Wek. 25
25
Najankamu yusan Israer shuar tikishmátraru
1Israer shuarsha Setim nuṉkanam matsamak pujusár Muápnumia̱ nuwa̱ja̱i̱ tsanirmatniun juárkiarmiayi. 2Túmainiak ni yusri̱ súamun áestuiniak nu nuwa̱ Israer shuaran ashí ipiá wéarmiayi. Tura Israer shuarsha nu shuarja̱i̱ iruntrar yurumáiniak ni yusri̱ncha tikishmátiarmiayi. 3Nuna túrukiar najanamu yusan Paarpiuran enentáimtutan naṉkamawarmiayi. Túmainiakui Uunt Yus Israer shuaran suíran ka̱e̱ kaje̱ntukarmiayi. 4Nuyá̱ Uunt Yus Muisaisan chicharuk “Israer shuar ashí uuntri̱ ainia nu irurarta. Túram Wisha ímiai̱ṉ etsa̱ etsanmanum sué̱nam jiṉkiam kajemtikram máwarta. Nu túrawakmin Israer shuaran Uunt Yus suir ka̱e̱ kaje̱ntukmanka tsaṉkurartatjai” tímiayi Uunt Yus. 5Nuya̱ṉka Israernum sumamtikin armia nuna Muisais chicharainiak “Átum atumí shuari̱ ainia nuyá̱ Paarpiur enentáimtamunam pachinkiarua nuka kajeṉtarum” tímiayi.
Pinias Uunt Yusan akasmatkamu
6Kame Yus Shiir Awajtai̱ Je̱a̱ wá̱i̱ti̱a̱i̱ri̱n Israer shuar irunar uur ajá matsamármiayi. Túmainiai̱ Muisaissha tura ashí Israer shuarsha iimiainiamunam chikichík áishmaṉ aya aneachma Matiannumia̱ nuwa̱n itiamiayi. 7Nuna wainiak Pinias, Iriasára uchirí̱ Yúsnan pujurin Arauna tiraṉki̱ya nu, Israer shuar irunar matsatmanumia̱ naṉkin jukí̱ jiinkí̱ 8nú shuar pataatuki̱ ni je̱e̱n wai̱ntiá áishmaṉnasha nuwa̱ncha naṉkiji̱a̱i̱ ijiú ampujnum pana ji̱yá̱ mai̱ mámiayi. Nuna túramtai Israer shuar kajíamu setuamiayi. 9Tura nui̱ kajinkiarmia nusha mash irurmaka painti kuatru mir ármiayi. 10Nuyá̱ Uunt Yus Muisaisan chicharuk 11“Iriasára uchirí̱ Pinias, Yúsnan pujurniu Arauna tiraṉki̱ Israer shuar akajtukarma nuna atsaṉturai. Nisha Wi akasmaj tímiatrusaṉ kajekai. Tuma asamtai Israer shuarnaka kajerkariatnak amukcharjai. 12Tuma asamtai Wikia ju̱na tajai ‘Yamaikia Wiji̱a̱i̱ aṉkant pujustinian niji̱a̱i̱ chichaman nájanjai. 13Kame nisha tura ukunam ní jakamtaisha ni shuar ártatna nuna Yúsnan pujurin ajastinniaka suíniajai tura nuka ukunmasha tuke túrunattawai. Warí ni Yusri̱n akasmatak tunáa túramunam akikmatak Israer shuaran uwemtikrarmai’ tajai” tímiayi. 14Kame Israer shuaran Matiannumia̱ nuwa̱ja̱i̱ apatak máwarmia nuka Sarú uchirí̱ Sémpriyayi. Nusha Semiun wea shuara úuntri̱yayi. 15Nuyá̱ Matiannumia̱ nuwa̱ mantamnamia nusha Sura nawantri̱ Kúspiyayi. Núnisaṉ Súraka Matiannumia̱ wea aentsu úuntri̱yayi. 16Tura Uunt Yus Muisaisan chicharuk 17“Matian aents itit awajkirum mániatarum. 18Warí ní túrutairi̱ji̱a̱i̱ wáitkiarmasmarme núnisaṉ Piúrnaja̱i̱sha tura ni umái̱ Kuspi úunt akupniu uchirí̱ nawantri̱ji̱a̱i̱sha anaṉkramamarme. Kame núnaka Piura itiurchatri̱ji̱a̱i̱ aents kaji̱niarma nui̱ nincha máwarmai” tímiayi.
Currently Selected:
Wek. 25: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
