Hebrews 13
13
Ndi yun kꞌut lubeshi oochꞌaz nálhyeh
1Lhulhutsinke kꞌunꞌa lhkꞌehsiꞌ. 2Mbene whutsodaꞌ lhuzihꞌenne, hoonáhtꞌiꞌ whe nohyoh dáboohlelh. Whulohne lizasne tilah ꞌuhintꞌoh ꞌaw tꞌeoonuzahzun ꞌet huwa. 3Ndunne Jesus Christ unidulhne ꞌet huwa ꞌadinlane, bunalhnih ꞌinkꞌez bula oohtꞌen, ꞌenne bubulh ꞌadahla léꞌoohtꞌoh. Ndunne be zútlane, ꞌenne cha whuz unꞌa noheni toh ubulhdzun. Tsꞌiyawh ꞌilho yustꞌe zaꞌ tsꞌintꞌoh ꞌet huwa.
4Lhghuzdilhtsꞌí-un, tsꞌiyanne ba ꞌuhoontꞌoh, ꞌinkꞌez whudíztiꞌ. Lhghu dilhtsꞌine whuꞌiz whe dulili kꞌut duhutꞌen-un, ꞌaw lhuhóohtsiꞌ wheꞌ hoontꞌoh. ꞋEt hoontsꞌi mbe ꞌuyoonne tsꞌekoo kꞌus ꞌuyoonne dune bulh nintaꞌutꞌihne, ꞌenne Yakꞌusda buba nahutiyeh wheꞌ hoontꞌoh. 5Ndi yun dulhtsꞌi-un huwahli. Ndai ꞌandit ahtꞌi-i, ꞌon nus ꞌuyoo ka daoohtni junih. ꞋEt huwa neMoodihti njan ndutni,
“ꞋAw nohghu toosyaꞌ ꞌaitꞌoh,
ꞌinkꞌez nohla doosnih ꞌaitꞌoh.”
6ꞋInka nedzi ulhtus whé ꞌuzdooniꞌ,
neMoodihti ꞌen nela ꞌutꞌen-un ꞌuntꞌoh.
Dune danehulhꞌen ꞌet hoontsꞌi ꞌaw lhtsꞌunoolhjut.
Lhelhtsꞌun unꞌa hodulhꞌehne, ꞌenne bukꞌuneꞌ oohtꞌen junih
7Yakꞌusda ba ꞌilhunaoodulhne ndunne nohtso whudilhdzulhne, ꞌenne bunaoolhnih. Yakꞌusda ooghuni be nohbulh yáhalhduk. Ntsꞌenꞌa niz dakꞌez ndi yun kꞌut hudálhtsꞌiꞌ daꞌ bubulh dáhooja, ꞌet howu nuní noohzut. ꞋEnne hiye ꞌalhaꞌ ꞌuntꞌoh-i, ꞌi ookꞌunꞌa neꞌoohtꞌen. 8Jesus Christ ꞌen hulhdaꞌ, ꞌinkꞌez ꞌandit dzin cha, ꞌinkꞌez ꞌilhiz wheni, ꞌet za nduntꞌoh.
9Lhelhtsꞌun unꞌa ꞌinkꞌez hoontsiꞌ hukwꞌunꞌa dune hohodulhꞌeh, ꞌenne buboozólhtsꞌaiꞌ ꞌinkꞌez bukꞌuneꞌ oohtꞌen junih. Ndai lizwifne huyaꞌalh-i, ꞌi ꞌantsꞌi unli whe ꞌuntꞌoh. Mbene bukꞌunꞌa ꞌutꞌenne, ꞌaw bula ꞌeꞌwhudóneꞌ ꞌaitꞌoh. ꞋEt huwa ye unzoo-i, ꞌi be whuz unꞌa nedzi dizꞌai de, ꞌet de za tsꞌihꞌun ꞌuhoontꞌoh. 10Wheni Jesus Christ ooba ꞌalhaꞌ yintꞌohne ꞌuyoo loodel tsꞌutꞌi. ꞋInkꞌez loodel neba kꞌínkat-i, ꞌi tsꞌooꞌalh hubaꞌ hoontꞌoh. ꞋEt hoontsꞌi ndunne ndi yun kꞌut nimbali cho ootꞌah neꞌútꞌenne, ꞌaw huyooꞌalh ꞌaitꞌoh whuz unꞌa butlꞌa lhuhooltsꞌulh.
11ꞋEt lubret ꞌukꞌenus diztiꞌ-un khuna-i ꞌuzkaiꞌ, ndet ꞌukꞌenus whudiztiꞌ-un, lubeshi ba ꞌet whuz dainikai. Ndi khuna-i oozi, dune whutꞌi-un, yoo ꞌaz tsꞌe hidálhkꞌun. 12ꞋEt whuz unꞌa za Jesus keyoh whutꞌi whunanistlꞌoo datí-un whan ꞌaz tsꞌe ꞌet dzoh nuhuyulhdzut. ꞋEt whe dichꞌoh duduzkaiꞌ, ꞌi be Yakꞌusda ba ꞌudun nenéninla. 13ꞋEt huwa tsꞌuwhutꞌi-un whan ꞌaz tsꞌe, ntsꞌe Jesus Christ ꞌuntꞌoh-un, whuz ootsꞌuztoodilh. ꞋInkꞌez yooya huyulhtsi-un, wheni cha tsꞌuhólhchoot. 14Ndi yun kꞌut ꞌaw keyoh ꞌilhiz ꞌuwhutatꞌelh-un neba hooloh wheꞌ hoontꞌoh. ꞋEt hoontsꞌi keyoh ꞌilhiz ꞌuwhutatꞌelh-un, whuz de hóoltsꞌulh, ꞌet za hukwa tsꞌitóꞌen.
15ꞋEt huwa Jesus Christ booziꞌ gha ꞌahoolyiz Yakꞌusda musi uzdóniꞌ. Whuz unꞌa Yakꞌusda uzdólhtiꞌ. 16ꞋEt hoonzoo-un ꞌuwhulhꞌen ꞌinkꞌez tsꞌiyawh ꞌalhgoh lhla ꞌahtꞌen, ꞌet khun whunaoodoolhnoh junih. ꞋEt whuz unꞌa Yakꞌusda gha whutꞌaih-un, tsꞌiyawh ꞌet tube hóontꞌiꞌ.
17Nohtsó whudilhdzulhne, ꞌenne bukꞌuneꞌ oohten ꞌinkꞌez butlꞌáꞌ dudoolhyelh. ꞋEnne nohzul nohba yughunline ꞌuhintꞌoh ꞌet huwa. ꞋInkꞌez ntsꞌenꞌa nohba highunli, ꞌet whuz unꞌa Yakꞌusda but nohba hutiyin. Soo tsꞌihꞌun unꞌa newhúnahꞌaih, dahtꞌen-un, ꞌet huwa ndunne whutso whudilhdzulhne huhótꞌeꞌ whe Yakꞌusda ba nohghú hooleꞌ hubaꞌ hoontꞌoh. Khun te nohni nohgha khunani hoodleꞌ junih. ꞋEt ndahtꞌen de za, ꞌet de za nohba hootázooꞌ.
Neba tenadoohdli
18Neba tenadoohdli. Tsꞌihꞌun unꞌa tꞌetsꞌoninzun neyo tsꞌe oogha tꞌetsꞌoninzun-i ꞌaw hoonli-unyaz hoontsiꞌ-un whughu hooloh. Whuz unꞌa za tsꞌuhootátun hukwa ꞌuzninzun. 19ꞋEt ꞌon ꞌun cha nohtsꞌu tédusdli, sba tenadoohdli, ꞌet de ꞌaho Yakꞌusda nohtsꞌó tlꞌa nasoolhtelh.
Ye unzoo-i nohbulh óohtꞌeꞌ
20ꞋAwet Yakꞌusda be nedzi dizghel-un ootꞌeꞌ negha óoninꞌai-un, ꞌen neMoodihti Jesus Christ buzkaiꞌ be neba nadíltꞌiꞌ-i, ꞌet huwa yaidlane toh dunaidilhti. ꞋEn ꞌusbai ghunli ncha-un ꞌuntꞌoh. ꞋInkꞌez ndi ꞌuskaiꞌ ꞌi be ꞌilhiz wheni khuni neba lhaídinla-i whe ꞌuntꞌoh. 21Yakꞌusda ookꞌuneꞌ ootꞌen nohoolhtselh whe nohba tenadutisdli. ꞋEt whe Yakꞌusda ntsꞌenꞌa nohtsꞌu hukwaꞌ ninzun-un, ꞌet tsꞌiyawh ooba ꞌoohooleh. ꞋInkꞌez ndai Yakꞌusda Jesus Christ be ꞌet nohba ꞌuwhulhꞌen-un, ꞌet ꞌuhóonla de, ꞌet whunílhcho whe hootátꞌeꞌ. ꞋEn za ꞌilhiz wheni ooba tsꞌodólhtiꞌ. ꞋEt ndo honeh.
22ꞋEt sulhutsinke, soo cho nohtsꞌu tédusdlih ndi khuni ꞌi be nus nóohtꞌi, ꞌi tsꞌiyawh soo cho oozólhtsꞌaiꞌ ꞌinkꞌez nohba ꞌalha ꞌootꞌeꞌ. ꞋEt hoontsꞌi ꞌaw lhat-un ꞌukꞌelhúwhusgus.
23Neulhutsin Timothy ꞌadinꞌai-un ꞌawet tenánja ꞌet tꞌewhunoohzeh hukwaꞌ nuszun. Whusanája de, ꞌen bulh nohtsꞌúntatꞌus.
24Nohtso whudilhdzulhne cha, ꞌinkꞌez Yakꞌusda oochꞌeꞌne, ꞌenne cha sba hadih budóhni. Yun kꞌut Italy whutꞌenne, ꞌenne cha hádih nohuhútni.
25Yakꞌusda ye unzoo-i nohbulh ootꞌeꞌ nohba hukwaꞌ nuszun. ꞋEt ndo honeh.
Currently Selected:
Hebrews 13: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.