Matthew 25
25
Whunizyane tꞌedukoo dune tꞌenuszunne, kwulane, huwhunih ꞌinkꞌez kwulane, ꞌenne huwhusni
1“Yakꞌuz ntsꞌe la lerwe usda-un ndi yun kꞌut whusahóoltsꞌut de, ꞌet whuz unꞌa ndó tanelh: whunizyane tꞌedukoo dune tꞌenuszunne, ndi kwun be hootꞌen-i huyilhchoot ꞌinkꞌez dune ꞌat titꞌelh-un ꞌaz hiba sulhꞌi. 2Kwulane, ꞌenne huwhunih ꞌinkꞌez kwulane, huwhusni. 3Ndunne whusnine too dizkꞌun hutꞌi ꞌet hoontsꞌi too dizkꞌun hiye náhitilhdzoh-i hiyit ꞌuja. 4ꞋEt hoontsꞌi whunihne too dizkꞌun denáhitilhdzoh-i cha hutizdla. 5ꞋEt ꞌat titꞌelh-un saꞌ whusalhusyaih, ꞌinkꞌez tsꞌiyawh bulh bukꞌé diltsꞌut, whe nahunistez.
6Tuzniz ꞌilhoghun huyih, ‘ꞋAwet ꞌat titꞌelh-un ꞌaz de yalh. Tenahdilh ꞌinkꞌez oodudíhdilh!’
7ꞋEt tꞌedukoo tsꞌiyawh dahudindil ꞌinkꞌez too dizkꞌun-i tsꞌiyawh nahidulhkꞌan. 8ꞋInkꞌez whusnine hubuhutni, ‘Too dizkꞌun negha núlhdzeh, netoo dizkꞌun ꞌawet bé haꞌ dukꞌaih!’
9ꞋEt whunihne, ‘ꞋAwúndooh!’ hutni ‘Nohgha uznilhdzo de, nohni cha ꞌinkꞌez wheni cha ꞌaw neba soo lhéꞌiltsuk. ꞋEt hoontsꞌi ꞌeꞌóoket tsꞌe whuz ꞌahdulh, ꞌinkꞌez nohnichꞌoh oohket.’
10Whuz whehandil whe ꞌat titꞌelh-un bukꞌelhꞌo whusaínya. ꞋInkꞌez yuba lhadintꞌohne, naꞌhutitꞌulh tsꞌe huyúlh danindil, ꞌinkꞌez dati dánahidintan.
11ꞋEt hukwꞌelhꞌaz tꞌedukoo whusnine whusanáhidil whe, ‘NeMoodih, nemoodih, neba dáhanaꞌdintih!’ huyulhni.
12ꞋEt ndúbulhni, ‘ꞋAlhaꞌ ꞌaw tꞌenohnuzúszun!’
13ꞋInka nohni cha soo cho huwahli! Ndet dzin ꞌinkꞌez ntsꞌoya hoozulh whe Yinka Dune Yeꞌ whusatiyalh, ꞌaw tꞌeoonuzahzun.”
Dune dude ꞌulhnane, yutꞌi-i, ꞌi butlꞌa yánla, ꞌet yakꞌuz lerwe usda-un ndultꞌoh be nawhutnuk-i
14“Yakꞌuz lerwe usda-un, ꞌet ndó tanelh: dune dukeyoh huwu tiyalh. ꞋEt tiyalh whutso dude ꞌulhnane ꞌanih ubudaniꞌ. Ndai la yutꞌi-i butlꞌa yánla. 15ꞋIlhoghun kwulaiꞌ sooniya diztiꞌ-i yutlꞌa inla. ꞋIlhoghun cha nanki sooniya diztiꞌ-i yutlꞌa inla. ꞋEt ꞌuyoon ꞌilho za yutlꞌa inꞌai. ꞋIlhone hinli whe hoonzoo hukwꞌunꞌa hiye whutilelh, ꞌet wheni butlꞌa yánla. 16ꞋEt hukwꞌelhꞌaz ꞌawet whinya. ꞋEt ꞌilhoghun kwulaiꞌ yutlꞌa inla-un, ꞌon ꞌun kwulaiꞌ ꞌuniltsuk-i yeꞌ ꞌínla. 17ꞋEt whuz unꞌa za ꞌilhoghun nanki yutlꞌa inla whe nanki ye yúba naꞌyinla. 18ꞋEt hoontsꞌi ꞌilhoghun ꞌilho za yutlꞌainꞌai-un, yun ha hónkai ꞌinkꞌez whuz dumoodih oozooneya yuntilhꞌi.
19ꞋEt hukwꞌelhꞌaz saꞌ inleꞌ whe ꞌulhnane bumoodih whusanaja. ꞋInkꞌez nahootáꞌalh hukwaꞌ ninzun dude ꞌulhnane dahúyinla. 20ꞋEt kwulaiꞌ yutlꞌa inla-un, kwulaiꞌ be ꞌon ꞌun ꞌuniltsuk-i, ꞌi yuba whusanáyanla. ꞋEt ndúyulhni, ‘Smoodih kwulaiꞌ sooniya diztiꞌ-i stlꞌa inla. Nah! Nilhꞌen kwulaiꞌ be ꞌon nus mba be naꞌusdla.’
21ꞋEt oomoodih ndúyulhni, ‘Tube soo ꞌinja! Nyun tube ꞌinzoo. Whunilhchoh whe kꞌuneꞌ nyutisꞌen. Tube ꞌulhna-un unzoo-un inli. Hoontsool-unyaz whe kꞌuneꞌ nyutisꞌen inleꞌ. ꞋAndit nꞌun whe lhai ghu tanleh. ꞋAnih, nyumoodih ye hoontꞌiꞌ-i, nyun cha be hóotantꞌeꞌ.’
22ꞋEt ꞌilhoghun nanki sooniya diztiꞌ-i yutlꞌa inla-un, ꞌen cha whusainya. ꞋEt ꞌúyulhni, ‘Smoodih nanki sooniya diztiꞌ-i stlꞌa inla. Nah! Nilhꞌen nanki be ꞌon nus mba naꞌusdla.’
23Oomoodih ndúyulhni, ‘Tube soo ꞌinja! Nyun tube ꞌinzoo. Whunilhchoh whe kꞌuneꞌ nyutisꞌen. Tube ꞌulhna-un unzoo-un inli. Hoontsool-unyaz whe kꞌuneꞌ nyutisꞌen inleꞌ. ꞋAndit nꞌun whe lhai ghu tanleh. ꞋAnih, nyumoodih ye hoontꞌiꞌ-i, nyun cha be hóotantꞌeꞌ.’
24ꞋEt ꞌilhoghun ꞌilho sooniya diztiꞌ yutlꞌainꞌai-un whusainya ꞌinkꞌez uyúlhni, ‘Smoodih tꞌeoonuszun nyun ꞌaw tꞌelheꞌnínzun-un ꞌintꞌoh. Ntsꞌe la ꞌalheꞌ nuzinloh-un ꞌet hoontsꞌi ꞌet naꞌilhdzooh. Ndet la ha níyeh ꞌulheꞌnínlel-un ꞌet hoontsꞌi haꞌ ninlih. 25Whenuzjut ꞌet huwa ndi sooniya diztiꞌ yun yo tsꞌe ntísꞌiꞌ. Nah! Nilhꞌen ndi stlꞌainꞌai-i ntlꞌa násꞌaih.’
26ꞋEt oomoodih yulhni, ‘Nyun intsiꞌ ꞌinkꞌez tsedutni-un ꞌulhna ꞌintꞌoh. Tꞌeooninzun ntsꞌe la ꞌalheꞌ nuzusdloh-un, ꞌet hoontsꞌi ꞌet cha naꞌusdzooh. ꞋInkꞌez ntsꞌe la ha níyeh ꞌulhnúsdlel-un, ꞌet hoontsꞌi ꞌet cha haꞌ nusdle. 27ꞋEt huwa ndi uszooneya ntlꞌasꞌai-i, sooniya lhkꞌenadaꞌaihne, ꞌenne butlꞌa lhizinꞌai. ꞋEt daꞌ szooneya ꞌon nus ꞌuniltsuk-i be náꞌoozneh ooleꞌ daꞌ.’
28ꞋEt huwa ꞌubulhni, ‘Ndun ndi uszooneya diztiꞌ-i, ooghu nayulhchoot. Whunizyai sooniya diztiꞌ-i yutꞌi-un, ꞌen oogha ínahꞌaih. 29ꞋEt mbe la yuloh za ꞌutꞌi-un, ꞌen ꞌon nus lhai oogha tíltsꞌulh ꞌinkꞌez ꞌonus lhai titꞌelh. ꞋEt hoontsꞌi mbe la ntsool-iyaz ꞌutꞌi-un, ꞌi hoontsꞌi ooghu nayitálchulh. 30ꞋEt ndun ꞌulhna-un ntsiꞌ-un, ulhchoot ꞌinkꞌez ꞌaz tsaholhgus yo tsꞌe táhneh.’ ꞋEt whe la tso bulh dughoo lhudookꞌus si.”
Yinka Dune Yeꞌ whusanátidalh de, yinka duneꞌne, tsꞌiyawh buba nahutiyeh
31“ꞋEt Yinka Dune Yeꞌ nkede ootsꞌu haꞌ ꞌánduz whe whusanátidalh, lizas lubeshi ooghu hoolohne, tsꞌiyawh huyulh whusanátidulh. ꞋOh de de, ookwꞌutsꞌuzda cho diztiꞌ-i, ꞌi kꞌut nanátlꞌa dutidalh. 32Yinka duneꞌne, tsꞌiyawh hibut ꞌilhunabuhootálelh. ꞋUsbai ghunli-un kꞌunꞌa ꞌusbai, dube tahanaítilelh, ꞌet whuz unꞌa ndó tanelh. 33ꞋUsbaiyaz nailhni tsꞌunkꞌus nebutalelh. ꞋEt dube ꞌintlꞌus tsꞌunkꞌus nebutalelh.
34ꞋEt lerwe nailhni tsꞌunkꞌus ꞌuntꞌohne ndubudutanelh, ‘Nohni ꞌuBá ꞌukꞌenus hoonzoo-un nohghá whultsꞌutne ꞌahli. ꞋEt huwa ꞌanih! Yun ꞌutilnelh whutso, lerwe yakꞌuz úsda-un, ꞌet nohba lhaoodinla, nohgha óotaltsꞌulh. 35Syeꞌíltsꞌul whe tisꞌulh-i sgha náhꞌai. Taꞌoosda whe tisnelh-i sgha náhkai. ꞋUtsꞌun whútꞌen-un usdli ꞌinkꞌez nohyoh tsꞌe dásunulhti. 36Naih lhústꞌi whe ꞌenásalhti. Ndusda whe stsꞌun nusahdil. ꞋAdusꞌai whe stsꞌun nusahdil.’
37ꞋInkꞌez tsꞌihꞌun ꞌuntꞌohne huyoodutalhkut, ‘NeMoodihti nkedaꞌ nye ꞌíltsꞌul whe ntsꞌu yanꞌen ꞌinkꞌez tanꞌulh-i ngházninꞌaih? ꞋInkꞌez taꞌóonda whe tantnelh-i nghá uzninkai? 38Nkedaꞌ ꞌutsꞌun whútꞌen-un inli whe dántsꞌinilhti inleꞌ? Kꞌus naih lhintꞌiꞌ whe naih ngházninla inleꞌ? 39Nkedaꞌ ndinda whe ntsꞌinálhꞌen kꞌus ꞌadinꞌai whe ntsꞌun nutsꞌuzdil inleꞌ?’
40ꞋEt lerwe njan ndúbudutanelh, ‘Ꞌalha ꞌi be nohdusni, ndunne sulhutsinke, ꞌaw nchane lhiloh, ꞌenne ꞌilhoghun hoontsꞌi whuz unꞌa ꞌet ndúbahla de, si ꞌusáhla wheꞌ hoontꞌoh.’
41ꞋEt ꞌawet ꞌintlꞌus tsꞌunkꞌus ꞌuntꞌohne njan ndubudutánelh, ‘Ndai la Yakꞌusda ye hunilchꞌe-i nohbulh ꞌuntꞌohne suhliꞌ! Schꞌa nasahdilh! Ndi kwun ꞌaw nalhnusne-i netsudule dulizasne te buba ꞌuhóolya-un, whuz ꞌahdulh! 42Syeꞌíltsꞌul inleꞌ ꞌet hoontsꞌi ꞌaw tisꞌulh-i sgha lhahꞌal. Taꞌóosda ꞌet hoontsꞌi ꞌaw tisnelh-i sgha lhahkal. 43ꞋUtsꞌun whutꞌen-un usdli, ꞌaw dasúlhulhtel. Be oosdaꞌ-i hooloh whe naih sgha lhahlel. Ndusda whe ꞌinkꞌez ꞌadusꞌai-i whe ꞌaw stsꞌun nulhahdulh.’
44ꞋEt njan ꞌuhidutanelh, ‘NeMoodihti nkeda daꞌ ntsꞌu yanꞌen whe nye ꞌiltsꞌul ꞌinkꞌez taꞌoonda? Kꞌus ꞌutsꞌun whutꞌen-un inleꞌ, kꞌus be dune ꞌonleꞌ-i lhíntꞌiꞌ? Kꞌus ndinda ꞌinkꞌez ꞌadanꞌaꞌ? ꞋEt whuz unꞌa ntsꞌu yanꞌen ꞌet hoontsꞌi ꞌaw hoonli whe nlalheꞌtsꞌínel dini?’
45ꞋEt budutanelh, ‘Ꞌalha ꞌi be ꞌunohdusni, sulhutsinke ꞌaw ncha lhilohne, ꞌaw ꞌilhoghun hoontsꞌi whuz unꞌa lhebáhlel. ꞋEt huwa si cha ꞌaw ndusúlhahlel leꞌ hoontꞌoh.’
46ꞋEt nduntꞌohne, ꞌilhiz wheni dzoh nuhutideh tsꞌe hutidulh. ꞋEt hoontsꞌi tsꞌihꞌun ꞌuntꞌohne, ꞌilhiz whe tsꞌukhuna-un bugha óotakulh.”
Currently Selected:
Matthew 25: crx
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
