San. 2
2
Shuar antra akantrashtin
1Yatsuru, ii Uuntri̱ Jesukrístu winchari̱ timiá shiira nu enentáimtatirmeka shuar akantratin enentáimsairap. Shuara enentái̱ enentáimtsuk antsu aya pátatek wáinmena nuja̱i̱ aents akantram niisháa enentáimturairap. 2Iis, iruntrumna nui̱ shuar kuítrintin kurí aniyu aweera tura péṉker iwiarmampra waya̱shtimpiash. Tura núnisaṉ chíkich kuítrincha aruta entsaru waya̱shtimpiash. 3Tura kuítrinniua nu “Péṉkera ju̱i̱ pujusta” tíchatameash. Tura kuítrinchaka “Atú wajauta, túrachkumsha ju̱i̱ nuṉkaṉsha pujusta” tíchatameash. 4Nu tákumka yajauch enentáimpram jimiará enentáiji̱a̱i̱ aents enentáimtame.
5Aneamu yatsuru, antuktarum. Ju̱ nuṉkanam kuítrincha ainia nuna Yus achikiuiti Ní shuar ajasár Nin nekas enentáimtin ajasártinian. Tura ashí nayaimpiniam írunna nunasha Yus nin tsaṉkatkattawai. Ashí shuar Yusan aneena nuna anajmatra asa nin tsaṉkatkattawai. 6Antsu átum kuítrincha natsant awajearme. Iistá, kuítrinniua nuka timiá itiurchat awajtámainiatsuk. ¿Nuiṉkia achirmak chichamprinnium japiki̱ júramprumna nuka níchuk ainia? 7¿Níṉkichuk ainia Kristu naari̱ shiira nuna ántar pachikiar peṉké yajauch áujmatainia nu? Tura átumka nuna naari̱ tuke shiir awajkurmin ashí shuar “Kristu shuari̱” turamainiawai.
8Yus Chichamnum ju̱ akupkámu nekas péṉkeraiti “Ame aya̱shim aneamna núnismek ame írutramuram aneeta.” Riw. 19:18 Nu nekas umirniuitkiurmeka maak. 9Nú enentáiji̱a̱i̱ kuítrinniuja̱i̱ chichasminiaiti. Tura nuyá̱ kuítrinchaja̱i̱ shiir chichaachkumka niisháa enentáimta asam nu akupkámu umirkachuitme. Tunáa túrame. Núnismek Yusa akupkámuri̱ji̱a̱i̱ amek sumamame. 10Chíkich akupkámu írunna nu ashí umikiam tura aya chikichik akupkámu umikchamka nuikia ashí akupkámu umircha ajasume. 11Iis, Niṉki Yusak chichaak tíchamka “tsanirmawaip.” Tura chikichnasha “maṉkartuawaip” Jiin. 20:13-14; Muis. 5:17-18 tímiayi. Nu asamtai shuar tsanirmatsuk túrasha maṉkartakka Ni wakeramun umirtsui. 12Kristu aṉkant awajtámsamtai ii yamái ni akupkámuri̱ yúpichuch umirkamniaitji. Nu asamtai nú akupkámuja̱i̱ métek wekaakrumni̱ṉkia Yus “péṉker túraitme” turamtatji. Tura umikchakriṉkia “péṉker umikchaitme” turamtatji. Tura nu enentáimsar péṉker chichasar takasar wekasatniuitji. 13Chikichan waitnentachkuṉka waitnennatsuk asutniáttawai. Tura waitneṉkratniuitkiurni̱ṉkia tsawant jeamtai Yus iin waitnentramprattaji.
Yus enentáimtustin tura umirkatniusha
14Yatsuru, shuar “Yusan shiir enentáimtajai” táyat tura péṉker túrachkuiṉkia péṉkerashit. Nuja̱i̱ uwemprattawak. 15Wátskea, Yus shuar áishmaṉsha nuwa̱sha entsatái̱ri̱n tura yurumkan atsumashtimpiash. 16Tura ame nékayatmek aya̱shi̱ atsumana nu sútsuk tíchatapash “Péṉker wetá, entsatái̱ entsaram péṉker yurumáta.” ¿Nu sútsuk tákum péṉkerkait? 17Núnisaṉ takakmamu iniakmatsuk Yus enentáimtustinkia jaka mashiarua áintsaiti.
18Tura shuar tíchanpiash “Chíkich takaawai tura chikitcha Yusan shiir enentáimtawai. Mai̱ péṉkerchakait” tíchanpiash. Wats, ame Yus enentáimtamu takatsuk paant iniaktusminiashitiam. Antsu wikia péṉker takatruja̱i̱ Yus enentáimtamun paant iniaktustatjai. 19Nekas “Yus chikichkiti” tu enentáimtame. Nuka péṉker túrame. Nunasha iwianchcha nékainiawai túrak kurainiawai. 20Netse enentáimpraip. Yus wakeramu takaachkumka Yus enentáimtustin ántraiti. Kame nu ¿nekaatin wakeramek? Iistá. 21Aprajámka murik maar Yus sútai̱nium ni uchirí̱ Isakan surittsuk Yusan susamiayi. Tura suritkiacham Yus “Péṉkeraitme” tímiayi. 22Páantchakait. Aprajám Yusan shiir enentáimtak umirkamiayi. Umirchakka Yusan enentáimtamun ántar a̱a̱yi. Tura umirka asa Yus enentáimtamun umikmiayi. 23Nuja̱i̱ Yus Chicham aarma nu uminkiamiayi. Ju̱i̱ti, Aprajám Yusan shiir enentáimtusmiayi tura Yus chicharuk “Máakete. Núja̱i̱ṉkia tuke péṉker túraitme Wiji̱a̱i̱” Naṉ. 15:6 tímiayi. Aprajámka nekas “Yusa Amikri̱” tu náamkamiayi.
24Páantchakait. Shuar aya Yusan shiir enentáimtamuja̱i̱nchuk tura péṉker takasmaja̱i̱sha Yus nin shiir enentáimtawai. 25Núnisaṉ Raap tsanirmataiyayi. Túmaitiat Israera suntari̱n mamikmauta tusar akupkámun ni je̱e̱n itiaawar tura ú̱kar chíkich jintianam akupak uwemtikrarmiayi. Nuna túramtai Yus “péṉkeraitme” nincha tímiayi. 26Aya̱sh wakantichuka jákachukait. Núnisaṉ Yus enentáimtustin tura ni wakeramu takaachkurkia, jaka áintsaṉ ántraitji.
Currently Selected:
San. 2: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.