Fa‘ata‘oto 26
26
O ‘Upu i le Vale ma le Paiē ma le Fa‘atuaupua
1E pei o le kiona i le tausaga vevela,
e pei o le uaga fo‘i ona po o le seleselegāsaito;
e fa‘apea lava ‘ona lē onomea o le vi‘iga i le vale.#1 Samu 12.17
2E pei o le manulele ‘ua fealua‘i ma le pe‘ape‘a ‘ua felelea‘i
e fa‘apea le fetu‘u fai fua e lē taunu‘u auā e leai sona mafua‘aga.#Nume 23.8; 2 Samu 16.12
3O le sasa mo le solofanua, o le fa‘agutu mo le asini,
ma le la‘au mo le tua o le vale.#Sala 32.9; Fa‘ata 19.29
4‘Aua ne‘i e tali atu i le vale e tusa ma lona valea;
‘ina ne‘i tusa oe ma ia.#2 Samu 6.11
5‘Ia tali atu i le vale e tusa ma lona valea;
‘ina ne‘i poto o ia i lona lava manatu.#Mata 16.1-4; 21.24-27; Roma 12.16
6E pei o le vavae ‘ese o le vae ma inu i le mea e tigā ai,
le tagata ‘ua ia tu‘u le fe‘au i le tagata valea.
7E fetoso vae o le pipili;
e fa‘apea fo‘i le fa‘ata‘oto i le gutu o le vale.
8E pei o le taga o ma‘a tāua i le faupu‘egama‘a,
e fa‘apea le avatu o le vi‘iga i le vale.#Fa‘ata 26.1
9O le la‘au talatala ‘ua ‘ava‘e i le lima o lē ‘ua ‘onā,
o le fa‘ata‘oto lava lea i le gutu o le vale.
10O se ali‘i tāua, na te fa‘atigāina tagata uma lava;
e fa‘apea le tagata na te fa‘a‘oloa le vale,
na te fa‘a‘oloa fo‘i i ē solitulafono.
11E pei o le ta‘ifau ‘ua fo‘i i lona pua‘iga, e fa‘apea fo‘i le vale,
‘ua toe fo‘i atu i lona valea.#2 Pete 2.22
12‘Ua e iloa ‘ea se tagata ‘ua poto i lona lava manatu?
E fai le fa‘amoemoe o tagata i le vale, ‘ae lē ‘iā te ia.
13‘Ua fai ane le paiē, “O lo‘o i le ala le leona; ‘ua i malae le leona.”#Fa‘ata 22.13
14E fealualua‘i le puipui i ona fa‘amau, e fa‘apea le paiē ‘ona feliuliua‘i i lona moega.
15‘Ua fa‘alilo e le paiē lona lima i le tanoa;
e musu o ia e fa‘afo‘i mai ai i lona lava gutu.#Fa‘ata 19.24
16E manatu le paiē ‘ua sili lona poto i tagata e to‘afitu,
o ē ‘ua tali mai ma le mafaufau.#Fa‘ata 26.5
17O lē na tago i taliga o le ta‘ifau,
o le tagata lea ‘ua alu ane ma oso vale i le misa ‘ese.
18E pei o le vale ‘ua fanafana i ū, ma tao, ma le oti.
19E fa‘apea fo‘i le tagata na te ‘ole‘ole i lē la te tuā‘oi,
‘ona fa‘apea mai lea o ia, “E lē o la‘u mea ula ‘ea?”
20A leai se fafie, e mate le afi;
a leai fo‘i se faitatala, e leai fo‘i se misa.
21O le malala i le malala ola, ma le fafie i le afi,
e fa‘apea le tagata fa‘amisa e tupu ai le misa.#2 Samu 20.1; Fa‘ata 15.18
22O ‘upu a le tagata faitatala, e tusa ia ma mea suamalie,
‘ua o‘o ifo i totonu lava o le manava.
23O laugutu ‘ua tautala atu i ‘upu alofa, ‘ae leaga le loto.
e pei o le siliva ‘ua ufitia ai le ipu ‘ele.#Mata 23.27; Luka 11.39
24O lē ‘ua ‘ino‘ino, ‘ua fa‘atagā tautala lelei o ia i ona laugutu;
a ‘ua tu‘u le pepelo i lona loto;
25e ui lava ‘ona fa‘amalie mai lona leo,
‘aua ‘e te fa‘atuatua ‘iā te ia; auā e fitu ni mea e ‘inosia ‘ua i lona loto.#Sala 28.3
26E ufiufi e ia lona ‘ino‘ino i le pepelo;
‘ae fa‘aalia lona leaga i le fa‘apotopotoga.
27O lē na te ‘elia se lua, e pa‘ū o ia i ai;
ma lē ‘ua fuli le ma‘a, e toe ta‘avale mai lea ‘iā te ia.#Ese 7.10; Sala 7.15
28O le laulaufaiva pepelo, ‘ua ‘ino‘ino ia i ē ‘ua momomo ai;
ma le gutu molemole e tupu ai le malaia.
Currently Selected:
Fa‘ata‘oto 26: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.