Tur. 20

Papru Masetúnianam tura Krésianam wema

1Charaatum ajasua amikiarmatai Papru Yus shuaran untsuk Yúsnan jintintrataj tusa ikiaankarmiayi. Tura áujas ikiukí̱ Masetúnianam wémiayi. 2Nú nuṉkanam wekaráktak, Yus shuaran jintintrar ikiaká̱rarmiayi. Tura nuya̱sha Krésianam jeamiayi. 3Nui̱ṉkia menaintiú nantu pujusmiayi. Tura nuya̱ṉka kanuja̱i̱ Sírianam wétajtsa pujus Israer shuar chícham jurusman anturmamak “antsu Masetúnianmaani̱ wetajai” tímiayi. 4Tura Piríanmaya̱ áishmaṉ Súpater Páprun atamprimiayi. Tura Tisarúnikianmaya̱ Aristárkusha Sekuntusha Tírpinmaya̱ Káyusha Timiutéusha Ásianmaya̱ Tíkikiusha, Trúpimiusha ashí nu shuar Jiripiusnum Páprun atampriarmiayi. 5Túrawar nisha emki̱ wéar Trúasnum jeawarmiayi. 6Tura iisha paṉ karin eṉketáchma námper amukámtai iisha Jiripiusnumia̱ jíinkir, kanunam eṉkemprar Masetúnianmaya̱ jiinkimji. Tura seṉku tsawant naṉkaamasmanum emki̱ wéarmia nu amayá̱ṉkarmiaji Trúasnum. Tura nui̱sha siati tsawant pujusármiaji.

Trúasnum túrunamu

7Tura tumiṉtin kí̱arai̱ Jesukrístu enentáimtusar yurumátai tusar iruntrarmiaji. Tura Papru Yus shuaran jintintrámiayi. Kame Pápruka kashinkia wétin asa chicháa chichaakua kashi ajapéṉ ejemiayi. 8Tura yakí̱ menaintiú patarmanum tesamu amia nui̱ iruntrarmiaji. Nui̱sha ji ekemárma untsurí irunmiayi. 9Tura nui̱sha natsa Eutikiu áaṉkamunam ayamas pujusmiayi. Tura Papru ti esaram chichaakui nú natsasha kari̱ pujamiayi. Tumá pujus kanuki̱ yakí̱ awarmanumia̱ akaikí̱ iniaamiayi. Tura peṉké jakaan júsarmiayi. 10Tura Papru akatúki̱ tsuntsumpruá miniakkamiayi. Tura Yus shuaran chicharainiak “Ashamkairap. Ataksha iwiaakui” tímiayi. 11Nuyá̱ ataksha Papru wakamiayi. Tura páṉkan puukar yurumáwarmatai tuke chicháa chichaakua Papru tsawa̱rmiayi. 12Eutikiuncha iwiaakun ni je̱e̱n júkiarmiayi. Tura ashí aents shiir enentáimsarmiayi.

Miritiunam wearma

13Wats, Papru Asun péprunam nuṉkak we jeatajtsa wakerimiayi. Tura iincha, átumka kanunam wetarum, túramkurin iikia émkir Asunnum wémaji. 14Nui̱ Asunnum iṉkiunaikiar Páprusha kanunam eṉkempramtai Mitiríniniam jeamji. 15Tura nuyá̱ jíinkir kashin tsawa̱rar nayantsanam nuṉkach étentkamunam Kíusnum jeamji. Nuyá̱ nayantsanam ajapén chíkich nuṉkach Sámusnum jeamji. Tura nuya̱ṉka Trujiriunam jear ayampramji. Nuya̱sha kashin tsawa̱rar Miritiunam jeamji. 16Pápruka Jerusaréṉnum Pintikiustís nampernum pachinkiataj tusa wari wétajtsa wakerimiayi. Tuma asamtai Ásianam tí nukap pujustinian nakitiak “Ipisiunam wéchattajai” tímiayi.

Papru Ipisiunmaya̱ úuntan aujma

17Túrasha Papru tuke Miritiunam pujus Ipisiunmaya̱ Yus shuara úuntri̱n winitiárum tusa untsukarmiayi. 18Ni táarmatai Papru chichaak “Atumsha wi Ásianam pujusan itiura túraj nu nékarme. 19Atumji̱a̱i̱ tuke tsawant pujumaj nui̱ naṉkamantuchu enentáimtumasan utchim winia úuntrun takatrí̱n takasmiajai. Tura Israer shuar yajauch awajtústinian wakerutainiai̱ṉ tuke takasmiajai. 20Ashí péṉker ana nu nekaatarum tusan miji̱atrutsuk jintintiámjarme. Iruntramarmena nui̱ tura aṉkant aṉkant atumí je̱e̱n pujumarmena nui̱sha Yus Chichaman ujakmajrume. 21Tura Israer shuarnasha Israer shuarchancha nútiksanak enentai yapaji̱árum Uunt Jesukrístu umirkatarum, tímiajrume. 22Tura yamái Jerusaréṉnum wéajai, Yusa Wakaní̱ túrutkui. Nui̱sha túrunatana nunasha nekamatsuk wéajai. 23Tura Yusa Wakaní̱ iniakturkui ju̱na nékajai ashí pepru wi jeattajna nui̱ eṉketátai tusar nákarainiawai. Tura tí waitsatniun nekapsattajai. 24Kame wikia jákashtajash. Túrasha warí winia itiurtawa. Wikia Yusa jinti̱i̱n warasan wekasataj tusan wakerajai. Yusai̱ wea wéakuan jáakun iniaisataj tajai. Tura nuyá̱ takatan Uunt Jesus surusmia nuna péṉker amuktaj tusan wakerajai. Jesus chichartak ‘Yus waitnenkartana nú chicham etserkata’ turutchamka.

25Tura yatsurtiram, ashí Yúsnan atumín paant ujakjarme. Yamaikia wíniaka atakka wáitkiashtatrume. 26-27Nekaatarum, ashí Yusa wakeramuri̱n wisha peṉké ú̱rtsuk ujakjarme. Tuma asamtai atumín títiajtsan wakerajrume, chikichík shuara wakaní̱ jinium wéakuisha wikia peṉké makuumashtatjai. 28Tuma asamtai emka atumek íimiastarum. Túrarum nuyá̱ chíkich Yus shuar iistarum. Yus shuaran wáinin ajastarum tusa Yusa Wakaní̱ achirmákurme. Yus shuar ainia núnaka ni numpe̱ja̱i̱ṉ Uunt Jesus sumakchakait. 29Kame wi wématai chíkich táartatui. Núnaka nékajai. Tura nisha Yus shuaran amukártajtsa wakeriartatui, úunt ya̱wa̱sha murikiun amuinia áintsaṉ. 30Túrasha nemartusarat tusar wakeruiniak atumíinia̱ṉ wait chichaman unuikiartin wantinkiartatui. 31Tuma asamtai yatsurtiram, aneartarum. Wisha menaintiú uwí tsawai̱sha káshisha útchim aṉkant aṉkant unuiniamajrumna nu kajinmátkirap.

32Pai, yamaikia yatsuru, Yus yainmakarti. Yusa aneṉkrattairi̱ nékaitrumna nú chichamsha kakarmaiti. Nú chicham átum katsua̱rar kakaram wekasatniun yaintmakarti. Kame nú chicham atumí enentái̱n pujakui Yus ni shuari̱n matsamsatniun anajmatramia nui̱ pachinkiattarme. 33Wats, wisha chikichkí shuara kuítri̱n wariri̱ncha wakerutkachuitjiai. 34Antsu winia uwejruja̱i̱ takasan wi atsummiaj nuna sumarmakmajai. Tura winia írutkamuru atsumamuri̱ncha wiki sumakmiajai. Nuka paant nékarme. 35Kame átum takasrum atsumainia nusha yaiṉtarum tusan jintintiajrume. Wats, Uunt Jesusa chichame̱ enentáimsami. ‘Achíana núja̱i̱ṉkia naṉkaamas, súana nuka shiir waraawai’ tíchamka” tímiayi.

36Nuna tuasua amik Papru tikishmarmiayi. Tura ashí niji̱a̱i̱ iruntrarmia nú shuar Yusan áujsarmiayi. 37-38Tura Papru nuik chichaak “Atakka wáitkiashtatrume” tiniu asamtai tí kuntuts pujuiniak útchim Páprun miniaksarmiayi. Túrawar kanunam ejeniarmiayi.

Currently Selected:

Tur. 20: jiv

Highlight

Copy

Compare