Apocalipsis 18

Juan Babilonia railla naɨraɨ illano goilla rafuena cɨode

1Ie facaise monamona jɨaɨe jaɨenicɨ ana billana cɨodɨcue. Naimɨe uai siño. Naimɨe uai siñona jira, enɨruena llɨgaiñote. 2Ado llote:

—Iena Jusiñamui duere fɨnuamona, Babilonia naɨraɨ illano jai nana goide. Comɨnɨ nainomo jai iñedɨmacɨ. Nainomo Taɨfe jaɨenisaɨ birui itɨmacɨ. Jananɨaɨ nainomo birui itɨmacɨ. 3Nia goiñenia, bie naɨraɨ jeacɨnona eo fɨnuamona, nana naɨraɨaɨ iena ebiruitɨmacɨ. Bie naɨraɨna nabaillamona, nana illaɨcomɨnɨ jearede rafuena jɨaɨ fɨnocabidɨmacɨ. Jearede rafuemona nana rana fecaraɨnɨ bie naɨraɨmona ailluena ucubena ganacabidɨmacɨ —llote.

4Naie facaise monamona damɨe llote:

—Cue comɨnɨ, bie naɨraɨmona birui mai eneno oni i. Jeacɨnona omoɨ fɨnoi raillano, naie facaise omoɨ duere sefui raillano, birui eneno mai oni i. 5Bie naɨraɨ jeacɨno eo fɨnocana jaidɨmacɨ; iadedɨ iena Jusiñamui uiñuamona, naimacɨna jai duere fɨnoacade. 6Jusiñamui, naimacɨ fɨnua dɨese ɨbana ono. Naimacɨna ua eo duere fɨno. 7Jeacɨno fɨnuamona iobidɨmacɨ. Iemona abɨ ɨedotɨmacɨ. Jeacɨno fɨnuana eo ebiruitɨmacɨ. “Illaɨcomɨnɨdɨcaɨ. Nana caɨ jitailla ra caɨmo ite. Fecɨño isoi duere jaca sefuiñeitɨcaɨ” comecɨaɨna facadɨmacɨ; 8iadedɨ caɨ Nama Jusiñamui naimacɨna ebena eo duere fɨnoite. Duicomona, sure illamona, aime guillamona fiodaitɨmacɨ. Naimacɨ jofue booite. Jusiñamui siño jitona jira, naimacɨna raɨre fuidoite —llote.

9Bouamona uillɨe naimacɨ cɨoia, sunaillamona, naie naɨraɨ dɨga nabairite illaɨcomɨnɨ eo eeitɨmacɨ. 10Duere sefuillena naimacɨ jacɨruilla jira, aremona lloitɨmacɨ:

—Ero, Babilonia eo aillue naɨraɨ illano; iadedɨ duere fɨnuamona ua raɨre fuite —lloitɨmacɨ.

11Naimacɨ rana naie naɨraɨ jai oñena jira, rana fecaraɨnɨ eo sunaillamona eo eeitɨmacɨ. 12Iese fecacabidɨmacɨ: oro, plata, abɨ fɨnollena raifide ra, dɨga eo mare raifide ɨniroi, dɨga caɨmare soride rabɨcɨaɨ, elefante sigaɨnɨaɨ, jofona nille ra, bronce, lloeona, mare nofɨcɨ, 13guille caɨmaretade ra, caɨmare soride ra, vino, guille ie aceite, mare harina, core, juraretaɨaɨ, toɨca llaudaɨaɨ, caballos, carretas, comɨnɨ. Vendellena, comɨnɨna atɨcabidɨmacɨ. 14Sure illamona lloitɨmacɨ:

—Caɨmona omoɨ comecɨaɨ jitailla rana ja oñeitomoɨ. Omoɨ ebiruiga rana ja oñeitomoɨ.

15Duere sefuillena naimacɨ jacɨruilla jira, nainomona ucubena jai oñenamona, rana fecaraɨnɨ aremona ado eo eeitɨmacɨ. Sunaitɨmacɨ. 16Lloitɨmacɨ:

—Naie naɨraɨ eo duere sefuidɨmacɨ. Nia duere sefuiñenia, eo mare rana, mare ɨniroi dɨga ebiruitɨmacɨ. Eo raifide abɨna fɨnolle rana eo ebiruitɨmacɨ. Oromona fɨnoca ra, perlamona fɨnoca rana eo ebiruitɨmacɨ; 17iadedɨ nana naie naɨraɨ, ie raifide ra dɨga, jai raɨre fuite —lloitɨmacɨ.

Nana botes imacɨ capitanes, nana botemo maɨjɨuidɨno dɨga, nainomo jaidɨno dɨga, botedo rana fecaraɨnɨ dɨga, 18aaremona uillɨena cɨuamona, naie naɨraɨ bouana fɨdɨano, lloitɨmacɨ:

—Naie naɨraɨ nana jɨaɨ naɨraɨaɨ baɨfemo navui faɨte. Jɨaɨe naɨraɨ ie isoi ebinide.

19Sure illamona, naimacɨ ɨfogɨmo imuicɨna faɨanona, eeitɨmacɨ. Lloitɨmacɨ:

—Bie naɨraɨ eo duere sefuide. Bie naɨraɨmona boteredɨnodɨcaɨ navui ailluena ganadɨcaɨ. Bie naɨraɨ jai raɨre fuite.

20Naie facaise monamona damɨe llote:

—Monamo itɨno, naie naɨraɨ fuillari mai iobi. Jusiñamui comɨnɨna jai jaidomoɨ. Naimɨe facaina navui maɨjɨdomoɨ. Naimɨe rafuena navui llofueuidomoɨ. Naie naɨraɨmona duere sefuidomoɨ; iadedɨ omoɨ facaina Jusiñamui ɨbana jai ote.

21Naie facaise jɨaɨe jaɨenicɨmo siño uai illanona, eo aillue nofɨcɨ llɨnuanona, monaillaimo iena faɨte. Llote:

—Bie nofɨcɨ dane caɨ cɨoiñena isoi, Babilonia railla naɨraɨ dane iñeite. Jusiñamui iena eo rɨire fuidoite. 22Nainomo buna dane roñeite. Buna guitarrana eruaɨde arpas jaca taiñeite. Buna firacaɨna jaca fiñeite. Buna trompetana jaca fiñeite. Nainomo buna rana jaca niñeite. Rana jaca fɨnoñeite. Buna jaca doberiñeite. Llomenicona fɨnollena, buna dane maɨjɨñeite. 23Nainomo naɨona lamparínɨaɨ dane booñeite. Rafue dane iñeite. Eo caɨmare iobitaja rafue dane iñeite. Ɨraɨsiñeitɨmacɨ. Saiñeitɨmacɨ. Naie naɨraɨ rana fecaraɨnɨdɨ navui nanoca fecaraɨnɨ. Naimacɨna Taɨfe canua jira, ailluena naɨraɨaɨna navui jɨfuecabidɨmacɨ. 24Naie naɨraɨ ailluena Jusiñamuina ɨɨnotɨnona meinetɨmacɨ. Ailluena Jusiñamui facaina lloraɨnɨna meinetɨmacɨ; iadedɨ naimacɨna Jusiñamui duere fɨnua jira, ua eo mare —llote.

Currently Selected:

Apocalipsis 18: huu

Highlight

Compare

Copy