Ipi. 1
1
1Yus nuna wakerakui wi Papru Jesukrístu akatrámuitjiai. Jesukrístu nekas enentáimtusrum Yus shuar ajasrum Ipisiunam pujarmena nuna ju̱ papin áatjarme. 2Ii Aparí̱ Yussha tura Jesukrístu ii úuntri̱sha atumín waitnentramainia ásar aṉkant tuke shiir pujustinian suramsarti.
Krístuja̱i̱ shíiran suramsaitji
3Ii Uuntri̱ Jesukrístu Aparí̱ Yus nekas shiir awajtústiniaiti. Iisha Krístuja̱i̱ tsaniṉkiu asar ii enentái̱n ashí nayaimpinmaya̱ ana nuja̱i̱ warasminiaitji. Túmaitkiui Yus nu waratai̱n ashí suramsaitji. 4Krístuja̱i̱ uwemprar ti shiir tunaaja̱i̱nchu Niji̱a̱i̱ pujusárat tusa Yus, ju̱ nuṉka atsai̱sha, anaitiamkamiaji. 5Yámankamtaikniumia̱sha iincha ti anenmak Jesukrístu túrunamuja̱i̱ ni uchirí̱ ajasat tusa wakerutmak anaitiamkamji. 6Núja̱i̱ṉkia ni waitnenkartutairi̱ imiá péṉkera nu paant atí tusa nuna túriniaiti. Núnaka peṉké ántar ni aneamu Uchirí̱n suramsaitji. 7Yus imiá waitnentramak ni aneamu Uchirí̱ numpe̱ja̱i̱ ii yajauchiri̱n akikmatramak uwemtikrampraitji. 8Tura tí anenmak ni enentáimtairi̱n tura nekatairi̱ncha suramsamiaji. 9Nuja̱i̱ shiir enentáimturmak Kristui̱ iin uwemtikrampratniun wakerutmakmiaj nuna yaunchu nekaachman yamái paant awajtúrmaji. 10Ashí jú̱ nuṉkanam írunna nunasha tura nayaimpiniam írunna nunasha Kristu ashí akupin ati tusa Yus tsaṉkatkattawai. Nunasha Yus yaunchu enentáimturu asamtai tsawant jeamtai ashí uminkiattawai.
11Iisha Krístuja̱i̱ tsaniṉkiu asakrin Yus yaunchu achirmákmiaji ashí Niniu ana nuna tsaṉkatramkatniun. Nunasha ashí Ni túrana núnisaṉ aya Ni wakera asa túramiayi.
12Iikia Israer shuar asar Kristu emka umirkakrin iin imiá péṉker túrutmamun nekaawar ashí shuar Yusan ti shiir awajsámin áiniawai. 13Núnisaṉ atumsha nekas uwempratin chicham antukrum Kristu nekas enentáimtusurme. Túrarum Kristu shuar ajasákrumin Yus ni shiir Wakaní̱n akuptúktaj timia nuna akuptúrmakmai. Nuna tura “nekas Wí shuaraitrume” tawai. 14Yamái Yusa Wakaní̱ ii enentái̱n pujuruk tuke uwemtikramji. Tura takas umik nu tsawantai̱ ashí tsaṉkatramkattaji. Tura ii enentái̱n pujá asamtai Yus ukunam Níji̱a̱i̱sha ashí tsaṉkatramkattaj nu paant nékaji. Maa, Yus tí peṉker asamtai Nin ashí ti shiir awajsarti.
Papru Yus shuaran áujtusma
15Átum ii Uuntri̱ Jesukrístu nekas enentáimtamuncha tura ashí Yus shuarja̱i̱ shiir awajnáiyamuncha antukjai. 16Túran shiir enentáimkiun Yusan áujkun tuke yúmiṉkiajai. 17Ii Uuntri̱ Jesukrístu Aparí̱ Yus ti shiir asamtai Nin áujeakun ni Wakaní̱ ni nekatairi̱n suramas ashí jintintrámawarti tusan seajai. Nuja̱i̱ nuna naṉkaamas Yus nekaattarme. 18Tura enentáimincha paant enentáimtikramprarti tusan seajai. Nuja̱i̱ shiir túrutmataj tusa achirmákuitrum nu nekaattarme. Nu arantcha imiá shiira nu, Yus ni shuari̱n ashí tsaṉkatkattana nusha nekaattarme. 19Nu arantcha Yus nekas enentáimtakrin ti kakaram tujincha asa iin yáintmaj nu nekaattarme. Tura nu kakaram ti kakaram asamtai 20nuja̱i̱ Krístun jakamunmaya̱ iniantkímiayi. Tura nayaimpiniam jukí̱ ni untsuurí̱ni̱ akupin pujutai̱nium apujsamiayi. 21Tura ashí ju̱ nuṉkanam akupin ainia núja̱i̱sha tura ukunam nuṉka átatna nui̱ akupin áminia núja̱i̱sha tura ashí akupin ainia núja̱i̱sha tura ashí naari̱ nékamu ainia núja̱i̱sha Yus Krístun ashí naṉkaamas akupin awajsámiayi. 22Tura ashí írunna nu Krístun umirkartin áiniawai. Tura Yuska Krístunak ashí Yus shuara Akupniúri̱ awajsámiayi. Túramu asa Kristu ni shuari̱ muuke̱a áintsaṉkete. 23Tura ashí nuṉkanam Yus shuar ainia nu Kristu aya̱shí̱ najanainiawai. Tura Kristu ashí ni aya̱shi̱n pimiutkaiti tura nu arantcha ashí írunna nunasha pimiutkaiti.
Currently Selected:
Ipi. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.