Daniel Greek 1
1
O Tanielu ma ana Uō
(1.1—6.28)
1O le tausaga e tolu o le nofoa‘iga a Ioakima le tupu o Iuta na sau ai Nepukanesa le tupu o Papelonia i Ierusalema ma na vagaia.#2 Tu 24.1; 2 No 36.5-7 2‘Ona tu‘uina atu lea e le Ali‘i i lana pule o Ioakima le tupu o Iuta, fa‘atasi ma nisi ipu o le fale o le Atua, na ia ‘ave fo‘i ia mea i le nu‘u o Senara i le fale o lona atua; ‘ua na ‘ave fo‘i ipu i le fale ‘oloa o lona atua.#2 Tu 20.17-18; 24.10-16; 2 No 36.10; Isai 39.7-8
3‘Ona fai atu lea o le tupu ‘iā Asepenasa, le ali‘i e pule i ana eunuka, ‘ia ‘aumai nisi o le fānauga a Isaraelu, o le fānau lava a le tupu, ‘atoa fo‘i ma nisi ali‘i; 4o tama e le ponā lava, a ‘ua ‘aulelei, o ē ‘ua atamamai lava ma ‘ua iloa mea uma, o ē ‘ua popoto lava, ma ‘ua tatau ‘ona latou tutū i le maota o le tupu, ‘ia a‘oa‘oina fo‘i i latou i tusi ma le gagana a Kaletaia. 5‘Ua poloa‘i fo‘i le tupu ‘iā latou ‘a‘ai i lea aso ma lea aso i mea taumafa a le tupu, ‘atoa ma le uaina e inu ai o ia, ‘ia tausia i latou i tausaga e tolu; a mavae ia, ‘ona latou tutū ai lea i luma o le tupu. 6Sa ‘iā i latou nisi o le fānauga a Iuta, o Tanielu, o Hanania, o Mesaelu, ‘atoa ma Asaria.#Eseki 14.14, 20; Tani 2.17 7‘Ua fa‘aigoa fo‘i ‘iā te i latou e le ali‘i e pule i eunuka; ‘ua na fa‘aigoa a Tanielu o Peletisara, a o Hanania o Sataraka lea, o Mesaelu fo‘i o Mesako lea, o Asaria fo‘i o Apeteniko lea.
8A ‘ua manatu Tanielu, o le a leaga o ia i mea taumafa a le tupu, po o le uaina e inu ai o ia; ‘ona ‘ai‘oi atu ai lea o ia i le ali‘i e pule i eunuka ‘ina ‘ia le leaga ai o ia. 9Na fa‘atupuina e le Atua le alofa mutimutivale o le ali‘i e pule i eunuka ‘iā Tanielu.#Kene 39.21; Sala 106.46; Fa‘ata 16.7 10‘Ona fa‘apea atu lea o le ali‘i e pule i eunuka ‘iā Tanielu, “‘Ou te fefe a‘u i lo‘u ali‘i le tupu, na ia pule ‘iā ‘outou mea e ‘ai, ma a ‘outou mea e inu; e iloa i se a e ia o ‘outou mata ‘ua fole, ‘ua lē pei o tama ‘ua ‘outou tupulaga? O le a alataia ai ‘ona vāea o lo‘u ulu e le tupu ‘ona o ‘outou.”
11‘Ona fa‘apea atu lea o Tanielu ‘iā Melesara, o le na tofia e le ali‘i e pule i eunuka e pule ‘iā Tanielu, ma Hanania, ma Mesaelu, ma Asaria. 12“‘Ia e tofotofo i au nei ‘au‘auna i po e sefulu, ‘ia latou ‘aumai ai ‘iā te i matou ni fua o la‘au e ‘a‘ai ai ma vai e inu ai. 13‘Ona e silasila lea i o matou mata ma mata o tama o ē ‘a‘ai i mea taumafa a le tupu, ‘ona e faia lea i au ‘au‘auna e tusa ma lau silafaga.”
14‘Ona usiusita‘i lea o ia ‘iā te i latou i lenā mea, na ia tofotofo fo‘i ‘iā te i latou i po e sefulu. 15‘Ua mavae po e sefulu, ‘ona iloa lea ‘ua sili ‘ona lālelei o latou mata mōna tino lelei i tama uma e na ‘a‘ai i mea taumafa a le tupu. 16‘Ona ‘ave‘eseina ai lea e Melesara a latou mea taumafa mai le tupu, ‘atoa ma le uaina na fai a inu ai i latou, ‘ua avatu fua o la‘au mā latou.
17A o ia tama e to‘afa ‘ua foa‘iina e le Atua ‘iā te i latou le fa‘autauta ma le atamai i tusi uma lava, ‘atoa ma le poto; a o Tanielu ‘ua poto ia i fa‘aaliga uma lava ma miti.#Tani 2.23; 5.12; 10.1; Iako 1.5
18‘Ua mavae fo‘i aso na fai atu ai le tupu e ‘aumai ai i latou, ‘ona ‘aumai ai lea o i latou e le ali‘i e pule i eunuka i luma o Nepukanesa. 19‘Ona tautalatala ai lea o le tupu ma i latou; a ‘ua lē maua se tasi o i latou e tusa ma Tanielu, ma Hanania, ma Mesaelu, ma Asaria; ‘ona latou tutū ai lea i luma o le tupu. 20O mea uma lava e ao ai le poto ma le fa‘autauta na fesili atu ai le tupu ‘iā te i latou, ‘ua iloa ai e ia ‘ua sautuasefulu ‘ona sili o lo latou poto i taulāitu, ma va‘afa‘atau uma i lona mālō uma lava.#Kene 41.24; Tani 2.27; 4.7; 5.15 21Sa i ai Tanielu ‘ua o‘o i le tausaga muamua o Kuresa le tupu.
Currently Selected:
Daniel Greek 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.