Mat. 6

Péṉker túratniun Jesus unuiniamu

1 Ashí iimiainiai̱ṉ aya shuar íirsarti tusarum Yusna nu takasairap. Tu takaakrumni̱ṉkia Yus Apa nayaimpiniam pujana nu peṉké akirmákchattarme. 2Nu asamtai shuar atsuma nu yaya̱kmeka ashí shuar ujakairap. Anaṉkartin ainia nuka iruntai̱nmasha tura pepru jintí̱ wekasasha ashí iimiainiai̱ṉ shiir túrajai tusar nuna túrin áiniawai. Ju̱nasha ‘péṉker túrawai’ tu enentáimturarti tiniu ásar Yus akíatsa̱i̱ṉ aya tu enentáimturmaja̱i̱ṉ akinkiaruiti, nekas tajai. 3Antsu atsumainia nu ame yaya̱kmeka ú̱kam túrata. Yaaksha núnaka nekaashti. 4Ú̱kam túrakminkia ame Apa Yus ú̱kman wáiniua nu akirmáktatui.

Yus áujsatniun Jesus unuiniamu

(Ruk. 11:2-4)

5 Atumsha Yus áujeakrumsha ántar chichamtin ainia núnis áujsairap. Nu shuarka iruntai̱nmasha tura pepru jinti̱sha shuar íirsarti tusa wajakiar Yusan áujin áiniawai. Nekasan tájarme, Yus akíatsa̱i̱ṉ aya nú iismaja̱i̱ṉ akinkiaruiti. 6Tura ame Yus áujeakmeka amek kanutairmin waya̱m waiti epemim nui̱ ame Apa Yus áujsata. Nuyá̱ ame Apasha wáinchamunam pujá asa ame túramun wáitmak akirmáktatui.

7 Yus áujeakmesha ántram atak awaiṉkim nuke áujsaip. Israer shuarcha ainia nuka ‘Esaram áujeakuiṉkia Yus anturtuktatui’ tu enentáimiainiawai. 8Niji̱a̱i̱ métek ajasáirap. Átumka seatsrumni̱ṉ Yus Apa átum atsumamun nékawai. 9Nu asamtai Yus áujkuram jú̱nis títiniaitrume.

‘Ii Aparí̱ Yus, nayaimpiniam pujamna nu, ii Aparí̱nme.

Ame náarmincha shuar ántar pachischarti.

10 Ashí aentsnum ame akupkatin tsawantrum wari jeatí.

Ame wakeramuram nayaimpiniam umikma ana núnisaṉ ju̱ nuṉkanmasha uminkiati.

11 Aparu ii yurumkari̱ ashí tsawant amasta.

12 Tura ii nemasri̱ tsaṉkureajnia núnismek Aparu, ii yajauch túrutai̱ tumashri̱sha tsaṉkurkarturta.

13 Tunáa wakeruktin tsaṉkamkartukaip. Antsu ashí yajauch túratniunmaya̱ iin aṉkant awajkartusta. Tuke ashí aents akupkámniaitme. Núnisam Amesha tuke ti kakarmaitme. Tura tí shiiraitme. Tuma asakmin seaji. Nuke atí.’

14 Amesha chíkich shuar yajauch awajtamka nu tsaṉkureakminkia Yus Apa nayaimpiniam pujana nu amincha tsaṉkurtámprattawai. 15Tura chíkich tsaṉkureachkumni̱ṉkia Yus Apasha ame yajauch túrutairmin tsaṉkurtámprashtatui.

Ijiarmátniun pachis Jesus unuiniamu

16 Ijiarmárum Yus áujkurmesha wake mesekrum susuntrairap. Anaṉkartin shuar chíkich shuar ‘ijiarmáiti’ tu enentáimtursarti tusa tuma áiniawai. Nekasan tájame, Yuska akíatsa̱i̱ṉ aya nuja̱i̱ akikma áiniawai. 17Antsu ámeka ijiarmámsha péṉker temashmaram péṉker jáupmitia. 18Shuar ijiarmáiti tu enentáimturmasara̱i̱ṉ. Nuyá̱ ame Apasha wáinchamunam pujá asa ame ijiarmámun wáitmak akirmáktatui.

Wariṉsha ikiauṉkatniun pachis Jesus unuiniamu

(Ruk. 12:33-34)

19 Ju̱ nuṉkanmaya̱ wariṉsha núkap ikiauṉkatin enentáimtusairap. Warí ju̱i̱ṉkia mash mamúatsuk tura ka̱ya̱sha ju̱yu̱mchakait núnisaṉ kasasha wayá̱ kasamtsuk. 20Antsu nayaimpinmaṉka mash mamúatsui tura ka̱ya̱sha ju̱yu̱meatsui núnisaṉ kasasha kasamtsui. 21Tuma asamtai nayaimpiniam nekaska wariṉsha ikiauṉkata. Nui̱ṉkia ikiauṉkamuram tui̱ ikiusmam nu enentáimtusam pujustatme.

Aya̱shi tsáapnintri̱

(Ruk. 11:34-36)

22 Ame jí̱miji̱a̱i̱ tsáapin amiin waya̱mniaiti. Tuma asamtai ame ji̱mi péṉkeraitkiuiṉkia amiin tsáapin wayá̱ tuke tsáapniti. 23Antsu ame ji̱mi yajauchitkiuiṉkia tsáapin amiin waya̱chmin asamtai tuke kiritin átatui. Núnisaṉ yajauchia nu wakerakmeka péṉkera nu ame enentáimiin waya̱chmin asamtai tuke kirit ajastatui. Nu kiritcha imiá yajauchiti.

Yussha kuitcha mái̱mtek enentáimtuschamniaiti

(Ruk. 16:13)

24 Shuar jimiará úuntri̱n umirkatniun tujintiawai. Chikichan wakerak chikichnaka nakitrattawai. Chikichan umiruk chikichnaka umirkashtatui. Núnisaṉ átumka Yussha kuitcha mái̱mtek enentáimtustin tujintkiattarme.

Yus ni uchirí̱n péṉker wáinkiaiti

(Ruk. 12:22-31)

25 Tuma asamtai tájarme, wariniak yuátaj wariniak umartaj tura wariniak entsartaj tusarum nuke enentáimsairap. Yus iwiaaku átinian amasu asa yurumkancha amaschamniakait. Tura ju̱ aya̱shniasha najana asa entsatáincha amaschamniakait. 26Íiskuana chiṉkisha yurumkan arainiatsui, juuksha ikiuiniatsui. Túmainianak atumí Aparí̱ nayaimpiniam pujana nú Yusak ayurenatsuk. Atumsha chiṉkiji̱a̱i̱ naṉkaamaschakaitrum. 27Nu arantcha ti enentáimkiurmesha ¿nuja̱i̱ ishichkisha ékemsarmeksha tsakartatrumek?

28 Nuikia ¿urukamtai entsartincha timiá enentáimprum? Iistá, kuku̱jsha takachuitiat tura najanchaitiat 29tí shiirmach áiniawai. Yaunchu úunt akupin Saramúṉ ti shiir iwiarmamniuitiat kuku̱jia tímianchauyayi. 30Iis, nupa̱ yamái tsakaawai tura kashin aents tsupikiar jinium epeenawai. Tuma ai̱ṉ Yus ti shiir áentseatsuk. Nuna tura asa atumniasha nú péṉker waitmakchattawak. ¿Urukamtai Yus nekas enentáimtatsrum? 31-32Ju̱ nuṉkanam ana nu pachikiairap. Chíkich shuar Yusan nékainiatsna nu, wariṉ yuattajⁱ, umartajⁱ, entsartajⁱ nuna ti pachiniawai. Tura atumsha tu enentáimsarum weerap. Ame Apa nayaimpiniam pujana nu ame atsumamurmin nékawai. 33Tuma asamtai Yusai̱ péṉker ana nusha tura Yus akupeamuri̱sha emka enentáimtustarum. Túrakrumni̱ṉkia atsumamurmin Yus patas suramsattawai. 34Kashin átatna nuja̱i̱ itiurchat enentáimsairap. Kashinkia nusháa itiurchatri̱ji̱a̱i̱ tsawa̱rchattawak. Yamái tsawanta ju̱ja̱i̱ máakchakait.

Currently Selected:

Mat. 6: jiv

Highlight

Copy

Compare