Jiin. 7

Yus ni kakarmari̱n iniakmasma

1Nuyá̱ Uunt Yus Muisaisan chicharuk “Wi áminkia Parauṉ enentáimtusmaka yusa núnis awajsaitjiame. Nuyá̱ yátsum Araunka Parauṉkai̱ ame chichammin etserin átatui. 2Tura ámeka Wi ashí títiatjamna nu ame yátsum Araun ujakta. Nuya̱ṉka ni Parauṉja̱i̱ Israer shuar Ejiptunmaya̱ ji̱i̱rar akupkarat tusa chichamprittiawai. 3Ejiptunam aents túrachminian túrakun ti kakarman iniaktusartatjai túrasha Parauṉka enentái̱nkia ikiatsuátrattajai. 4Túrasha Parauṉka atumniaka peṉké umirtamkashtatrume tura Ejiptunmaya̱ṉka kakaram asutiáwartatjai. Tura winia suntar, Israer shuar ainia núnaka ti naṉkamantu kakarmarja̱i̱ péṉkera nuna túrakun Ejiptunmaya̱ ji̱i̱rartatjai. 5Wi Ejiptunmaya̱ aentsun kakaram asutiáwaran tura Israer shuar nui̱ pujuinia nuna ji̱i̱rarmatai nui̱ṉkia Ejiptunmaya̱ aents Wikia Úunt Yusaitjiana ju̱na nekarawartatui” tímiayi. 6Nuya̱ṉka Muisais, Araunja̱i̱ Uunt Yus timia ímiatrusaṉ túrawarmiayi. 7Kame Parauṉkan chichasarmia nui̱ṉkia Muisaiska uchaintia uwí takakuyayi tura Araunka uchaintitráis uwí takakuyayi.

Arauna wai̱ri̱

8Uunt Yus Muisaisan Araunja̱i̱ chicharainiak 9“Parauṉ chichartamuk ‘Aentsti túrachmin túrakrum iniakmastarum’ túramkurmincha Araun chicharkum ‘Parauṉ íimmianum wái̱ram aeprusam napi najanartatui’ titiá” tímiayi. 10Muisaissha tura Arauncha Parauṉ pujamunam jeawar Yus timia ímiatrusaṉ túrawarmiayi. Tura Parauṉsha núnisaṉ ni takarniúri̱sha iimiainiamunam Araun ni wái̱ri̱n nuṉká aju̱a̱ram napi najanarmiayi. 11Tura Parauṉka unuimiákuncha núnisaṉ uwishniuncha ikiankamiayi. Tura nisha ti neka ásar ni anaṉkartutairi̱ji̱a̱i̱ ímiatrusaṉ túruiniak 12aṉkant aṉkant ni wái̱ri̱n nuṉká naṉkimiáwarmiayi. Túram napi najanakarmiayi. Túrasha Arauna wai̱ri̱ uwishniu wái̱ri̱n yuruawarmiayi. 13Tura Uunt Yus nuik timia núnisaṉ Parauṉsha ni enentái̱n ikiatsuár Araunnasha tura Muisaisnasha peṉké anturkacharmiayi.

Emka asutkiaka entsa numpa ajasma

14Nuya̱sha Uunt Yus Muisaisan chicharuk “Parauṉka enentái̱ tí katsuarmatai Israer shuaran akupratniun peṉké nakitiawai. 15Túrasha kashin káshik Parauṉ entsá wéakui weritia. Túram Niru kaanmatkarin wai̱ napi najanarma nu takusam naka wajattsata. 16Tura chicharkum ‘Uunt Yus, Israer shuara Yusri̱, amiin winia akattúr akuptak “Wi shuar kampuntin atsunum wéar winia tikishmátrurarat akupkarta” tímiaitiatam yamaiya̱ tímiaja̱i̱sha peṉké anturtukchame túramui’ titiá” tímiayi. 17Tuma asamtai Uunt Yus jú̱nis tawai “Wikia Úunt Yusaitjiai tura ju̱ja̱i̱ nekarattame. Iistá, wi wai̱n takakjana ju̱ja̱i̱ Niru entsá awatmiatai numpa ajastatui. 18Túruna namaksha ashí kajinmatai Nírusha ti meje̱ttawai. Túrunamtai Ejiptunmaya̱ aentssha entsan muí̱jiainiak umartinian tujintkiartatui” tímiayi.

19Nuya̱ṉka Uunt Yus Muisaisan chicharuk “Araun chicharkum ‘Ejiptunam ashí entsa írunna nui̱ úuntri̱ncha, entsa akatai nuṉka táurmanumsha, entsa pajamtai ainia nui̱sha tura entsa yaraka ikiutai̱nmasha aya númpak ajasarat tusam ame wái̱ram nuní̱ iwiaiṉkiata. Nu túrawakmin entsa ikiutai̱ numiji̱a̱i̱ tura kayaja̱i̱ najanamunam entsa ainia tímianaisha Ejiptunmaṉka ashí aya númpak ajasártatui’ titiá” tímiayi. 20Nuyá̱ Uunt Yus timia asa Muisaiska Araunja̱i̱ ímiatrusaṉ uminiak Parauṉsha tura ni takarniúri̱sha nui̱ matsatainiai̱ ni wái̱ri̱ji̱a̱i̱ Niru entsá awatim aya númpak ajasmiayi. 21Túrunamtai Nírunam namak irunmia nusha kajinkiarmiayi. Tura entsasha ti meje̱e̱mtai Ejiptunmaya̱ aents nu entsan umartinian tujintkiarmiayi. Kame ashí Ejiptumaṉka entsa aya númpak ajasármiayi.

22Tura Ejiptunmaya̱ uwishin pujuarmia nui̱ nú túramun wáinkiar ni anaṉkartutairi̱ji̱a̱i̱ nútiksaraṉ túrawarmiayi. Nuja̱i̱ Parauṉsha ni enentái̱ tí katsuram ajasu asa Uunt Yus timia núnisaṉ peṉké antukchamiayi. 23Tuma asa Parauṉsha núnaka peṉké páchitsuk ni je̱e̱n waketkimiayi. 24Ashí Ejiptunmaya̱ aents entsa úuntri̱ya̱ umarchamnia ajasmatai entsa umartin wáinkiatai tusar Niru entsá yantamach wa̱a̱n táukarmiayi. 25Tura Uunt Yus Nírun awatim numpa awajsámia nuya̱ṉka siati tsawant naṉkaamasmiayi.

Currently Selected:

Jiin. 7: jiv

Highlight

Copy

Compare