JAKOBO 1
1
1Inê Jakobo, na kariaterua God ma na Araha o Jesu Kirisito.
Ga korokoro na tongoha tangagamu hato na kariana God, kamu totoko suria na maveta hagenani.
Na tongesuriha ma na takoha mataha
2Goaku! I koro, kamu vagevage ngavê, matena igê na ani ni mavê na heuhungiha ga tarahugamu, 3renia mu girara, i pe asa iami, vi gamu hatamia na mamasiaganiha manga vi na tongesuriha iami, ma ki ramoramo ki teharigi na heuhungiha ngegana. 4Siana hagetage, kamu kasia na tongesuriha iami, henaka vi na anima i he na mamasiaganiha i tarahugamu, hanana mu page korokoro teha hagetage igê na ara ni marâ. 5Ma ki manga ta na hitangimi, ma ki pe tako mataha, i koro, ki nungia God, ma ngaia ki page vatea renia, suria God ki mamahata bâraha, ma ki votovoto purua tangara na enoni hato. 6Ma ki koro, kamu hagêguritogo renia God, matena mu nunginungi, ma siana hagetage, kamu takotako tugupu, suria na enoni, i takotako tugupu, ki manga na navo, i akirokiro, matena igê na roga raha. 7Siana na enoni ngekê ki takusia, vi ngaia kani page tovoa ta na marâ tenia na Araha, 8renia ngaia ki takotako tugupu, ma ki takotako herua igê na ara ni marâ.
Na matareha ma na ruruguha
9Na kirisitiano i matareha, i koro, ki vagevage, matena God i kasia akê. 10Na kirisitiano i ruruguha, i koro, ki vagevage, matena God i kasia so. Renia na enoni, i ruruguha, ki page magahuru mangagi na takani na rauga. 11Na arito ki akê, ki ramoramo teha, ma ki maugu na rauga, ma na takana ki votavota, ma na bâkorohana ki magahuru hagetage. I tagenana ma, manga na enoni ruruguha i page magahuru hagetage, matena i aruma renigi na tagaraha iana.
Na uhungiha ma na heuhungiha
12I babarisi na enoni, i gatagata tare, ki rêra pusigi na heuhungiha. Renia matena i ramoramo teharia na uhungiha, ngaia ki page tavoa na votovoto na mauriha mora, na mena, God i bani surua tangara na enoni, ga takuia. 13Manga na heuhungiha, ma ki tarahua ta na enoni, siana ki vivi, “God kani uhungiê.” Suria na eraha ki asa hagetage, vi ge uhungia God, ma God nogana ki pe uhungia na enoni. 14Ma na teniha era iana so marena hete na enoni kani uhungia, ki hagamua, ma ki okea râ. 15Ma hemuri na teniha era iana ngekana ki atui, ma ki apara na tasi. Ma na matena i raharaha na tasi ngekana, ngaia ki apara na mera.
16Goaku koro, siana ka hagaparugamu! 17Na ara ni votovoto iana God ka koro, ma na ara ni votovoto koro teha ka râ me tenia i pasina God, i hagavoragi na marara i vavearo. Ngaia ki pe riariaga, ma ki pe murisigegia, ma ki pe panigia so igê na roto hono. 18Ngaia marena ki hagavoragia renia na tamasinga na monariha, hanana igia ka voravora mangagi na nagona na mu tarani na ara ni marâ, i bani hagavoragi.
Na rongoha ma na tanugiana
19Goaku koro, mu takusia aporo na tarana ngekê. Na ara ni enoni i koro, ki karinga maninga rêrê, ma siana ki hatani tamasi rêrê, ma siana ki hatani mangariaga rêrê. 20Renia na mangariaganiha iana na enoni ki erasigi na katoha oto iana God. 21Tahema, kasigi râ na ara ni marâ era, ma na ara ni parongami era. Mu têtê viteana God, ma kamu taua na tamasinga, God i kasia i obami, renia na tamasinga ngekana ki girara i hagatahigamu.
22Siana kamu hagaparugamu so maremi renia na rongoha ma renia na tamasinga iana. Ma kamu katogi hete na marâ, mu rongogi. 23Renia na enoni, i rongoa ma na tamasinga, ma ki pe tanua ta na marâ, i rongoa, ngaia ki manga na mane, i bâsia marena igê na kilasi. 24Ngaia ki bâsia marena, ma hemuri ki rêra râ pania, ma ki hata ni bonotenia, manga hanana i bâ. 25Ma God ki page tamania na enoni igê na ara ni tagaraha iana, manga vi na enoni ngekana, ma ki bâsia maninga na ramata koro teha, i rupasira na enoni, ma ki ama ni bâsia maninga nga, hanana siana ki bonotenia na marâ, i rongoa, ma ki tanua tare hete na marâ, i rongoa.
26Manga ta na enoni, ma ki visia marena, vi ngaia ki rotu koro, ma ki pe hagaotoa na meana, ngaia ki rotu purua ma, ma ki hagaparua so marena. 27Na rotu i koro ma ki oto i maana God Vaemaka ngaia ki manga ikê: ka marupera na kare banogo ma na gete na nâ igê na mamasiaganiha iata, ma ka hagatê tenia na eratana i maveta.
Currently Selected:
JAKOBO 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific