Primera Carta a Timoteo 3
3
Creyentiaɨna sedaraɨnɨ illa rafue
1Bicɨnodɨ uanaicɨno. Creyentiaɨna llofueraɨmana bu jaiacania, naimɨe comecɨmo mare jitaillacɨno ite. 2Bie isoide llofueraɨmana jaiacadɨmɨena jitaidɨcue. Naga comɨnɨ naimɨe mare raillamɨe. Dañaiñona aɨredɨmɨe. Abɨ eenotɨmɨe. Ebena iñedɨmɨe. Ɨɨnogamɨe. Jɨaɨe comɨnɨ naimɨe jofomo riadedɨ, raise nafuecabitɨmɨe. Jusiñamui uaina raise llofuecabitɨmɨe. 3Jɨfairuiñedɨmɨe. Fuiriraɨnidɨmɨe. Raɨre icɨriraɨnidɨmɨe. Ucubena nɨcɨdoñedɨmɨe. 4Naimɨe comɨnɨna raise sedadɨmɨe. Naimɨe anamo naimacɨ illanona, naimɨe uruiaɨ ie uaina raise ɨɨnotadɨmɨe. Ie isoidɨmɨe llofueraɨmana jaillana jitaidɨcue. 5Iese naimɨe iñenia, ie anamo itɨnona naimɨe raise sedañenia, ¿nɨese jɨaɨe creyentiaɨna raise sedaite? 6Como creyentena jaidɨmɨena creyentiaɨna llofueraɨmana fetoñeno, naie dɨga naimɨe abɨ ɨedoi raillano. Abɨ ɨeduamona, Taɨfe isoi jeacɨno fɨnoite. 7Llofueraɨmana jaiacadɨmɨena creyenteñedɨno: “Mare” raiñenia, naimɨena fetoñeno. Iese naimɨena raiñenia, naimɨe joreñona jeare ñaɨtɨmacɨ. Iemei Taɨfe ramo jɨaɨ faɨte, naimɨe abɨdo danomo uaillena. Ie muidona naimɨe uaina jaca cacarefiñeitɨmacɨ.
Diáconuaɨ illa rafue
8Diáconuaɨ creyentiaɨ llofueraɨnɨ isoi marena illa. Ɨɨnouiganona illa. Jɨfairaɨeñena. Ucubena nɨcɨdoñena. 9Naimacɨdɨ Cristona caɨ ɨɨnua rafuena jeanide comecɨaɨmona ɨɨnua. 10Bu omoɨ fetoacania, naimacɨna nano facacɨ. Roracomo jɨaɨe rana nano maɨjɨta. Iena raise fɨnoia, diáconuaɨna jaite. 11Diáconuaɨ aɨnɨaɨ jɨaɨ ɨɨnogañaiñuaɨna illa. Jɨaɨe comɨnɨ joreñona ñaɨñena. Jiroraɨnina. Naga rafuena marena raise fɨnua. 12Nana diáconuaɨ aɨdɨ dañaiñoriede. Diáconuaɨ uruiaɨ naimacɨ uaina raise ɨɨnua. Diáconuaɨ imacɨ anamo itɨnona raise sedajana uiñua. 13Diáconuaɨ marena maɨjɨia, comɨnɨ naimacɨmo iobillacɨnona fecaitɨmacɨ. Cristo Jesúna ɨɨnuano, naimɨena marefodo jɨaɨ lloitɨmacɨ.
Jusiñamuina ɨɨnotɨno
14Timoteo, raɨre o dɨne jaiacadɨcue; iadedɨ uicodo bie rafuena omo cuetɨcue. 15Are cue riñenia, danɨ omoɨ creyentiaɨ dɨese ofia, Jusiñamui ie comɨnɨna marena omoɨ illana omoɨ uiñollena, omo cuetɨcue. Cajede Jusiñamuina jai sedadɨcaɨ. Uanaicɨnona rɨidotɨcaɨ. 16Jusiñamui caɨna Cristona jai uiñotagafuedɨ jɨaɨe rafue baɨfemo faɨte. Iena caɨ uiñuanona, raitɨcaɨ:
Enɨruemo Cristodɨ ɨimana jai bairede.
Jusiñamui Joreñodɨ caɨna naimɨe uai siñonana uiñotade.
Jusiñamui jaɨenisaɨ naimɨena jɨaɨ cɨodɨmacɨ.
Jɨaɨe naɨraɨaɨmo naimɨena llotɨcaɨ.
Iena cacajamona, ailluena comɨnɨdɨ dɨga naɨraɨmona naimɨena birui ɨɨnotɨmacɨ.
Monamo naimɨe abɨdo jai jaide.
Currently Selected:
Primera Carta a Timoteo 3: huu
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.