Ruk. 24
24
Jesus nantakmia
(Mat. 28:1-10; Mar. 16:1-8; Jṉ. 20:1-10)
1Tumiṉtin káshik kuṉkuinian iwiaramun júkiar nu nuwa̱ Jesus iwiarsamunam weriarmiayi. Tura chíkich nuwa̱sha atampriarmiayi. 2Tura iwiarsamu kaya atutkamu urani̱ aan wáinkiarmiayi. 3Tura waya̱war Uunt Jesusa aya̱shi̱n wáinkiacharmiayi. 4Wáinkiachu ásar ashamkarmiayi. Tura “itiurkatjik” tiármiayi. Tumai̱ jimiará áishmaṉkan pushin wincharpátniun entsaru niin ayamach wajainian wáinkiarmiayi. 5Nuna wáinkiar ti sapijmiainiak tsuntsumawarmiayi. Túmakui̱ nu áishmaṉ chicharainiak “¿Iwiaakusha urukamtai jakaanumsha e̱a̱rum?” tiármiayi. 6“Ju̱i̱ pujatsui. Antsu nantakní̱. Nékatsrumek. Nisha Kariréanam tuke pujus 7‘Wi, Aents Ajasuitjiana nu, yajauch aentsnum surunkattajai. Túran krúsnum mantamnattajai. Tura menaintiú tsawantai̱ nantaktiatjai’ turamchamkarum” tímiayi.
8Nuna takui̱ Jesus timian enentáimprarmiayi. 9Tura iwiarsamunmaya̱ waketki̱ taar Jesusa unuiniamuri̱n aunse armia nuna tura chikichnasha ashí nu túrunamun ujakármiayi. 10Jesusa unuiniamuri̱n ujakármia nu ju̱ áiniawai Maktaranmaya̱ Marí, Juánasha, Sántiaku nukurí̱ Marisha tura chíkich nuwa̱ja̱i̱. 11Tura Jesusa unuiniamuri̱sha nuwa̱ tuíniakuisha nekasaiti tu enentáimtsuk “wáuruk tuíniawai” tiármiayi.
12Túrasha Pítrusha jiinkí̱ Jesus iwiarsamunam tsékeṉki̱ werimiayi. Jeá, init iis aya tárachik tepenan wainkiamiayi. Tura túrunamia nuna ti enentáimiar ni je̱e̱n waketkimiayi.
Emaus wetai jintianmaani̱ túrunamu
(Mar. 16:12-13)
13Nu tsawantai̱k Jesusa nemarniuri̱ jímiar Emausnum wéarmiayi. Emauska Jerusaréṉnumia̱ aunse kirumitru jeá pujawai. 14Túrunamia nuna chichaki̱ wéarmiayi. 15“Itiurkit” tu áujmatki̱ wenai̱ imia Jesus taa nui̱ páchiniak niji̱a̱i̱ wéarmiayi. 16Tura wáinkiariat nekaashtin asamtai yait nekaacharmiayi.
17We wénakua Jesus chicharainiak “Jintiasha ¿warí áujmatkirum wéarum? ¿Urukamtai kúntuts enentáimprum?” tímiayi. 18Chikichik, Kreupas náartin chicharuk “Jerusaréṉnum túruna nuna ashí nékainiawai. ¿Ámeka amekek túrunamia nu nékachu páchitkiam?” tímiayi. 19Tutai Jesus chichaak “¿Warí urukait?” Tutai chichainiak “Enta, Nasarétnumia̱ Jesusa túrunamuri̱ taji. Nisha Yúsnan etserin asa Yusa kakarmari̱ji̱a̱i̱ chichasmiayi tura nuna kakarmari̱ji̱a̱i̱ takasmiayi. Núnaka ashí aents nékainiawai. 20Tura Yúsnan pujurniu uuntri̱ tura ii pépruri̱ uuntri̱ ‘yajauchin jakamnia túrayi’ tusar ‘krúsnum mantamnati’ tiármiayi. 21Tura ii Israer shuartin uwemtikrampratin tu enentáimsamji. Tura ni mámusha menaintiú tsawant naṉkaamasai. 22-23Túrasha ii nuwa̱ ni iwiarsamunam yamái káshik weriar ni aya̱shi̱n wáinkiacharmai. Tura ‘Yusa suntari̱ wainkiaji tura Jesus iwiaakuiti’ túramji” tiarmai. “Nuna tu ujatmákakrin ti enentáimpraji. 24Nuyá̱ ii shuar iwiarsamun weriar nuwa̱ tiarmia tímiatrusaṉ wáinkiarmiayi. Tura Jesusnaka wáinkiacharmai.” Tu ujakármai Jesusan. 25Nuyá̱ Jesus nin chicharainiak “Enentáimchaitrume. Ashí Yúsnan etserin tiarmia nu wau enentáimtatsrume. 26¿Yusa anaikiamuri̱, Kristu tutai, shiir awajnatsuk ti wáitsashtinkiait?” tímiayi. 27Tura nuyá̱ Yus Papinium Muisais aarmia nuyá̱ jukin ashí Yúsnan etserin ni túrunatniuri̱n áararmia nuna jintintiatasa naṉkamamiayi.
28Kame ni wéarmia nú peprunam jeawarmiayi. Tura Jesuska nui̱ naṉkaamaki̱ wétaj tau ajamiayi. 29Tura nisha chicharainiak “Weep. Iiji̱a̱i̱ pujusta. Warí, nantu akaikiyi, kirit ajatémsai” tiármiayi. Tutai Jesus niji̱a̱i̱ pujustaj tusa waya̱miayi. 30Tura niji̱a̱i̱ irunar ekentsa yurumtainiam pujus yurumkan achik Yusan yumiṉkias nincha puuk súsarmiayi. 31Nu chichamaik ni ji̱ uranniua núnikiarmatai Jesusan nekaawarmiayi. Tura Nisha nú chichamaik meṉkakamiayi. 32Tura nu shuarsha mai̱ tunai ajainiak “Jintia winis Nisha Yus Papin jintintramuk nekas ii enentái̱n shiir enentáimtikramprachmakajⁱ” tiármiayi.
33Nuyá̱ Emausnumia̱ wárik jíinkiar Jerusaréṉnum waketkiarmiayi. Nui̱ Jesusa unuiniamuri̱n aunse armia nuna tura chíkich shuar Jesusan nemariarmia nunasha iruntrar pujuinian wáinkiarmiayi. 34Aunse armia nusha chicharainiak “Uunt Jesus nekas nantakní̱. Semuṉ Nin wáinkiaiti.” 35Tutai nisha jintiá túrunamun ujakármiayi. “Jesus yurumkan ajaamakui nui̱ nekaamji” tiármiayi.
Ni unuiniamuri̱n Jesus wantintiukma
(Mat. 28:16-20; Mar. 16:14-18; Jṉ. 20:19-23)
36Nuna áujmatuk pujuiniai̱ Jesus aya aneachma ajapén wajas “Shiir enentáimsatarum” tímiayi. 37Nuna antukar, ti sapijmiakar, wakanchashit, enentáimsarmiayi. 38Tura Jesus chicharainiak “¿Urukamtai sapijmiakrum wakanchashit, tu enentáimsarum? 39Winia uwejrusha, nawersha íirtustarum. Wíkitjiai. Wats takarsa íirsatarum. Warí, wakancha aya̱shtinkiait, ukunchtinkiait” tímiayi. 40Nuna tinia ni uwejé̱ncha nawe̱ncha iniaktusarmiayi. 41Warainiayat sapijmiainia ásar Nímpiashit tu enentáimtusarmiayi. Tuma asamtai nin chicharainiak “¿yurumak takakrumek?” tímiayi. 42Takui̱ namaknasha míshkincha súsarmiayi. 43Tura Jesus nuna achik nisha iimiainiamunmaṉ yuámiayi. 44Tura nin chicharainiak “Winia túrutawarma nuna Wi atumji̱a̱i̱ nuik pujusan tímiajrume. Nekas uminkiatniuyayi. Iis, wi túrunatniurun Muisais aarmia nusha, Yúsnan etserin aarmia nusha tura Yus Kantanmasha aarma ana nusha ashí uminkiatniuyayi” tímiayi.
45Nuyá̱ Yus Papinium áarman paant nekaawarti tusa ni enentáimmiari̱n iwiaaku awajsamai. 46Jintintiuk chichaak “Yusa anaikiamuri̱ Kristu tutai jaka menaintiú tsawantai̱ jakamunmaya̱ nantaktinia nu yáunchuk áarmauyayi. Tura Wi nú Krístuchukaitiaj.YKan. 22:1; Isa. 53:1-12; Use. 6:2 47Winia náarun pachisar Jerusaréṉnumia̱ naṉkama ashí nuṉkanam nu chicham etsernaktinia nu áarmauyayi. Shuar ni yajauch túrunamuri̱ tsaṉkurnarat tusar enentái̱n yapaji̱átniuiti. Tura tu etserkatniua nusha yaunchu áarmauyayi.Mks. 1:11 48Tura wi túrunamu neka asarum etserkatniuitrume. 49Tura winia Apar, winia Wakantrun súsartatjai, turammarumna nuna akuptúktatjarme. Tura nayaimpinmaya̱ táatsa̱i̱ṉ ju̱i̱ Jerusaréṉnum pujustarum. Taa ni kakarmari̱n suramsattarme” tímiayi.Tur. 2:4
Jesus nayaimpiniam wakamu
(Mar. 16:19-20)
50Nuyá̱ Jesus Jerusaréṉnumia̱ júkiar Petanianam ejeniarmiayi. Tura nui̱ ni uwejé̱ takuí “Yus yaintmakarti” tímiayi. 51Nuna tu pujus niiya̱ kanakmiayi. Tura nayaimpiniam junakmiayi. 52Ni unuiniamuri̱sha Nin imiá shiir enentáimtusarmiayi. Tura nuyá̱ ti warasar Jerusaréṉnum waketkiarmiayi. 53Tura Yusa Uunt Je̱e̱n pujusár Yusan shiir awajú pujuarmiayi.
Áukete.
Currently Selected:
Ruk. 24: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.