1 Timothy 3
3
Yakꞌusda ba huwunli-un, ꞌet diz unꞌa dune ooleꞌ hubaꞌ hoontꞌoh
1Ndi khuni ootꞌa niuznintan-i ꞌet ndutni: Mbe la Yakꞌusda ba huwunli-un tileh hukwaꞌ ninzun de, ꞌet de ꞌen ꞌutꞌen unzoo-i ꞌutilhꞌelh hukwaꞌ ninzun whe ꞌuntꞌoh. 2ꞋInkꞌez Yakꞌusda ba huwunli-un, ꞌaw dune hoonli whe tankꞌus lheꞌoostꞌeꞌ. ꞋIlhoghun za ooꞌat ooleꞌ. Duba whutnih. Tsꞌihꞌun ni nizulh. Dune yoh dalih. Soo dune hodulhꞌeh-un unli, 3ꞌinkꞌez tsꞌekoo tooꞌ cha ha dalhatni. ꞋAw khun lhonulhchꞌe cha ꞌuntꞌoh. ꞋAw sooniya ha dalhatni. Dune dachꞌe nulheꞌustꞌen. Dune dulhyoh lheꞌdusnih. ꞋUyoonne dune chꞌeꞌ ha lheꞌnizun. 4Tsꞌihꞌun unꞌa duyoh dilhtsꞌine bugholeꞌ ꞌinkꞌez duduzke cha dichꞌoh budzi be hikꞌuneꞌ ꞌutꞌen uboolhtselh. 5ꞋEt tsꞌihꞌun unꞌa duyoh dilhtsꞌine bughunli ꞌaw tꞌeoonuszun de, ntsꞌenꞌa Yakꞌusda ba ꞌilhunaoodulhne bughu tileh? 6ꞋAw ꞌandit ooba ꞌalhaꞌ hooja-un iloh ootꞌeꞌ. Doo ka si utꞌudiltiꞌ-un ooleꞌ, ꞌinkꞌez netsudule be ooba nahisda-i, ꞌet doo ka la didut cha whuz unꞌa ooneh. 7ꞋInkꞌez cha ndunne ooba ꞌalhaꞌ lheꞌhootꞌohne, ꞌenne cha soo highu yaoolhduk, doo ka si tankꞌus ꞌuja ꞌinkꞌez netsudule yoolhgooh.
Yakꞌusda ba neꞌútꞌen-un, ꞌet ntsꞌenꞌa dune tileh
8Whuz unꞌa za Yakꞌusda ba neꞌútꞌen hukwa ꞌutꞌenne, ꞌenne Yakꞌusda buba dótiꞌ. ꞋAw nanki bughuni lhiloh. ꞋAw tsꞌekoo tooꞌ cha ka dalhatni, ꞌinkꞌez ꞌaw sooniya cha ka dálhatni. 9ꞋEt wheꞌ hoontꞌoh hooyoh-un, be neba ꞌalhaꞌ whutatꞌelh ꞌi bulh, buyo tsꞌe oogha tꞌetsꞌoninzun-i, soo ootsun hooloh ꞌet ha hotun. 10ꞋEt hoontsꞌi ndunne Yakꞌusda ba neꞌútꞌenne, ꞌudechoo soo cho dune tꞌebunoozeh ꞌinkꞌez ꞌaw hoonliyaz whe hikꞌehoꞌalh-un hooloh de, ꞌet de Yakꞌusda ba neꞌtitꞌen.
11Whuz unꞌa za buꞌatke cha Yakꞌusda buba dótiꞌ, ꞌuyoonne chꞌaz yalhoohoolhduk, duba whutnihne hooleꞌ, tsꞌiyantsuk whe butꞌaniuznootan ha.
12ꞋInkꞌez ndunne Yakꞌusda ba neꞌútꞌenne, ꞌilhoghun za ooꞌat ooleꞌ. Duduzke ꞌinkꞌez duyoh dilhtsꞌine cha tsꞌiyawh tsꞌihꞌun unꞌa bugholeꞌ hubaꞌ hoontꞌoh. 13Mbe la soo Yakꞌusda ba neꞌustꞌenne, ꞌuyoonne toh soo cho Yakꞌusda ba hooyin, ꞌinkꞌez Christ Jesus ye ꞌalhaꞌ ꞌuntꞌoh-i, ꞌaw whelhniljut whe ꞌi ghun ꞌuyoonne bulh yaoolhduk.
Hooncha wheꞌ hoontꞌoh hooyoh-un
14ꞋAwet nilhdukw ntsꞌun tisyalh hukwaꞌ nuszun ꞌet hoontsꞌi ntsꞌo kꞌeꞌusges. 15ꞋEt hoontsꞌi saꞌyaz neꞌzustꞌen de, ꞌet de ndi ꞌudustlꞌus ꞌi gha la tꞌeoononzin whe Yakꞌusda ooyoh dahutitꞌelh-un. Yakꞌusda gha ꞌilhodulhne, ꞌenne Yakꞌusda khuna-un ooyoh hinli wheꞌ hintꞌoh. Ndunne ꞌilhunaoodulhne ndi khuni ꞌalhaꞌ ꞌuntꞌoh-i be highunli ꞌinkꞌez tsꞌihꞌun unꞌa highu yalhduk. 16ꞋInkꞌez ꞌaw huwun lhdulhyoh lheꞌtsꞌudusnih whe Yakꞌusda ba ndi yun kꞌut uzdoltsꞌiꞌ ha, ꞌet hooncha wheꞌ hoontꞌoh. ꞋEt Yakꞌusda dichꞌoh dune suliꞌ ꞌet whe whubunilhtan. Ndoni tsꞌihꞌun ꞌuntꞌoh unli yulhni. Lizasne huyanꞌen. ꞋUdun yun kꞌut whutꞌenne, ꞌen ghun whulh ꞌuhudantsꞌo. Ndi yun kꞌut whutꞌenne, ooghun ooba ꞌalhaꞌ yintꞌoh suliꞌ, ꞌinkꞌez yakꞌuz tsꞌe huhoontꞌiꞌ whe danahinilhti.
Currently Selected:
1 Timothy 3: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.