Jns. 1
1
Junas Yusai̱ya̱ pisarma
1Uunt Yus Amitiái uchirí̱ Junasan chicharuk 2“Uunt pepru Níniwiniam wetá tura étserkum Uunt Yus chichaak ‘Aneararti.’ Warí, ju̱ péprunam yajauchin ti túruinia nuna nekaajai, túramprume tu etserkata” tímiayi.
3Támaitiat Junaska nuna nakitiak Uunt Yusan u̱mpruktatjai tu enentáimias Társes nuṉkanam wéak Jupi péprunam jeamiayi. Nui̱ jeá uunt kanú Társes nuṉkanam wéan jearí akikmak eṉkempramiayi. 4Túrasha Uunt Yus nasen ti kakarman nayantsanam aju̱a̱rmiayi. Túram tí nasentuk nayantsa tampari̱ uunt kanun intiaksattuk awajmiayi. 5Tímiatmakui kanú ewekámniusha ti sapijmiakar nase meṉkakat tusar aṉkant aṉkant ní yusri̱niak kakaram untsukarmiayi. Tura kanu wampu ajasat tusar kanunam wariṉsha yarumeamun nayantsanam utsaṉkarmiayi. Túrasha Junaska uunt kanunam nú init wayá̱ tepes ti kanaruyayi. 6Nuya̱i̱k kanú ewekámniu úuntri̱sha Junasan kanú tepá jearí chicharuk “Aya káninia ¿warí imiá kanusha teperniuitiam? Nantakim ame yúsrum áujsata. Túram iincha waitnentramakriṉkia jákachaintiajti” tímiayi.
7Nui̱ṉkia nuamtak chichainiak “Wats ¿ya umitmakmaja̱i̱ṉ jú̱niajⁱ? Nekapkamtai̱ji̱a̱i̱ nekapsar iistú” tiármiayi. Tura nu nekapkamtai̱ji̱a̱i̱ nekapes iisar Junas umitmakun nekaawarmiayi. 8Tura nekaawar chicharainiak “¿Urukamtai jú̱niajⁱ? etserkata. ¿Amesha warinma takaawitiam? ¿Warí nuṉkanmaya̱ winiam tura tú peprunmaya̱itiam?” tiármiayi. 9Tuíniakui Junas chichaak “Wikia Israer shuaraitjiai. Nayaimpinmaya̱ Uunt Yusan nayantsan tura nuṉkancha najanamia nu Yusan ashamniuitjiai” tímiayi.
10Kame Úunt Yusai̱ya̱ pisaajai tu etsertumakui nu áishmaṉsha ti ashamkar chicharainiak “Tsej ¿ausha urukamtai áiniam?” tiármiayi. 11Tura nayantsasha nase umpuam nu arant ajakui Junasan chicharainiak “Nayants tímiajniana ju̱ miyaaku ajasat tusarsha amincha ¿warí itiurkatjik?” tiármiayi. 12Nu tutai Junas chichaak “Nase jú̱tikramarmena ju̱ka wi umikchamuja̱i̱ jú̱niawai. Tuma asamtai nayantsanam aju̱ntkatarum. Nui̱ṉkia nayantsasha miyaaku ajastatui” tímiayi. 13Tura kanú ewekámin armia nu áishmaṉ ataksha waketkir kukar péemkatai tusar ti kakaram wiantiarmiayi. Túrasha nayantsa chíchimiri̱ nu kakaram ajasmatai tujintkiarmiayi. 14Nui̱ṉkia Uunt Yusan untsuiniak “Maa, Uunt Yusá, ju̱ áishmaṉka jákatniuri̱n waitneasam amukratkaip. Tura tunamkachuitiat nayantsanam jakermataisha iinkia makukratip. Warí Uunt Yusá, Ame wakeram núnisam túrame” tu tiármiayi.
15Nuna tiar Junasan nayantsanam aju̱nkármatai nu chichamaik nayantsasha miyaaku ajasmiayi. 16Kame nu túrunamtai wáinkiar kanú ewekámniusha Uunt Yusan ti ashamainiak “ju̱sha nekas umikiartatji” tiar namaṉ maar Uunt Yusan súsarmiayi.
17Túrasha Uunt Yus uunt namakan Junasan ku̱jarat tusa iwiarturuyayi. Nu ku̱jaram menaintiú tsawant menaintiú kashi namaka tantane̱n eṉkemmiayi.
Currently Selected:
Jns. 1: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
