John 10
10
Jesus hubodulhꞌeh whe ꞌutni, “Si ꞌusbai ghunli-un ꞌustꞌoh. Mbene la soo sulh ꞌútꞌenne, seꞌ ꞌusbai hinli”
1ꞋEt Jesus ubúlhni, “Soo tsꞌihꞌun unꞌa nohdusni, mbe la ꞌusbai ba naꞌnistlꞌóo-un ꞌaw dáti kꞌet dálhiyal ꞌinkꞌez nanistlꞌoo tus tilhget de, ꞌen dune ꞌundunutꞌíh-un ꞌuntꞌoh. 2ꞋEt mbe la dáti tsꞌe dayaih-un, ꞌen ꞌusbai ghunlí-un ꞌuntꞌoh. 3ꞋEn dáti ghunli-un yuba daháꞌ dutih. ꞋEt de ꞌusbai, bubooziꞌ be buka huyih te, hiditsꞌo huwa tꞌehinínzun ꞌinkꞌez ꞌaz huyuntulhꞌus. 4Tenábulih hukwꞌelhꞌaz, ꞌet butso tuyaih ꞌinkꞌez ꞌusbai tsꞌiyawh huyunilhꞌus, highuni tꞌehinínzun ꞌet huwa. 5ꞋEt ꞌantsꞌi ꞌoh nuya-un, ꞌen ꞌaw huyuntoolhꞌas ꞌaítꞌoh. ꞋAntsꞌi ꞌoh núya-un ꞌuntꞌoh ꞌaw ooghuni tꞌehinúszun ꞌet huwa hichꞌa nutselhdilh,” ꞌubulhni. 6ꞋEt Jesus ndi higha hódoolꞌeh ha bubulh náwhulnuk ꞌet hoontsꞌi daja ni whe ꞌutni-un ꞌaw tꞌehonúszun.
7ꞋInka doo cha za Jesus ꞌubulhni, “Soo tsꞌihꞌun unꞌa nohdúsni, Si ꞌusbai ba dáti usdli whe ꞌustꞌoh. 8Mbene la stso whusaíndilne, ꞌenne ꞌundunutꞌihne ꞌuhintꞌoh ꞌet huwa ꞌaw ꞌusbai lhuboozílhtsꞌai. 9Si datí ꞌustꞌoh. Mbene la si sgha daníndilne, ꞌenne tsꞌiyawh hudutijih. Dahúnindil ꞌinkꞌez whuz ꞌaz whe hándil de, tlꞌo kꞌut nahuhootáꞌalh. 10ꞋUndunutꞌih-un, ꞌen ꞌuduntitꞌih ꞌinkꞌez dune tuzilhghelh ꞌinkꞌez nintaꞌeꞌtilhꞌelh ꞌet wheni za dayaih. ꞋEt si whusásya whe ꞌilhiz wheni huye khúna-i hutitꞌelh ꞌinkꞌez ndi ꞌilhiz huye khúna-i, ꞌi huyutꞌi de, ꞌaw hoonli huye ndunódzit ꞌaítꞌoh.
11Si ꞌusbai ghunli-un unzóo-un ꞌustꞌoh. ꞋUsbai ghunli-un unzóo-un, ꞌen la ye khúna-i dude ꞌusbai ba yula dutitnih. 12ꞋEt ꞌustle-un ulꞌáꞌ-un, ꞌen ꞌaw ꞌusbai ghunlí-un iloh ꞌuntꞌoh. ꞋAntsꞌi ꞌusbai yugholeꞌ ha ulꞌaꞌ. ꞋUsbai ꞌaw oochꞌeꞌ iloh ꞌuhintꞌoh, ꞌet huwa yus whuz de úlgwulh yunilhꞌen te, ꞌusbai bula dutnih ꞌinkꞌez whetsélhyai. ꞋEt yus whulohne huboogooh ꞌet ꞌonghunne cha hichꞌa yaílwus. 13Ndun ꞌustle-un ulꞌáꞌ-un, ꞌen ꞌantsꞌi ulꞌáꞌ-un ꞌuntꞌoh, ꞌet huwa ꞌusbai ꞌantsꞌi hiba unli ꞌinkꞌez didut bughu whetsélhyaih.
14Si ꞌusbai ghunlí-un unzóo-un ꞌustꞌoh, mbene la uschꞌeꞌne tꞌebunúszun ꞌinkꞌez didut cha tꞌésonínzun. 15ꞋEt whuz unꞌa za sBá ꞌen tꞌésunínzun ꞌinkꞌez si cha tꞌenuszun. ꞋInkꞌez seꞌ ꞌusbaine be khúsna-i buba oola dutisnih. 16ꞋUyoo cha ꞌusbai ꞌustꞌí-i hoonli. ꞋAw ndi toh iloh. ꞋEnne cha whusáboosdlelh huba ꞌuhoontꞌoh. Sghuni hidótsꞌo, ꞌinkꞌez la ꞌilhoh ulhꞌus-i za hutileh ꞌinkꞌez ꞌilhoghun za ꞌusbai ghunlí-un whutáleh.#10:16 ꞋEt ndi ꞌudechoo ulhꞌús-i, ꞌi Israel ootsꞌu haindene ubúlhni. ꞋEt ndi ꞌuyoo ulhꞌús-i yughu yalhduk, ꞌi ꞌudun yun kꞌut whutꞌenne ꞌuhintꞌoh. ꞋEnne ꞌawhuz Jesus huyulhéꞌdustsꞌo ꞌet huwa ꞌaw buba ꞌalhaꞌ lheꞌyítꞌoh. 17Seꞌ ꞌusbaine ba be khúsna-i oola dutisnih ꞌinka be khúsna-i doo cha za naóozchoot. ꞋEt huwa la sBá tube skꞌensiꞌ. 18ꞋAw be khúsna-i dune sghu yólhchootne hooloh. Sichꞌoh za huwa tísꞌalh. Ndi be khúsna-i huwa tísꞌalh ꞌinkꞌez naitázchulh-un, ꞌet sghá whuntꞌai whe ꞌustꞌoh. SBá ꞌen ꞌuja ndi khuni stlꞌa ídanꞌai ndi ꞌutꞌen oosꞌen ha,” ubúlhni.
19Ndi khuni ꞌi gha doo cha Lizwifne dichꞌoh dutoh lhchꞌa hudisdil. 20Tube lhane, ꞌenne ꞌuhutni, “Ntsiꞌ-i nudúdeh-i ooyudínda! Whusni wheꞌ ꞌutni, di ha oozúlhtsꞌai?”
21ꞋEt ꞌonghohne cha ꞌuhutni, “ꞋAw ntsiꞌ-i nudúdeh-i ooyudínda-un, ꞌen ooghuni iloh ꞌutni. Ntsꞌenꞌa ntsiꞌ-i nudúdeh-i, ꞌi dune hoos̱ꞌen-un, ꞌen hooꞌen yutilhtselh?”
Lizwifne Jesus ꞌaw hikalheꞌnízun
22ꞋEt ꞌawet khit suliꞌ. Jerusalem keyoh ꞌet nowhújeh-un néhoninꞌai. ꞋEt ꞌawhundidi nahuwhulhtsi huwhútni.#10:22 ꞋEt njan nowhújeh-un, ꞌet la Lizwifne whunahulnih ꞌudaꞌyaz inleꞌ whe lugliz whucho, dune unsiꞌ-un danínya whe nintaꞌwhunílhꞌen. ꞋInka hukwꞌelhꞌaz Lizwifne ꞌawhundidi nahuwhulhtsi ꞌet huwa la dahóodulh ꞌinkꞌez Yakꞌusda tsꞌun téni ꞌuhunoolhzin ꞌinka. 23ꞋEt lugliz whucho bun tsilh tꞌah ꞌet la Solomon oobuntsilh tꞌah huwhútni, ꞌoh whéya Jesus uyalh 24whe la Lizwifne higha óozdil ꞌinkꞌez huyoodulhkut, “Dawhuldzoh ꞌet nechꞌa hóotalhꞌeꞌ. ꞋAlhaꞌ whe Christ ꞌen ꞌintꞌoh de, ꞌandit ꞌet tsꞌihꞌun unꞌa nedíni.”
25ꞋEt Jesus ubúlhni, “ꞋUdaꞌ nohdásniꞌ ꞌet hoontsꞌi ꞌaw nohba ꞌalhaꞌ lheꞌduzusni. Ndi sBá booziꞌ gha ꞌutꞌen ꞌusꞌén-i, ꞌi gha si sghun cha tꞌéwhunóhzin huba ꞌuhoontꞌoh. 26ꞋEt hoontsꞌi nohni nohdúsni hukwꞌunꞌa ꞌaw seꞌ ꞌusbai iloh ꞌahtꞌoh. ꞋEt huwa ndi ꞌutꞌen ꞌusꞌén-i ꞌaw nohba ꞌalhaꞌ lheꞌítꞌoh. 27Seꞌ ꞌusbaine tꞌébunúszun. Sghuni hiditsꞌo ꞌinkꞌez sunónudilh. 28ꞋIlhiz huye khútinalh-i, ꞌi bugha núsꞌai. ꞋAw yalhahitásdla ꞌinkꞌez ꞌaw dune sla kꞌéhaboolelhne hooloh. 29SBá, mbe la sghá buninla-un, tsꞌiyanne ando ꞌuntꞌoh, ꞌinkꞌez mbene la schꞌeꞌ suliꞌne, ꞌenne ꞌilhiz sulh ótitꞌelh. ꞋAw dune soo ꞌúltus-un hooloh sBá yula kꞌéhanabutilelh wheni. 30Si ꞌinkꞌez sBá bulh ꞌilho za ídli,” ubúlhni.
31ꞋEt doo cha za Lizwifne tse hiye hituzilhghelh-i hidílhchoot. 32ꞋEt Jesus ꞌubulhni, “SBá be ꞌutꞌen kꞌoh hoonzóo-un lhat-un si sgha whunulhꞌen. ꞋInkꞌez kꞌus ndet hukwa sutilhlelh tse be suzoolhghelh hukwaꞌ nahzun?”
33ꞋEt Lizwifne ꞌuhuyúlhni, “ꞋAw ꞌutꞌen unzóo-i, ꞌi ha iloh tse be ntsꞌu tuzilhghelh! Nyun ꞌantsꞌi ꞌoh dune inli ꞌinkꞌez Yakꞌusda chꞌaz yaílhduk. Nyunchꞌoh Yakꞌusda naꞌdudilꞌi, ꞌet hukwa tse be ntsꞌituzilhghelh.”
34ꞋEt Jesus ubúlhni, “ꞋAw lakw eh Yakꞌusda ooghuni oonalhuzulhni whe njan Yakꞌusda njan dunohúlhni inleꞌ, ‘Nohni yakꞌusdane ꞌahli?’ 35Tꞌétsꞌonínzun ꞌaw Yakꞌusda dughuni kꞌuyoyis ꞌaítꞌoh, ꞌinkꞌez mbene la Yakꞌusda ooghuni ooghi díltsꞌutne, ꞌenne yakꞌusdane ubúlhni. 36ꞋEt Yakꞌusda ooYeꞌ usdli nohdúsni-un, ꞌet whula gha tsꞌe Yakꞌusda chꞌaz yásduk dahni whe skꞌehoohꞌaih. SBá ꞌen ꞌudun nésunilhti whe ndi yun kꞌut tsꞌe sutilhꞌaꞌ. 37SBá be ꞌutꞌen lheꞌzusꞌen de, whute, nohba ꞌalhaꞌ lheꞌústꞌoh. 38ꞋEt hoontsꞌi sBá be ꞌutꞌen ꞌusꞌen de, ꞌaw si nohba ꞌalhaꞌ lheꞌustꞌoh hoontsꞌi, ndi ꞌutꞌen ꞌusꞌen-i, ꞌi gha nohba ꞌalhaꞌ ꞌuhotꞌeꞌ. ꞋI gha la noheni be tꞌéwhunóhzin ꞌinkꞌez nohba ꞌalhaꞌ ꞌuhótꞌeꞌ sBá ꞌen syudínda ꞌinkꞌez si cha ooyudúsda,” ubúlhni. 39ꞋEt doo cha za huyólhchoot hukwa ꞌuhuja whe Jesus butá ha nája ꞌinkꞌez buchꞌa níntaninya.
40Jordan koh nyaz tsꞌe ndet daꞌ John ꞌudechoo dune too be ꞌulhꞌen inleꞌ-un, whuz whe naja ꞌinkꞌez ꞌet indaꞌ. 41Lhane dune highu nindil ꞌinkꞌez ꞌulhodútni, “John ꞌaw huwa ꞌítꞌen te nulhéꞌitꞌel, ꞌet hoontsꞌi ndun dune ꞌen ghun daja daniꞌ la, tsꞌihꞌun ꞌudaniꞌ.” 42ꞋInkꞌez nyo ꞌet tube lhane buba ꞌálhaꞌ yintꞌoh suliꞌ.
Currently Selected:
John 10: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.