Apu. 2
2
Ipisiunmaya̱ Yus shuaran papí áatramu
1Nuyá̱ turutmiai “Ipisiunmaya̱ Yus shuara uuntri̱ ju̱ áatrata. Siati yaan untsuurnum takakna nu tura núnisaṉ siati shirikip ikiutai̱ kúrinmaṉ ajapén étenta wekáa nu, tawai 2‘Ashí ame túram nuna nékajai. Ti kakaram takaakum katsunteamuncha nékajai. Yajauch shuar nawamtsuk awemaitrume. Shuar “Yus akatrámuitjiai” ántar tuinia nu nekaamarme. Wáitrinia nusha nékaitme. 3Ti wáitiayatmek katsuntram yawe̱tsuk Winia ti takartusuitme. 4Túrin ámini̱ṉ ju̱na títiatjame. Yus aneakum yámankamtaik tí peṉker wekainiuyam núnisam túratsme. 5Tuma asam ikiuknium nu enentáimpram yaunchu túriniuyam núnismek ataksha túrata. Túrachakminkia ame shiripkirmin wari jurustatjame. 6Tura ju̱ péṉker túriniaitme. Nikiurás shuar nakitniuitrume. Nu shuar “aya̱sh wakeramu páchitsuk túramniaiti” tuíniakui Wisha núnisnak nakitiajai. 7Kuíshtinia nu shuar Yusa Wakaní̱ ashí Yus shuaran timian antukti. Nupetmakunka tuke iwiaaku pujutai̱ numi nere̱n yúatniun tsaṉkatkattajai. Nu numi Yus pujana nui̱ wajaawai.’ Tu aartá” turutmiai.
Ismirnanumia̱ Yus shuaran papí áatramu
8Nuyá̱ turutmiai “Ismirnanmaya̱ Yus shuara uuntri̱ ju̱ áatrata. Yámankamtaikniumia̱ amúamunam tuke pujuwa nu tura núnisaṉ jaka nantakmia nu tawai 9‘Ashí ame túram nuna nékajai. Ti wáitiam nunasha tura kuítrinchaitmena nunasha nékajai. Antsu Yusai̱ṉkia ti kuítrinniuitme. Tura shuar iwianchi uuntri̱ Satanása shuari̱ áiniayat “Israer shuaraitjiai” tuíniak yajauch áujmatramena nuna nékajai. 10Tí waitsattamna nu ashamkaip. Íwianch ashí nekapramsataj tusa atumíinia̱n sepunam eṉkeattawai. Nui̱ tias tsawant wáitsattarme. Jáakmesha tuke Yus shiir enentáimtusakminkia tawaspan nakurin súsatniua nútiksanak nekas iwiaakman tuke shiir pujustinian amastatjai. 11Kuíshtinia nu shuar Yusa Wakaní̱ ashí Yus shuaran timian antukti. Nupetmakuka jimiará jákatniuka wáitsashtatui.’ Tu aartá” turutmiai.
Pírkamunmaya̱ Yus shuaran papí áatramu
12Nuyá̱ turutmiai “Pírkamunmaya̱ Yus shuara uuntri̱ ju̱ áatrata. Puyá̱ áinis tsakatskat mái̱ ere awajsámun takakna nu tawai 13‘Ashí ame túram nuna nékajai. Iwianchi uuntri̱ Satanás akupea nui̱ pujayatmek tuke shiir enentáimturmena nuna nékajai. Winia shiir umirtínian Ántipasan máwarmataisha Winia enentáimtursatin ishichkisha iniaitiuschamame. Nusha íwianch pujutai̱nium pujakrumin túrunamai. 14Túrin ámini̱ṉ ju̱na títiatjame. Atumíiya̱ shuar yaunchu Yúsnan etserin Paraam yajauch jintíamun tuke emetainiawai. Nisha Israer shuaran tunáa awajsat tusa Parakan unuiniarmiayi. Nuyá̱ Parak Yus sutai̱ taṉkun maar yúatniun Israer shuaran jintintiámiayi. Núnisaṉ ti tsanirmatniun jintintiámiayi. 15Atumíiya̱ shuarsha Nikiurás jintíamuncha Wi nakitiaj nuna iniaisatniun nakitiáiniawai. 16Wats, enentáimpram iniaisata. Túrachakminkia Wi wari wini̱n winia wenuruí̱ya̱ puyá̱ jiinia nuja̱i̱ mániktajai.Isa. 11:4; Apu. 1:16; 19:15 17Kuíshtinia nu shuar Yusa Wakaní̱ ashí Yus shuaran timian antukti. Nupetmakunka maná yurumkan u̱kma nuna ayurattajai. Nuyá̱ kaya pújun susattajai. Nu kayanam yamaram naari̱ aarma átatui. Nunasha chíkich shuarka peṉké nékatsa̱i̱ṉ aya achía nuke nekaattawai.’ Tu aartá” turutmiai.
Tiatiranmaya̱ Yus shuaran papí áatramu
18Nuyá̱ turutmiai “Tiatiranmaya̱ Yus shuara uuntri̱ ju̱ áatrata. Yusa Uchirí̱ ji̱ jiji̱a̱i̱ métek keena nu tura núnisaṉ nawe̱ jiru yaṉkutaku jiamua núnis néwar ajawa nu tawai 19‘Ashí ame túram nuna nékajai. Yus shiir enentáimtakum aneam nuna nékajai. Tura katsuntram péṉker takaamna nuna nékajai. Yáunchuja̱i̱ naṉkaamas péṉker túrame yamaikia. 20Túrin ámini̱ṉ ju̱na títiatjame. Nu nuwa̱ Jisawír awematsme. “Yúsnan unuiniajai” tinia Wí shuaran ti anaṉkenawai. Tura ti tsanirmatniuncha tura najankamu yus sutai̱ taṉkun maar yúatniun jintintiáiniawai. 21Nisha ni tunaari̱n enentáimiar iniaisat tusan nákasuitjiai. Tura nakitiawai. 22Wátsek, suṉkurmatkiakan peaknum aepsattajai. Tura chíkicha niji̱a̱i̱ tsanirma ainia nunasha niji̱a̱i̱ métek tí waitkiastatjai. Ni tunaari̱n enentáimiar iniaisacharmataiṉkia túrattajai. 23Ni uchirí̱ncha mantuattajai. Nuja̱i̱ ashí Yus shuar Wi nekas shuara enentái̱n nékaitjia nuna nekaawartatui. Atumniasha chikichik chikichik takasmaja̱i̱ métek akiktatjarme. 24Tura chíkich shuar Tiatiranmaya̱tiram nú chicham enentáimtuscharmena nu “nekas iwianchnia u̱kma” tutaiya nu nékachu asakrumin atakka túratniun patatkashtatjarme. 25Tura Wi jeatsa̱i̱ṉ takakrum nu emetatarum. 26Nupetmakunka Wi wakeraj nunak tuke iniaitsuk túrana nuna untsurí nuṉkanam akupkatniun tsaṉkatkattajai. 27Winia Apar tsaṉkatrukmia núnisnak akupkatniun tsaṉkatkattajai. Tura nuwe̱ najanamu jiruja̱i̱ awati ijiakratniua áinis ti kakarmaja̱i̱ akupkáttawai.YKan. 2:8-9 28Yáṉkuam káshik jiinia nuna susattajai. 29Kuíshtinia nu shuar Yusa Wakaní̱ ashí Yus shuaran timian antukti.’ Tu aartá” turutmiai.
Currently Selected:
Apu. 2: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.