Roma 1
1
O ‘Upu Fa‘afeiloa‘i
1O a‘u o Paulo, o le ‘au‘auna a Iesu Keriso, na vala‘auina e fai ma ‘aposetolo, ‘ua tofia e tala‘i le tala lelei a le Atua.
2‘Ua ia mua‘i ta‘uina mai e ana perofeta i Tusi pa‘ia, 3o le tala lelei e uiga i lona Alo o Iesu Keriso lo tatou Ali‘i, o lē na fānau mai i le ‘āiga o Tavita i la le tino, 4o lē na fa‘asinotonuina mai o le Alo o le Atua o ia ma le mana, i la le agaga e pa‘ia lea, i le toetū mai nai ē ‘ua oti. 5‘Ua matou maua mai ‘iā te ia le alofa tunoa ma le faiva o le ‘aposetolo, ‘ina ‘ia i‘u ‘ina ‘ana‘ana i le fa‘atuatua o nu‘u uma lava, ‘ona o lona suafa; 6e i ai fo‘i ‘outou o ē ‘ua vala‘auina e Iesu Keriso.
7O la‘u tusi lenei ‘iā te ‘outou uma lava o i Roma, o ē ‘ua alofaina e le Atua, o ē ‘ua vala‘auina e fai ma tagata pa‘ia.
‘Ia ‘iā te ‘outou le alofa tunoa ma le manuia mai le Atua lo tatou Tamā, ‘atoa ma le Ali‘i o Iesu Keriso.
O le Tatalo Fa‘afetai
8E muamua ‘ona ‘ou fa‘afetai atu i lo‘u Atua ‘iā Iesu Keriso, ‘ona o ‘outou uma, ‘ina ‘ua ta‘ua lo ‘outou fa‘atuatua i le lalolagi uma lava. 9Auā ‘ua silafia mai e le Atua, o ia ‘ou te ‘au‘auna i ai i lo‘u agaga, i le tala lelei i lona Alo, e lē aunoa ‘ona ‘ou ta‘uta‘ua ‘outou, 10‘ua ‘ou ‘ai‘oi atu ai i a‘u talosaga e fai so‘o, pe mafai lava ‘ona ‘ou manuia i le finagalo o le Atua, ‘ia lē pine ‘ona ‘ou alu atu ai ‘iā te ‘outou; 11auā ‘ou te naunau tele i le fia feiloa‘i ma ‘outou, ‘ina ‘ia ‘ou avatu ‘iā te ‘outou se mea alofa i la le Agaga, e fa‘atumauina ai ‘outou; 12o lona uiga lenei, ‘ina ‘ia tatou fēfa‘amafanafanaa‘i i lo tatou fa‘atuatua, o ‘outou ‘atoa ma a‘u.
13Le au uso e, ‘ou te loto ‘ina ‘ia ‘outou iloa, ‘ua tele o‘u manatu ‘ou te alu atu ‘iā te ‘outou, a ‘ua tāofia a‘u ‘ua o‘o mai i ona po nei, ‘ina ‘ia ‘ou maua sina fua ‘iā te ‘outou, fa‘apei o isi nu‘u.#Galu 19.21 14‘Ua ‘iā te a‘u mea a Eleni ‘atoa ma nu‘u ‘ese, o ē popoto ‘atoa ma ē vālelea; 15o le mea lea ‘ou te naunau ai, ‘ia ‘ou folafola le tala lelei ‘iā te ‘outou fo‘i o i Roma.
O le Mana o le Tala Lelei
16Auā ‘ou te lē mā i le tala lelei ‘iā Keriso; auā o le mana lava lea o le Atua e ola ai i latou uma o ē fa‘atuatua, e muamua le Iutaia, ‘atoa ma le Eleni.#Mare 8.38 17Auā ‘ua fa‘aalia mai ai le amiotonu a le Atua i le fa‘atuatua, ‘ina ‘ia fa‘atuatua ai, pei ‘ona tusia, “E ola le tagata amiotonu i le fa‘atuatua.”
O le Amio Leaga o le Lalolagi
18‘Ua fa‘aalia mai fo‘i le to‘asā o le Atua mai le lagi i le amio fa‘alēmata‘u ma le amio leaga uma lava a tagata, o ē tāofi i le ‘upu moni ma le amioletonu. 19Auā o mea a le Atua e mafai ‘ona iloa ‘ua fa‘aalia mai ‘iā te i latou; auā ‘ua fa‘aalia mai e le Atua ‘iā te i latou; 20auā o ana mea e lē va‘aia talu ‘ona faia o le lalolagi, e va‘aia lava ia i le mafaufau i mea na faia o lona mana lava lea e fa‘avavau ma lona Atua; o lea fo‘i ‘ua lē mautali ai i latou. 21Auā fo‘i na iloa e i latou le Atua a ‘ua lē vivi‘i ma fa‘afetai atu ‘iā te ia, ‘ia tusa i le Atua; ‘ae peita‘i ‘ua fa‘avaleleaina i latou i lo latou taumasalosaloga, ‘ua fa‘apouliuligia fo‘i o latou loto vālea;#Efe 4.17-18 22‘ua valea i latou, a o fa‘afiapopoto i latou, 23‘ua latou fesuia‘i fo‘i le mamalu o le Atua soifua pea lava ma le fa‘atagata o le tino o le tagata i‘u vale, ma manu felelei, ma manu vaefā, ma mea fetolofi.#Teu 4.16-18
24O lea fo‘i na tu‘uina atu ai i latou e le Atua i le amio leaga, i le tu‘inanau o latou loto, latou te fefa‘aleagaina i o latou lava tino; 25o i latou ia o ē ‘ua fesuia‘i le ‘upu moni i le Atua ma le ‘upu pepelo; ‘ua latou matata‘u fo‘i ma ‘au‘auna i mea na faia, a ‘ua tu‘ua o ia na na faia, o ia o lē vi‘ia e fa‘avavau. Amene.
26O le mea lea na tu‘uina atu ai i latou e le Atua i mana‘o e māsiasi ai: auā o latou fafine fo‘i, ‘ua latou fesuia‘i le tu e tatau ma le tu e lē tatau; 27e fa‘apea fo‘i tane, ‘ua tu‘ua e i latou le tu e tatau i le fafine, ‘ina ‘ua mū i lo latou fēmana‘oa‘i; o tane ‘ua fefaia‘i i latou i mea e māsiasi ai; ‘ua tauia fo‘i i latou i o latou lava tino e tusa ma lo latou sesē.
28‘Ua latou lē loto fo‘i e tāofi i le matā‘upu i le Atua, o lea ‘ua tu‘uina atu ai i latou e le Atua i le loto leaga, latou te fai ai mea e lē tusa; 29o lo‘o tūtūmu i latou i amio leaga uma lava, o le faita‘aga, o le amio ulavale, o le manumanu, o le loto leaga; o lo‘o tumu saisai i le matau‘a, o le fasioti tagata, o le misa, o le ‘ole‘olega, ma le fa‘atautala; 30o tuaupua i latou, o ē fai tala leaga, o ē ‘ino‘ino i le Atua, o ē fa‘asiasia, o ē fa‘asauā, o ē fa‘afiasilisili, o ē fia fai togafiti i mea leaga, o ē lē ‘ana‘ana i mātua, 31o ē vālelea, o ē tu‘umavaega, o ē lē loto‘āiga, o ē lē fa‘amolemoleina, ma ē fa‘alealolofa; 32o i latou ia ‘ua iloa le tonu mai le Atua, e tatau ai ‘ona oti o ē fai mea fa‘apenā, e lē gata ‘ona latou faia o ia mea, ‘ae fiafia lava i latou i ē ‘ua faia.
Currently Selected:
Roma 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.