞌudekꞌez whutsꞌun seꞌ ꞌutꞌen huyoontun de, ꞌenne lhelhdun keyoh whutꞌenne bumoodih hutileh-un, ꞌet bugha óotasꞌalh.
27Nduntꞌoh-un lhuztih tuz be ꞌusbai kꞌunꞌa butso nutíyalh ꞌinkꞌez lhentlꞌus oosaꞌ ꞌi kꞌunꞌa yanúbutiyuz. Whuz unꞌa ꞌet bughu tisdleh.
SBá si cha whuz unꞌa stlꞌa hónꞌai. 28ꞋInkꞌez bundadaꞌ sum cha oogha yúntasꞌalh.
29Mbe ꞌuditsꞌone, Ndoni Yakꞌusda ba ꞌilhunaoodulhne, dája ꞌubulhni, ꞌen huyoozólhtsꞌaiꞌ.”
Currently Selected:
Revelation 2: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.