2 Pit. 2
2
Wait chicham unuimiamu
(Jut. 4-13)
1Tura Israer shuarnum wait chichaman etserniusha páchitkia ármiayi. Atumíincha wait chichaman unuiniau páchitkia ártatui. Nisha awajimtikrampratniun wakeruiniak wáitian ti yajauchin ú̱kar unuiniarartatui. Tura “Uunt Jesus uwemtikrurmia nusha ántraiti” tiártatui. Nuna takui̱ ni amuukatniuri̱sha wárik jeartiatui. 2Tura untsurí shuar ni yajauch túruiniamuri̱n iirsar métek túrawartatui. Iis “Yus Chichaman unuiniaitjiai” tuíniayataṉ imiá yajauch túruiniakui untsurí aents “Yus Chicham ántraiti” tiártatui. 3Kuítian ti wakeruinia ásar wait chichaman unuitiamprar akíam kuítriniawartatui. Tura nú shuar yaunchu Yus jákatniunam sumamtikiawarma ásar ni amuukatin tsawantri̱ jeatémayi. 4¿Warí? Tunaan túrawarmatai Yuska ni suntari̱ nayaimpiniam pujuarmia nunasha peṉké tsaṉkurachmiayi. Antsu nayaimpinmaya̱ jinium akupkarmiayi. Tura nekapsatin tsawant jeatsa̱i̱ṉ kiritniunam jiṉkiamu emetamu pujuiniawai.Naṉ. 6:1-2; 1 Pit. 3:19-20; Jut. 1:6 5Yáunchuya̱ shuarnasha Yus tsaṉkurachmiayi. Antsu amuukarat tusa ama̱a̱n akuptúkarmiayi. Antsu áya Nuwainiak Yusja̱i̱ wekas etserin asamtai ni shuari̱ siati armia nuja̱i̱ uwemtikramiayi. 6Enentáimpratarum. Sutumancha tura Kumurancha nayaimpinmaya̱ jin akuptuk Yus mash amukmiayi. Aya yúṉkunmik awajsámiayi. Ukunam nu túrunamun nekaawar shuar tunáa túratin tsuumainian nekaawarat tusa túramiayi. 7Tura Yus Ráutan uwemtikramiayi. Péṉker shuar asa Sutumanmaya̱ aents imiá yajauch ásar tunáa túruiniakui Raut kúntuts enentáimsamiayi. 8Péṉker áishmaṉ asa, nuyá̱ aentsu yajauchiri̱n wáitiainiak, ni enentái̱ péṉker asamtai tuke tsawant kúntuts enentáimiuk wáitmiayi. 9Tuma asa Yuska nin enentáimtus pujuinia núnaka nekapsamunmaya̱ tsawantai̱ aṉkant awajsatniun iwiaramniaiti. Túrasha yajauch shuarnaka nekapsatin tsawant jeakui tí asutniami tusa Yus yamaikikia nú aentsun akankámniaiti.
10Tura Yus akupeana nuna umirkatniun nakitrar ni yajauch wakeramuri̱n túruinia nunasha Yuska nekas asutiáttawai. Enentáimcha áiniawai. Tura ni wakeramuri̱niak wakeruiniawai. Niji̱a̱i̱ naṉkaamas akupin ainia nuna yajauch áujmatainiawai. 11Warí, imia Yusa suntari̱ Yusai̱ matsatainia nu, nuna túratniun tsuumainiawai. Naṉkaamas kakaram tura naṉkaamas uunt áiniayat nú akupniun katsekainiatsui.
12Nu áishmaṉsha enentái̱ncha yajasma núnin áiniawai. Achikiar mantamnatniuk akiinia áiniawai. Enentáimtsuk náṉkamsar yajauchin chichainiawai. Tuma ásar yajasma núnisaṉ jákartatui. 13Chikichan wáitkiamia áintsaṉ wáitsartatui. Tuke tsawant ni wakeramunak túruiniak “waraajai” tuíniawai. Tura atumji̱a̱i̱ irunar yurumáiniayataṉ atumín anaṉkramawar warainiawai. Nuka natsantaiti.
14Nuwa̱n wakerutskeka íiniatsui. Tunaan yawe̱tainiatsui. Yúpichuch ainia nú shuaran netse túratniun wakerumtikiainiawai. Kuítian wakeruktinniasha ti nékainiawai. Jákatniunam sumamawaru áiniawai. 15Naka jintianka ikiuiniak Piura uchirí̱ Paraaman patatuiniak awajirarai. Warí, Paraamka yajauchin túrak kuítian achiktinian ti wakerukchamkia. 16Kame tunáa túramunmaṉka chicharnákmai. Tura umpuru chichachuitiat aents chichana núnis chicharkam wáurkamaikia ni túrimia núnaka iniaisámiayi.Wek. 22—25; 31:8
17Nu áishmaṉsha yumirmat ku̱yu̱a núnis áiniawai. Tura núnisaṉ yuraṉmisha ki̱áriat nase umpuim meṉkaana nu, yumi aju̱a̱rcha ásar, peṉké ántar áiniawai. Warí, Yus Chichamja̱i̱ aentsun yáiniainiatsui. Nisha imiá kirit ámanum tuke pujustin áiniawai. 18Nisha ti chichainiayat ántar chichainiawai. Yajauch túratniuja̱i̱ tura aya̱sh wakera núja̱i̱sha páchim túriarmia nuyá̱ kanakiarua nú shuaran ataksha tunaanum aju̱a̱rtajtsa wakeruiniawai. 19“Iiya núnis túrakrumka aṉkant átatrume” tu wénawai. Túrasha imia niṉki ni tunaarí̱i̱n emetamu áiniawai. Páantchakait. Shuar warí tunaaja̱i̱n nupetnaka, nuna emetamuri̱nti. 20Kame shuar, Uunt Jesukrístu uwemtikkiartin ana nuna chichame̱n nékainiak ju̱ nuṉkanam yajauch ainia nuyá̱ uwempra ainia nu, tunáa nupetkam atak yajauchiniam iniainiakka, nuik pujumia núja̱i̱ṉkia naṉkaamas yamái imiá yajauch pujuiniawai. 21Yusa akupkámuri̱n imiá péṉkera nuna Yus nú shuarnasha súsarmiayi. Túrasha nékainiayat tunaanum waketkiaru ásar ti asutniáwartatui. Tuma asamtai nekas jintian nekaachuitkiuṉka maak árainti. 22Tíchamukait “ya̱wá̱ iyak ataksha yúawai” Neka. 26:11 tura “kuchisha imiaimiuitiat ataksha tsakusnum má̱jkimiui.” Nu áishmaṉsha núnisaṉ yajauchiniam ataksha waketainiawai.
Currently Selected:
2 Pit. 2: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.