Galatians 5
5
Christ ye nékꞌunꞌa ꞌanꞌoh-i, ꞌi be ꞌet whuz unꞌa nelanaditni. ꞋEt whe whulh núdolhyaꞌ
1ꞋEt huwa ndi Christ ye nékꞌunꞌa ꞌanꞌoh-i, ꞌi be ꞌet whuz unꞌa nelanaditnih. ꞋEt soo cho whulh núdolhyaꞌ. ꞋAw ꞌon ꞌat ꞌulhnane kꞌunꞌa oolhghel junih.
2Soo zulhtsꞌai. Si Paul njan nohdusni, ꞌet nohni ooka dune ꞌahli-i kꞌut nohotitꞌus de, ndet Christ nohba ꞌuhoonla-un, ꞌaw hoonli nohba lhuhóoloh tileh. 3Doo cha za whunoh untistun. Mbe la dune yuka dune unli-i kꞌut huyuztꞌus de, ꞌet nduntꞌoh dune, ꞌen Moses be ꞌudustlꞌus, ꞌi tsꞌiyawh yukꞌuneꞌ ootꞌen hubaꞌ hoontꞌoh. 4Nohni ndi Moses be ꞌudustlꞌus ꞌi be Yakꞌusda nalh tsꞌihꞌun unꞌa oohtꞌeꞌ hukwaꞌ ꞌahtꞌen de, ꞌet de Christ oochꞌa nasulhye whe ꞌahtꞌen. Ye unzoo-i, ꞌi cha oochꞌa sahkat whe ꞌahja. 5Ndoni gha za wheni ooka tse tsꞌúhooli whe tsꞌihꞌun unꞌa whe dune tsꞌooleꞌ ha, ꞌet huba tsꞌilhꞌi ꞌet huwa. 6ꞋEt wheni tsꞌiyawh Christ Jesus ꞌen bulh ꞌutsꞌintꞌoh de, ꞌet de yuka dune unli-i kꞌut huyuztꞌus, kꞌus ꞌaw lhitꞌus-un, ꞌet ꞌaw ꞌantsꞌi ꞌuhoontꞌoh. ꞋEt hoontsꞌi be ꞌalha ꞌuhoontꞌoh-i, ꞌi hooncha wheꞌ hoontꞌoh. ꞋI gha ꞌon nus lhkꞌetsꞌusiꞌ.
7Soo úlhwus inleꞌ! Mbe gha njan khuni ꞌalhaꞌ ꞌuntꞌoh-i oochꞌa nasahdil? 8Ndun nohoolhgooh-un, ꞌaw ꞌanih nohulhni-un, ꞌen tsꞌun iloh ꞌuntꞌoh. 9Lhes oogha untuldoh-i, ntsool-iyaz ꞌi lhes ncha-i oogha yuntuldoh. 10NeMoodihti sba ꞌalhaꞌ ꞌuntꞌoh ꞌaw ꞌutsꞌun unꞌa ꞌunoohzin ꞌaitꞌoh. Mbe dune tankꞌus nohnilhtꞌi-un, ꞌen mbe unli hoontsꞌi, Yakꞌusda yuba nahutiyeh. 11ꞋEt sulhutsinke ndi ooka dune ulhli-i ꞌawhuz hiyotꞌas dusni de, ꞌawhuz ꞌet za ndudúsni de, ꞌet di ha ꞌawhuz hukwa dzoh nusulhdzut? ꞋEt whuz unꞌa howu yasduk de, ꞌet Jesus Christ tulalhgus kꞌut dazsai-un howu yasduk de, ꞌaw daꞌ buba dzoh lheꞌduzoosnih ooleꞌ. 12Mbene la tankꞌus nohnilhtꞌine, ꞌenne didutchꞌoh úncha naꞌhoodudutꞌas.
13Sulhutsinke Moses be ꞌudustlꞌus hikꞌúneꞌ ꞌustꞌenne oola naditnine ꞌahli whé ꞌahtꞌoh. ꞋEt hoontsꞌi ꞌaw ꞌilhoghun za nohba whuzꞌai. Ndi whe oola naditni-un ꞌet whahtꞌi, ꞌet hoontsꞌi soo cho khohdleꞌ. Nohyustꞌe nintaꞌtitꞌelh-un, ꞌet whutsꞌu níntꞌi de, ꞌet hólhchoot junih! ꞋEt kꞌus be nékꞌetsꞌinsiꞌ-i, ꞌi be lhba neꞌóohtꞌen. 14Moses be ꞌudustlꞌus ꞌet whunílhcho ꞌilho khuni be lhaooduja, ꞌet ndutni, “Ntsꞌenꞌa la nyunchꞌoh kꞌenainsiꞌ, whuz unꞌa nyulh dune cha bukꞌeoonsiꞌ,” ni. 15ꞋEt hoontsꞌi ꞌantsꞌi lhike kꞌunꞌa lhehdulh de, doo ka sih nintaꞌlhólhꞌen. ꞋEt whuchꞌa huwohleꞌ!
Ndoni ꞌen be ndi yun kꞌut dulhtsꞌi
16ꞋEt njan nohdusni, Ndoni ꞌen be ndi yun kꞌut dulhtsꞌi. ꞋEt nduhtꞌen de, nohyustꞌe ꞌutsꞌun nóotꞌi ꞌaitꞌoh. 17ꞋEt neyustꞌe Ndoni chꞌaz níntꞌi. ꞋEt doo cha Ndoni neyustꞌe chꞌaz níntꞌi. ꞋEt whe lhchꞌa húhoolꞌi. ꞋEt huwa hukwaꞌ nahzun te, neꞌoohtꞌen junih. 18ꞋEt Ndoni ꞌen za ookꞌoh tuneꞌ ꞌahtꞌen de, ꞌet de Moses be ꞌudustlꞌus daja ni, ꞌaw ꞌon ꞌun kꞌúnunoh noojoot ꞌaitꞌoh.
19ꞋEt neyustꞌe be ꞌutꞌen kꞌoh-un, ꞌet whunilhchoh tꞌetsꞌoninzun. ꞋUyoonne ꞌat bulh nintaꞌtsꞌutꞌih, kꞌus lhghu lhikohne, ꞌenne bubulh nintaꞌtsꞌutꞌih, kꞌus lubeshi dutsun-i ꞌutsꞌulhꞌih. ꞋInkꞌez ꞌahoolhyiz dune kꞌus tsꞌekoo bulh lubeshi ꞌuztilelh whutsꞌúznintꞌi. 20ꞋEt ꞌukꞌeltsi neba ꞌalhaꞌ ꞌuntꞌoh-un, dune dezdulih-un cha. Lhtsꞌuzdutni ꞌinkꞌez lhchꞌa tsꞌúhooli. Lhgheꞌ tsꞌoolnih, tsꞌuhuzke, nekꞌoh tsꞌe zaꞌ ꞌutsꞌitꞌelh. ꞋEt lhelhdoh ꞌutsꞌintꞌoh whe ꞌilhoh didohne, wheni tsꞌiyawh whenichꞌoh nekꞌunꞌa ꞌonghohne whubutsꞌodulhꞌeh de, 21ꞌuyoonne dune chꞌeꞌ haꞌ ꞌuzninzun ꞌinkꞌez dune tsꞌughan. ꞋAhoolhyiz taznutnai ꞌinkꞌez tsꞌiyantsuk whe hoontsiꞌ tuneꞌ tsꞌutꞌen. Ndi nduntꞌoh-i, ꞌinkꞌez ndet la tankꞌus neyustꞌe whutsꞌu nintꞌi-un, ꞌet whutso nohdusni, ꞌudaꞌ cha nohdasniꞌ. Mbene la ꞌet ndúhoontꞌoh tuneꞌ ꞌútꞌenne, ꞌaw Yakꞌusda whulerwe unli-un, butlꞌa hóoltsꞌit ꞌaitꞌoh.
22ꞋEt hoontsꞌi Ndoni nebaꞌ yinla-i, ꞌi ꞌuntꞌoh, be lhkꞌetsꞌusiꞌ-i, be tsꞌónilhni cha, be nédzi dizghel, hoonli talhtsꞌodini-un, ꞌinkꞌez ꞌuyoonne tsꞌun tsꞌínzoo ꞌi cha. ꞋEt tsꞌiyaitsuk unzoo-i ꞌutsꞌulhꞌen, Yakꞌusda neba ꞌalhaꞌ ꞌuntꞌoh-un cha. 23ꞋUyoonne ghaꞌ tsꞌoleꞌ, ꞌinkꞌez kꞌohuzdunooltꞌi. ꞋEt ndutsꞌintꞌoh de, ꞌet de ꞌaw hoonli whe nekꞌehootaltsꞌulh-un hooloh. 24ꞋInkꞌez mbene Christ oochꞌeꞌ unline, ꞌet dáhoontꞌoh neyustꞌe lubeshi tsꞌu nintꞌi, ꞌet ꞌantsꞌi lubeshi tsꞌuznintꞌi-un leꞌ tsꞌintꞌoh, ꞌet tsꞌiyawh tulalhgus ꞌutsꞌodunilhtꞌo. 25Ndoni ꞌen be tsꞌukhuna. ꞋEt huwa Ndoni ꞌen be za bulh úztoodilh hubaꞌ hoontꞌoh. 26Khun te wheꞌ dudolhtiꞌ junih, tsꞌúhoskeꞌ junih, ꞌinkꞌez ꞌuyoonne chꞌeꞌ haꞌ ꞌuznoozin junih.
Currently Selected:
Galatians 5: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.