2 Corinthians 2
2
1ꞋInkꞌez si cha seni lhadúsdla ꞌaw tsꞌodi bulh nohtsꞌu tísyalh hukwa lheꞌnúszun. 2ꞋEt si sgha nohdzi tsꞌodi susi de, mbe suba hoonustꞌiꞌ-un sghá hoꞌalh? Ntsꞌenꞌa suba nohni tsꞌodi ꞌahli de, hoonústꞌiꞌ-un sghá hohꞌalh? ꞋAw ꞌuhótꞌeꞌ ꞌaitꞌoh!
Mbe la nintaꞌantꞌen-un, ooba whunatsꞌodoolnoh hubaꞌ hoontꞌoh
3ꞋInkꞌez njan nohdúsni-un ꞌi ghun za ꞌudaꞌ nohtsꞌó kꞌeꞌisguz inleꞌ. ꞋEt nohtsꞌóozusya de, doo ka la nohni nohghan tsꞌodi oosdleꞌ. ꞋEt hoontsꞌi nohni nohghan hoonústꞌiꞌ-un sghá holtsꞌit, ꞌet za hukwaꞌ nuszun. ꞋEt huwa ꞌawhuz nohtsꞌúlhtuzusyai. Be hóonustꞌiꞌ-i, ꞌi tsꞌiyawh nohni cha be whúnolhni hukwaꞌ nuszun. ꞋEt ndahtꞌoh-un, ꞌet sba ꞌalha ꞌuhoontꞌoh. 4ꞋEt sdzi tsꞌodi unli whe snatsul tooꞌ hoonli whe nohtsꞌó kꞌeꞌisguz. ꞋAw nohdzi tsꞌodi ooselh huba iloh nohtsꞌó kꞌeꞌisguz. ꞋEt be nekꞌetsꞌintsiꞌ-i ncha-i nohba ꞌustꞌi, ꞌet tꞌewhuntihzeh hukwaꞌ nuhzun ha nohtsꞌó kꞌeꞌisguz.
5ꞋEt hoontsꞌi ꞌaw si za tsꞌodi lhúsdloh, nohni cha tsꞌiyawh ꞌet huwun ꞌen daja la ꞌet huwa tsꞌodi ꞌahli. ꞋEt huwa ꞌandit nohdúsni-un doo ka la ꞌaw tube cho nohba dzoh ꞌudoosniꞌ junih. 6Nohni cho olhtsus de, ꞌet ꞌawet sooꞌ hoontꞌoh. 7ꞋEt tsꞌiyawh ooba ꞌún tsꞌotoolhdilh ꞌinkꞌez ꞌukꞌenáznoꞌah, doo ka si ꞌon nus oodzi tsꞌodi unli de, ꞌet whe oochꞌaꞌoodeh. 8ꞋEt huwa khuni ulhtus-i be nohdúsni, ndun dune ba ꞌún tsꞌuhutulhdilh de, ꞌi be ꞌet whuz unꞌa la tꞌeoonózin ookꞌehsiꞌ. 9ꞋEt tsꞌihꞌun unꞌa tꞌewhuntiszeh hukwaꞌ nuszun ntsꞌenꞌa la nohdásniꞌ-un, tsꞌiyawh tilah hukwꞌu neꞌzahtꞌen. ꞋEt huwa nohtsꞌó kꞌeꞌisguz. 10ꞋInkꞌez mbe hoonli ooba ꞌún whutulhdilh de, si cha ooba ꞌún whutisdulh. Hoonli ooba ꞌún whutusdilh-un, mbe la ooba ꞌún whutusdilh-un, ꞌen Christ oonalh nohni cha nohba ꞌún whutusdilh ꞌet huwa. 11ꞋEt ndutsꞌutꞌen de, ꞌet Satan ꞌaw nechꞌaꞌ oolhdeh ꞌaitꞌoh. Ndet whe nechꞌaꞌ tilhdoh-un, tsꞌiyawh tꞌetsꞌonínzun.
ꞋEt neMoodihti dáti sba dáhaidantan leꞌ ꞌuja
12ꞋEt keyoh Troas tsꞌuwhútni-un, ꞌet nusya whe ꞌet Christ ooghuni unzoo-i, ꞌi be bubulh yatisduk ꞌet wheni whuz oozúsya. ꞋEt Moodihti dáti sba dáhaidantan leꞌ ꞌuja. 13ꞋEt sulhutsin Titus ꞌen ookwa itúsꞌen, ꞌet hoontsꞌi ꞌaw naóostelh ꞌaitꞌoh. ꞋEt whe syughi be sba tsꞌihꞌun lheꞌhóotꞌoh le ꞌustꞌoh. ꞋEt whe dusya whe ꞌet huwa Macedonia tsꞌe ꞌóozusya.
14ꞋEt Yakꞌusda tsꞌun musi dusni. ꞋEn gha Christ ꞌen be ꞌahoolhyiz whuchꞌaꞌ tsꞌulhdeh. ꞋInkꞌez ꞌen ghun be tꞌetsꞌoninzun-i, ꞌantsꞌi sooltsun-i kꞌunꞌa wheni negha nꞌun ndulcho whe whedándi leꞌ ꞌuntꞌoh. 15ꞋEt Christ ꞌen ba Yakꞌusda tsꞌun ooba sooltsun-i leꞌ tsꞌintꞌoh. ꞋInkꞌez mbe la dijizne ꞌinkꞌez mbe la kwuncho yo tsꞌu tidulhne, ꞌenne butoh whuz unꞌa ꞌutsꞌintꞌoh. 16Whulohne dahútitsah-un whunahultsun. ꞋEt ꞌonghunne cha be tsꞌukhuna-i nahultsun ꞌi be ꞌilhiz wheni huhutinalh, ꞌet whuz unꞌa buba leꞌ tsꞌintꞌoh. ꞋInkꞌez mbe ꞌuntꞌoh ꞌet huba soo ꞌúldzooꞌ? 17ꞋEt lhane Yakꞌusda ooghuni ꞌutsꞌun unꞌa náhuyulhꞌen. ꞋEt whe sooniya ꞌuhulhꞌen. ꞋEt wheni ꞌaw ndúlhtsꞌitꞌoh. ꞋEt tsꞌihꞌun unꞌa Yakꞌusda ba yatsꞌulhduk wheꞌ tsꞌutni, ꞌet whuz unꞌa oonalh whe Christ ꞌen be yatsꞌulhduk.
Currently Selected:
2 Corinthians 2: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.