John 16
16
Sizi yugha hodulꞌehne yununúdilhne hinli, ꞌet huwa ndi yun kꞌut whutꞌenne dzoh nubotilhdeh-un, ꞌet huwun ubúlhni
1Sizi ꞌet ꞌon ꞌun ꞌubulhni, “Nohba ꞌalha ꞌuhoontꞌoh-un doo ka si whula doohtnih, ꞌinka ꞌunohdúsni. 2Lugliz whuchꞌa nóhjoot la. ꞌEt ꞌawet ꞌoh de whuz de whudizulh, ꞌet de la mbe la nohzilhghi-un Yakꞌusda ba ꞌuhutꞌen untizilh. 3Si ꞌinkꞌez sBá bulh tꞌénehunúszun ꞌet huwa la ꞌoh te neꞌnohohoolhꞌen. 4ꞌEt ꞌudaꞌ nohdásniꞌ, ꞌawet ꞌoh te neꞌnohohulhꞌen de, ꞌet la whunaoolhnih. Nohbulh ꞌustꞌen inleꞌ ꞌet huwa ꞌaw lhunoh dusnel.
5ꞌAndit mbe la whuz de sútilhꞌaꞌ-un, ꞌen ootsꞌun nátisdalh, ꞌet hoontsꞌi ꞌaw ꞌilhoghun nohtoh ntsꞌe tisyalh-un hukwa sulhooduzulhkut. 6ꞌEt njan nohdúsni, ꞌet huwa nohdzi tsꞌodi be dizbun, 7ꞌet hoontsꞌi khuni ꞌalhaꞌ ꞌuntꞌoh-i nohdusni, nohghu natisdalh-un, ꞌet nohni nohba hootázooꞌ. ꞌAw whenálhusdal de, nohLaꞌutꞌen-un ꞌaw nohtsꞌun tooyaꞌ ꞌaítꞌoh. Whenásja de, ꞌet de ꞌen nohtsꞌun tísꞌalh. 8Whusaínya de, bubeni toh dizꞌai-i gha la yinka whuduneꞌne lubeshi ꞌulhꞌenne hinli tꞌéhonózin. ꞌInkꞌez ndai la tsꞌihꞌun ꞌuntꞌoh-i ꞌinkꞌez Yakꞌusda ye náhizya-i cha ꞌi ghun tꞌéhonózin. 9Si sghun ꞌaw buba ꞌalhaꞌ lheꞌhóotꞌoh ꞌet huwa la lubeshi ꞌulhꞌenne hinli tꞌewhunoolhzeh. 10ꞌInkꞌez ndai tsꞌihꞌun ꞌuntꞌoh-i#16:10 Sizi Gri ꞌen cha tsꞌihꞌun ꞌuntꞌoh, ꞌet cha bubutꞌewhunoolhzeh. cha tꞌewhunoolhzeh. SBá ootsꞌun nátisdalh ꞌinkꞌez ꞌaw ꞌon ꞌun soohꞌen ꞌaítꞌoh ꞌet huwa. 11ꞌInkꞌez ndi be náhudeh-i, ndi yun kꞌut humoodih-un#16:11 Ndi yun kꞌut humoodih, ꞌen netsudule ꞌuntꞌoh. ꞌudaꞌ ooba nahisda ꞌet huwa.
12ꞌAwhuz tube lhat-un nohdutásnelh-un whuzꞌai, ꞌet hoontsꞌi ꞌandit ꞌaw whulh óohyin, ꞌaítꞌoh. 13ꞌEt Ndoni, ndun khuni ꞌalhaꞌ ꞌuntꞌoh-i ootsꞌu haídultsꞌit-i, ꞌen nohyudánde de, ꞌen la ndi khuni ꞌalhaꞌ ꞌuntꞌoh-i, noheni toh neídoꞌalh. ꞌEt ndi ꞌi be ꞌutꞌen ꞌuntꞌoh; ꞌaw didutchꞌoh dughuni be iloh nohbulh yátilhduk, ndet la whudántsꞌo-un, ꞌet za whunoh untilhtun, ꞌinkꞌez ntsꞌoh te la neꞌwhutitꞌen-un, ꞌet cha tꞌewhunáhzun nohtilhtselh. 14Seꞌ ꞌutꞌen kꞌoh tsꞌiyawh hootálhchulh ꞌinkꞌez whunóhuntilhtun, ꞌet whe la si sba whudólhtiꞌ. 15Tsꞌiyaitsuk ndai la sBá oochꞌeꞌ yinli-i, ꞌi si schꞌeꞌ ꞌuntꞌoh. ꞌInka ꞌunohdúsni Ndoni ꞌen ndai la seꞌ ꞌutꞌen kꞌoh unli-i, tsꞌiyawh itálhchulh ꞌinkꞌez yunóhuntilhtun.
16ꞌAwet sBá ootsꞌu nátisdalh ꞌet huwa ꞌudusni dzoh saꞌyaz inleꞌ de, ꞌet ꞌaw soohꞌen ꞌaítꞌoh. ꞌEt doo cha dzoh saꞌ inleꞌ de, ꞌet sutihꞌelh,” ubúlhni.
17ꞌEt yugha hodulꞌehne didutchꞌoh lhuhoodulkut, “Ndi khuni ye nébulh yalhduk-i lheꞌutni, ‘SBá ootsꞌu nátisdalh,’ ꞌinkꞌez, ‘Dzoh saꞌ inleꞌ de, ꞌet ꞌaw soohꞌen ꞌaítꞌoh. ꞌEt doo cha dzoh saꞌ inleꞌ de, ꞌet sutihꞌelh.’ ꞌI daja ni whe ꞌutni?” 18ꞌEt ꞌon ꞌun cha ꞌuhutni, “Njan dzoh saꞌ inleꞌ de ní-un, ꞌet daja ni whe ꞌutni? Wheni ꞌaw tꞌetsꞌonúszun.”
19ꞌEt Sizi hukwa huyoodutalhkut hukwaꞌ huninzun, ꞌudaꞌ tꞌéwhunínzun ꞌinka ndubúlhni, “Nohdásniꞌ dzoh saꞌ inleꞌ de, ꞌet ꞌaw soohꞌen ꞌaítꞌoh. ꞌEt doo cha dzoh saꞌ inleꞌ de, ꞌet sutihꞌelh. ꞌEt eh nohnichꞌoh nohtoh hukwa lhoodulhkut? 20Soo tsꞌihꞌun unꞌa nohdúsni, tihtso ꞌinkꞌez ꞌon ꞌun cha tube skꞌe nitihleh, ꞌet hoontsꞌi yinka whuduneꞌne hontálhni. Nohni tube tsꞌodi tihleh, ꞌet hoontsꞌi ntsꞌodi-i bé hoonahtꞌiꞌ-i tileh. 21ꞌEt whuz unꞌa tsꞌeke ooyaz whutáleh-un, ꞌen kꞌunꞌa ꞌet ndúhoontꞌoh. ꞌAwet be nghoh whudizulh te, whuchꞌa ní unli lhih. ꞌEt ooyaz whulih te, yé ndidaꞌ-i yunaoodulnoh, tsꞌoodun yinka nenílhti ꞌinka tube hóontꞌiꞌ. 22ꞌEt whuz unꞌa za nohni ꞌandit tsꞌodi ꞌahli, ꞌet hoontsꞌi nanohtistꞌelh ꞌinkꞌez nohdzi hóotatꞌeꞌ, ꞌinkꞌez be hóonahtꞌiꞌ-i ꞌaw nohghu ha yólhchoot aitꞌoh. 23ꞌEt dzin de, ꞌaw hoonli stsꞌu kaꞌ doohniꞌ aitꞌoh. Soo tsꞌihꞌun unꞌa nohdúsni, sBá si sooziꞌ gha hoonli ootsꞌu hukwaꞌ dahni de, nohgha ítaꞌalh. 24ꞌAndit whutsꞌun si sooziꞌ gha ꞌaw ootsꞌo hukwaꞌ dahní-un hooloh. ꞌEt sBá oodulhkut, ꞌet la nohgha whútaltsꞌulh, ꞌinkꞌez ꞌet la be tsꞌoohoontꞌiꞌ tihtꞌelh.”
“Ndi yun kꞌut humoodih, ꞌinkꞌez be ꞌutꞌen kꞌoh cha, tsꞌiyawh oochꞌaꞌ nus de,” ni Sizi
25“Whutsodaꞌ ꞌudadaꞌ oogha lhoohoolnaꞌ-i be ndi khuni nohdusni inleꞌ. ꞌEt hoontsꞌi whuz de hóoltsꞌulh, ꞌudadaꞌ be iloh ꞌudutisnelh. SBá ꞌen ooghun soo tsꞌet khuni ꞌi be nohdutasnelh. 26ꞌEt neóodinzut de, sooziꞌ cha hoonli haꞌ dutihnelh ꞌinkꞌez ꞌaw sBá tsꞌun nohba tenadusdli lhduztinelh, nohnichꞌoh si sooziꞌ gha oodulhkut. 27Nohni skꞌehtsiꞌ ꞌet huwa sBá didutchꞌoh nohkꞌentsiꞌ, ꞌinkꞌez Yakꞌusda tsꞌun hasya ꞌet nohba ꞌalha ꞌuhoontꞌoh. 28SBá ꞌen ootsꞌu hásya whe ndi yun kꞌut nenúsya. Doo cha ndi yun kꞌut whuchꞌa natisdalh ꞌinkꞌez sBá ꞌen ootsꞌu nátisdalh,” ubúlhni.
29ꞌEt yugha hodulꞌehne ꞌuhuyúlhni, “ꞌAndit ꞌawet tsꞌet khuni be nebulh yaílhduk, ꞌaw ꞌudadaꞌ khuni be iloh ꞌudini. 30ꞌAndit ꞌawet tꞌetsꞌonínzun soo tsꞌiyantsuk ꞌet tꞌéwhúnínzun ꞌet huwa ꞌaw ꞌon ꞌun ntsꞌu yoodolhkut ꞌaítꞌoh. ꞌEt huwa Yakꞌusda ootsꞌun hainya neba ꞌalha ꞌuhoontꞌoh.”
31ꞌEt Sizi ꞌubulhni, “Soo eh nohba ꞌalha ꞌuhoontꞌoh? 32Nulhꞌen whuz de whúdizulh-un ꞌawet ꞌet néwhudinzut, ndet la ꞌilhone ꞌahli whe yanaitáhdulh ꞌinkꞌez nohnichꞌoh ꞌutihtꞌelh. Si cha sichꞌoh úsdli whe sghu tihdulh, ꞌet hoontsꞌi ꞌaw sichꞌoh iloh ꞌustꞌoh, sBá ꞌen sulh ꞌúntꞌoh ꞌet huwa.
33ꞌAndit njan ꞌet huwun ndi khuni ꞌi be nohbulh yásduk, daja nohdásniꞌ la, ꞌet huwa la be nedzi be dizghel-i oohtꞌeꞌ. Ndi yun kꞌut nohehútizilalh, ꞌet hoontsꞌi hóhtꞌeꞌ, ndi yun kꞌut humoodih ꞌinkꞌez be ꞌutꞌen kꞌoh cha, tsꞌiyawh oochꞌaꞌ nus de ꞌet huwa.”
Currently Selected:
John 16: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.