Tur. 12

Pítiur sepunam eṉkeamu

1Nu tsawantai̱ úunt akupin Irutis Yus shuar maatai tusar chichaman jurus aentsri̱n ishiakmiayi. 2Tura Juaṉka yachi̱n Jakupun sue̱n tsupirkar máwarmiayi. 3Nuna tura máwarmatai Israer shuar wáinkiar “ju̱ka péṉkeraiti” tiármiayi. Irutissha nuna antuk Pítrusha achikrum itiatárum tusa akupkarmiayi. Núnaka karin eṉketáchma paṉ yúatin nampertin túrawarmiayi. 4Pítruncha achik itiarmatai Irutis sepunam eṉkeata tusa akupkámiayi. Tura sepunam suntarsha aṉkant aṉkant kuatru kuatru ashikia tiasisáis irunar Pítrun téntakarmiayi. Tura ju̱ namper naṉkaamasmatai mantamnati tusan jí̱i̱ktiatjai aents iruntramunam tu enentáimsamiayi Irutis. 5Túramu asa Pítruka sepunam pujumiayi. Tura suntarsha miji̱atrutsuk iyarmiayi. Túramunak Yus shuarka Pítrun yaiṉkiat tusar iniaitsuk Yusan ti áujiarmiayi.

Yusa suntari̱ Pítrun uwemtikramu

6Wats, Irutis kashin jí̱i̱ktiajai takui̱ nú kashi Pítruka jimiará suntar wajamunam etema tepes kanarmiayi. Tura jimiará jiruja̱i̱ jiṉkiamuyayi. Tura chíkich suntarka jíinmanum ii wajarmiayi. 7Tumai̱ aya aneachma Uunt Yusa suntari̱ taa ajapén wajasmiayi. Túrunamtai je̱a̱nmaṉka tsáapin ajasmiayi. Tura Yusa suntarí̱sha Pítrun páenam antiṉ ishintiarmiayi. Tura jirusha Pitru uwejé̱ya̱ saya̱t atiniámiayi. 8Tura Yusa suntari̱ chichaak “Kaki emenmamata. Túram sapatrumsha aweekata” tutai Pítiur túramiayi. Nuyá̱ chichaak “Pushiram entsarta. Túram nemartusta” tímiayi. 9Tutai Pítiur nemarsamiayi. Túrasha Pítruka mesekranmapi jú̱niaja tu enentáimsamiayi. 10Túrasha emka suntar imia wajan naṉkaikiarmiayi. Tura nuya̱sha chíkich suntar imia wajan nunasha naṉkaikiarmiayi. Tura nuya̱sha jíintiainium jiru waiti ámanum jeawarmatai nú wáitisha imia niṉki kua̱t uranmiayi. Túrunamtai jíinkiarmiayi. Tura jintiá ishichik wésaṉ Yusa suntari̱ Pítrun níniak ikiukmiayi.

11Túram Pítiur enentáimiar chichaak “Yamaikia nékajai. Mesekranmachuiti. Antsu Uunt Yus ni suntari̱n nekas akuptúrkayi. Irutis mantuataj tusa pujurtana nuyá̱ Yusa suntari̱ winia uwemtikrurai. Tura Israer shuar túrutatajtsa wakeriarmia nuya̱sha uwemtikrurai” tímiayi. 12Nuna tu enentáimias nekáa Marí je̱e̱n wémiayi. Nú Marisha Juaṉ Márkusan nukurí̱yayi. Nú je̱a̱nam untsurí aents irunar Yusan auju matsatainiai̱ Pítiur jeamiayi. 13Tura jeá a̱a̱ wáitin waya̱taj tusa tuntuimiayi. Túmakui̱ nuwa̱ uchich ni naari̱ Ruti, yákit tusa iyumiayi. 14Tura jearí Pitru chichame̱n anturak ti shiir enentáimsamiayi. Túmak wáitin urattsuk ikiukí̱ init matsatainian werí “Pítiur taa wáitiniam wajaawai” 15takui̱ “Wáurtsumek” tiármiayi. Tútaisha núwa̱ka “Atsá nekasaiti” tímiayi. Tútaisha nú arant “Níchuiti. Antsu ni wakaní̱ túratsuash” tiármiayi.

16Tu chichainiai̱ṉ Pítruka tuke tuntuí wajamiayi. Tura wáitin uraj tukamá Pítrun wáinkiar ashamkarmiayi. 17Ashamak chichainiakui Pítiur uweje̱ takuí itiatmamtikiarmiayi. Tura nuyá̱ Uunt Yus sepunmaya̱n uwemtikramun ujakmiayi. Tura “Ju̱ chicham Sántiak tura chíkich Yus shuarsha ujaktarum” tímiayi. Nuna ti iniais jiinkí̱ arant wémiayi.

18Kashin tsawa̱r suntarsha Pítrun atsá wáinkiar “Chuwa urukakua meṉkaka. Áyawa urukattajia” tiármiayi. Pítiur túrunamun nékachu ásar nuna tiármiayi. 19-20Túrunamtai Irutis Pítiur e̱a̱ktarum tusa akupkarmiayi túrasha wáinkiacharmiayi. Túrunamtai Irutis suntaran untsukar Pítrun wáiniarmia nuna aniasarmiayi “¿Pítiur itiura meṉkakama?” tímiayi. Nisha amainiachkui nu suntaran mantamnati tusa akupkámiayi.

Irutis jakamu

Irutissha Tírunmaya̱ tura Setunmaya̱ aentsja̱i̱sha nemasnaikiarmiayi. Túmayataṉ Jutá nuṉkan ikiukí̱ Sesaria péprunam pujustaj tusa Irutis wémiayi. Sesaria péprusha Tiru péprunam tíjiu̱chiti. Setunmaya̱ aents Tírunmaya̱ aentsja̱i̱ Irutisa nuṉke̱ya̱n yurumkan súmainia ásar Irutisja̱i̱ nawamnaikiatniun wakeriarmiayi. Tuma asamtai métekrak enentáimsar Irutisa takarniúri̱ peṉkeri̱, ni naari̱ Parastu, niji̱a̱i̱ emka amikmáwar nuyá̱ Irutisan weriar shiir matsamsatniun seawarmiayi. 21Tuma asamtai tsawant jeamtai Irutissha akupin entsatái̱ pushin entsarmiayi. Tura akupin pujutai̱nium pujus aentsun ikiaanak áujmatmiayi. 22Nui̱ pujus chichaakui aents untsumainiak “Ju̱ chicháa pujana ju̱ka áentschaiti. Antsu nekaska yúsaiti” tiármiayi. 23Tumai̱ Uunt Yusa suntari̱ aya aneachma tarí Irutisan jaa awajsámiayi. Tuma asamtai nusha aka yuá amukam jakamiayi. Irutissha Yusan waantu awajtsuk niṉki waantu enentáimtuma asa túruna jakamiayi. 24Túrunamtaisha Yusa Chichame̱nka nú arant pampaṉki̱ wémiayi. Túmaki̱ ashí nuṉkanam anturamiayi.

25Tura Pirnapísha Sáurusha ni takatrí̱n amukar Jerusaréṉnumia̱ Antiukíanam waketainiak Juaṉ Márkusan júkiarmiayi.

Currently Selected:

Tur. 12: jiv

Highlight

Copy

Compare