Mat. 22

Métektaku chichamja̱i̱ nuatnaiyamun Jesus áujmatsamu

1Jesus ataksha áujmatuk ju̱na tímiayi 2“Yus akupeamunam pachinkiartin jú̱nis enentáimpramniaiti. Úunt akupin ni uchirí̱ nuateakui nampermamai. 3Túrak ni takarniúri̱n ipiaamautarum tusa akupkarmai. Tura ipiaamusha nakitrarmai. 4Ataksha chíkich takarniuncha ipiaamakrum ju̱ titiarum tusa akupkarmai. ‘Mash yurumkan iwiarajai. Waakarsha taṉkur ajaermasha kajeṉma áiniawai. Tuma asamtai ashí nuatnaiyamu namper iwiaramunam winiarti túramui titiarum’ timiai. 5Támaitiat nú ipiaamusha nakitrarmai. Chikichik ni nuṉke̱n wemai. Chikitcha kuítian suruktinian wemai. 6Chikitcha ipiakratniun achikiar yajauch awajsarmai tura chikichnaka máwarmai. 7Túramtai úunt akupin ti kajek ni suntari̱ mash mátarum túrarum ni je̱e̱ mash ekemáktarum tusa akupkarmai. 8Nuyá̱ ataksha ni takarniúri̱n akupkámai. ‘Nuatnaikiatin námper mash iwiaramuiti. Tura nu ipiaamu winichmin armai. 9Tuma asamtai pepru jintí̱ werum ashí shuar náṉkamas wáintrum nu ipiaatarum’ timiai. 10Takui̱ takarniúri̱ jíinkiar pepru jinti̱n wajainian yajauch shuarnasha péṉker shuarnasha ashí ipiaawarmai. Túramtai je̱a̱ piakmai.

11 Nuyá̱ úunt akupin ipiaamun íisartaj tusa waya̱mai. Nui̱ shuaran péṉker iwiarmamprachun wainkiamai. 12Tura timiai ‘Umpá, ¿urukamtai nuatnaiyamunam entsatái̱ pushí entsatsuk waya̱m?’ Tutai nu áishmaṉ tákamtak pujusmiayi. 13Nuyá̱ úunt akupin yurumka ajaaman chicharuk ‘Achikrum nawe̱nmasha uwejnumsha jiṉkiarum a̱a̱ jí̱i̱krum kiritniunam ajapatarum. Nui̱sha ti úttin tí waitsatin átatui’ timiai. 14Kame untsurí ipiaamu áiniawai antsu ishichik achikma áiniawai” tímiayi.

Uunt akupin Sésar akiktin

(Mar. 12:13-17; Ruk. 20:20-26)

15Nuyá̱ Pariséu chichaman najatawar itiurak uyu̱matkiakaintiaj tusar tiármiayi. 16Túrawar ni shuari̱ncha tura akupin Irutisa nemarniuri̱sha Jesusan akuptúkarmiayi. Nisha jeariar Jesusan chicharainiak “Uuntá, amesha nekas chicham chichaame. Nu nékaji. Chíkich shuar tuinia nu ántutsuk nekasam Yus Chicham jintíame. Shuar shiir enentáimturarat tusam jintíatsme. 17Tuma asamtai ju̱ nekaatai tusar wakeraji. ¿Uunt akupin Sésar akikminkiait?” tiármiayi.

18Jesus ni yajauch enentáiji̱a̱i̱ anintramun nekáa chichaak “Aya shiir chichamtiniaitrume. ¿Urukamtai uyu̱matkiarturtin wakerutarum? tímiayi. 19Wats Sésar akiktinia nú kuit itiartitiarum” takui̱ chikichik kuítian itiariármiayi. 20Nuna iis Jesus anintrak “¿Ju̱i̱ yana yapimpiait tura yana naari̱ áarmait?” 21Tutai “Uunt Sésarna” tiármiayi. Tuíniakui Jesus chicharainiak “Nuikia uunt Sésarna nu, Sésar susatarum. Tura Yusna nusha Yus susatarum” tímiayi. 22Tura nuna antukar ti enentáimprarmiayi. Tura ikiuiniak wéarmiayi.

Jesusan jakamunmaya̱ nantaktin anintramu

(Mar. 12:18-27; Ruk. 20:27-40)

23Nu tsawantai̱k Satuséusha Jesusan tariarmiayi. Satuséuka jakamunmaya̱ nantakchatniuiti tuíniawai. Nuna tiniu ásar ju̱na Jesusja̱i̱ áujmatsarmiayi. 24“Uuntá, Muisais ju̱na áartampramiaji ‘Áishmaṉ uchin yajutmatsuk jakamtaiṉkia ni yachi̱ nu nuwa̱n nuatak ni yachi̱n yajutmatrati’ tu áarmiayi.Muis. 25:5 25Ayu, íi shuarnum siati yáchintin armai. Iwiá̱i̱ nuatak uchin yajutmatsuk jakamai. Tura waje̱n ni yachi̱n ikiurkimiai. 26Tura nisha nuatak uchin yajutmatsuk jakamai. Tura chikitcha núnisaṉ jakamai. Tura chikitcha siati armia nu ashí nuatkar jákarmiayi. 27Nuyá̱ nuwa̱sha jakamiayi. 28Jakamunmaya̱ nantakiartatna nui̱sha nekassha ¿yana áishri̱n ati? Ashí nin nuatkacharmakia” tiármiayi.

29Tuíniakui Jesus chichaak “Yus Chichamsha nékachkuram tura Yusa kakarmari̱sha nékachkuram nantaktin atsawai tákuram ti awajiarme. 30Nekaatarum. Jakamunmaya̱ nantakiaruka nuatkachartatui. Antsu Yusa suntari̱ nayaimpiniam pujuinia núnisar núwencha pujusártatui. 31Túrasha jakamunmaya̱ nantakiartatna nu nekaatajtsa wakerakrumka ju̱ enentáimsatarum. Muisais aarma nu áujsachukaitrum. Jú̱nis áarmiayi 32‘Wikia Aprajáma Yúsri̱ntjiai, Isaka Yúsri̱ntjiai, Jakupu Yúsri̱ntjiai.’ Warí, Yus jaká Yúsri̱nchuiti. Antsu iwiaaku ainia nuna Yúsri̱nti” tímiayi.Jiin. 3:6,15 33Ashí aents tu jintíamun antukar ti enentáimprarmiayi.

Yus akupkámu imiá enentáimtustin

(Mar. 12:28-34)

34Satuséu Jesusan ái̱ktinian tujintkiarmatai Pariséu nuna antukar iruntrarmiayi. 35Tura chikichik Pariséu jintintin asa Jesusan uyu̱mtikiataj tusa aniasmiayi 36“Uuntá, Yus akupkámu ¿túa imiá naṉkaamas enentáimtustiniait?” 37Tutai Jesus chichaak “Ju̱i̱ti, ‘Ame Yúsrum takamtsuk enentáimji̱a̱i̱ aneeta. Ashí ame wakanmiji̱a̱i̱sha tura ame enentáimmiarmiji̱a̱i̱ nekas enentáimtusam aneeta.’ Muis. 6:5 38Núiti emka ashí akupkámu naṉkaamas enentáimtustinia nu. 39Chikitcha ju̱ja̱i̱ métektaku awai. Nusha jú̱nis awai ‘Ame írutramuram ame aya̱shim aneamna nútiksamek aneata.’ Riw. 19:18 40Nu jímiar akupkámu umirkam ashí Muisais akupkámia nusha tura ashí Yúsnan etserin unuiniararmia nusha umirkattame” tímiayi.

Kristu Tawit wéaitiat Yusa Uchirí̱nti

(Mar. 12:35-37; Ruk. 20:41-44)

41Tura Pariséu tuke irunar pujuiniakui 42Jesus anintrak “Kristu tutai ¿ya wea átiniait. Warí enentáimtarum atumsha?” takui̱ “Tawit wea átiniaiti” tiármiayi. 43Tuíniakui Jesus chicharainiak “Nuikia ¿urukamtai Tawit, Yusa Wakaní̱ titiá tutai Krístun ‘winia úuntur’ timia? Iis, Tawit ju̱na tímiayi 44‘Yus winia Úuntrun ju̱na chichaak

“Akupin pujutai̱nium winia untsuurui̱ni̱ pujusam Ame nemasrumin nupetkan ámin umirtamkarti tusan amamaam nákarsata” tímiayi Yus.’ YKan. 110:1

45 Wátsek, Tawit Krístun ‘winia úuntur’ tai̱sha ¿itiurak ni pampaṉmári̱ ati?” tímiayi Jesus. 46Nuna takui̱ peṉkesha ái̱kcharmiayi. Túrawar atakka uyu̱mamtikiatai tusar Jesusan aniascharmiayi.

Currently Selected:

Mat. 22: jiv

Highlight

Copy

Compare