EPESO 1
1
1Inê Paulo. God ki bani ateê, kê aposotolo iana o Kirisito Jesu. Inê kê sege tangagamu, na kariana God, mu oga i hinua i Epeso, ma kamu hagabângenia na tongesuriha iami igê na mêrihami, mu obahaku henia o Kirisito Jesu.
2Inê kê nungirerua God Vaemaka ma na Araha iaka o Jesu Kirisito karu korokoro tangagamu, ma karu vategamu na marapeha.
Na korohana God
3Ge visia koro God, Vaemana na Araha iaka o Jesu Kirisito. Renia ngaia ki bani koro tangagia, renia igia ka obahaku henia o Kirisito, suria tenia i pasina ngaia ki vategia na ara ni marâ koro tangagi na ataroka. 4Matena i mamênga, vi ge hagavora na maveta, God ki bani ategia, ka vora na anina i Kirisito, hanana vi igia ka korokoro ma ka ototo, ma ka matarotaro i maana. Suria ngaia ki takuigia, 5God ki bani kato, hanana vi ngaia ki toregia tanga ngaia marena, ka vora re na kare têtê iana renia o Jesu Kirisito. 6Ge visia raha God renia na korohana raha teha tangagia, i bani mahatangenia renia o Karena hetakui.
7Suria o Kirisito ki me, God ki bani bonotenigi na tasi iaka, ma igia ka aharupa. I raha teha na korohana God, 8i mahatangenia ngavê tangagia. God ki tako mataha teha, ma ki giraragi na ara ni marâ hato. 9Tahema ngaia ki tanugi na marâ, ngaia i bani katogi, ma ki hagagirararagia renia na katoha pinihi iana, ngaia i bani naka, hanana i hatongia renia o Kirisito. 10God ki page hatongia na katoha iana igê na matena, i araria. Na katoha ngekana ki manga ikê: ngaia ki page hakura na ara ni marâ hato, i bani hagavorara, na ara ni marâ hato i vavearo ma i maveta, ma ki page naka o Kirisito, ki marungira.
11Na ara ni marâ hato ka vora me surigi na katoha ma na obaniha iana God. Ma God ki ategia na kariana marena, ga obahaku henia o Kirisito, suria na katoha iana marena, i bani naka me i nago kere vê noga. 12Tahema igami, na ani mi hagenago, kami naasia o Kirisito, kami visia raha God raramohaga hunia.
13Ma igamu nikâ mu bani vora re na kariana God, matena igamu kamu rongoa na tamasinga monari, na Taroha Koro, i vategamu na tahinga. Igamu kamu bani tongesuria o Kirisito, ma God ki bani segegamu, kamu vora na anina, renia i bani vategamu na Higona Apu, i bani surua. 14Renia God ki bani vategia na Higona Apu, igia ka girara bâkoro, vi igia ka page nahunigi na marâ, God i bani surugi tangara na kariana, ma igia ka girara bâkoro nikâ, vi God ki page katora na kariana, hanana ga aharupa hagenani ngavê. Ge visia raha na korohana ma na raramohana God.
Na nunginungiha iana o Paulo
15Tahema, matena gê haganega kê rongo, vi igamu kamu tongesuria na Araha o Jesu, ma kamu takuira na kariana hato God, 16inê kê ama ni visia koro nga God renigamu. Inê kê takusigamu tare igê na nunginungiha iaku, 17ma kê nungia God raramohaga hunia, Vaemana na Araha iaka o Jesu Kirisito, ki vategamu na Higona Apu, ki page hagatako obami, ma ki page hagagiraragamu renia God, hanana igamu kamu aitangisia God. 18Inê kê nungia God, ki mavesigi na aitangihami, hanana mu page girara na marâ, mu naasia, vi gamu page nahunia suria na suruha iana tangagamu; hanana mu page giraragi, vi ga raha ma ka koro teha ngavê na votovoto, i surugi tangara na kariana; 19hanana mu page girara, vi i raha teha na raramohana, i tagara i pasika na enoni, ga tongesuria o Kirisito. Na raramohana ngekê i pasika ki na raramohana raha hunia, 20God ki hagamêria aporo o Kirisito renia, ma ki kasia ki Araha i pasina. 21I ngekana o Kirisito ki marungigi na atohata na ara ni ramoha hato i vavearo, na ani ga nahuni ramoha, na ani ga ramata tangara na enoni ma na ani ga araha. Ngaia ki teharira na ara ni araha hato i maveta ikê ma i muri me. 22God ki nakagi na ara ni marâ hato i ruguhana o Kirisito, ma ki naka o Kirisito manga na Araha, i teha ma ki marungia na haku na enoni, ga tongesuri, ma ki marungigi na ara ni marâ hato. O Kirisito ma na haku na enoni, ga tongesuri, ki manga na apena hagenani na enoni. O Kirisito ki manga na bêna. 23Na haku na enoni, ga tongesuri, ki manga na apena, i hagauhua o Kirisito na bêna, i hagauhugi nogana na ara ni marâ hato i na ara ni agua.
Currently Selected:
EPESO 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific