AMOSE 1
1
1Igê na buka ikê ka oga igê na tamasinga iana o Amose. Ngaia ki nahunira rako na sipi. I pasina i Tekoa. God ki hagagirara renigi na tamasinga renia i Isiraele ngegê, matena o Usia ki marungia i Juta, mo Joroboamo, karena o Jehoasi, ki marungia i Isiraele. God ki vatea renigi na tamasinga ngegê igê na harisi gi rua i nago tarana na nunu raha. 2O Amose ki tamasi, ki vi:
“Na Araha ki tamasi raha tenia i Sione,
manga na laione i nguru raha.
Na ringena ki rongo raha manga na gugusuhia.
Na pariki ni go ka marama
ma na rauga i hungana i Karamele ka mêgu.”
God ki page hagaitangira na merongata na Isiraelita
Siria
3Na Araha ki vi:
“Na Ai ni Tamasiko
ka bani tasi bâraha ngavê.
Tahema inê be hagaitangira nga.
Ngaira ka katora bera na ai ni Gileata
manga na enoni i garasia na ngêra.
4Inê be sungia na ruma raha,
i torea na maneraha o Hasaele.
Na gi ke ngêgi na ruma nganganihaga,
i oga igê o Benihata, na maneraha.
5Inê be hogegi na maani para ni hinua i Tamasiko.
Inê be nahuia ke me na maneraha,
i marungia na hinua ni eraha ngekana,
henira na ai ni hinua ni vagevageha bera.
Na merongata ka page henahuraura
na ai ni Siria,
ma ka page torera vê, ka ahiahi noga
i Keri.
Ngaia kani gê visia, inê na Araha.”
Pilisitia
6Na Araha ki vi:
“Na ai ni Gasa
ka bani tasi bâraha ngavê.
Tahema inê be hagaitangira nga.
Ngaira ka henahuraura na enoni
igê na hinua rako,
ma ka hagavuringenira tangara na ai ni Etome.
7Inê be hogegi na maani para ni hinua i Gasa.
Na gi ke ngêgi na ruma nganganihaga igê.
8Inê be nahuira ke me na maneraha,
ga marungirerua i Asetote mi Asekoloni.
Inê be hagabângenia na raramohaku
ma be hagaitangira na ai ni Ekeroni,
ma na ai ni Pilisitia, ga tahitahi mêngara,
ka page meme nogata.
Ngaia kani gê visia, inê God na Araha.”
Taire
9Na Araha ki vi:
“Na ai ni Taire
ka bani tasi bâraha ngavê.
Tahema inê be hagaitangira nga.
Ngaira ka henahuraura na enoni
igê na hinua rako,
ma ka hagavuringenira tangara na ai ni Etome,
suria ga pe hagamonaria
na suruha ni marapeha henira.
10Inê be hogegi na maani para ni hinua i Taire.
Na gi ke ngêgi na ruma nganganihaga igê.”
Etome
11Na Araha ki vi:
“Na ai ni Etome
ka bani tasi bâraha ngavê.
Tahema inê be hagaitangira nga.
Ngaira ka tarigenira na Isiraelita, na goata,
hanana viga nahuira ka meme,
suria ga kasi renira.
Ngaira ka mangariaga teha ngavê.
Na mangariaganiha iata ki asa, vige page hato.
12Inê be sungia na hinua i Temani.
Na gi ke ngêgi na ruma nganganihaga
i hinua i Bosara.”
Amone
13Na Araha ki vi:
“Na ai ni Amone
ka bani tasi bâraha ngavê.
Tahema inê be hagaitangira nga.
Ngaira ka meraheariha na ai ni Gileata,
hanana viga parênia na mako tenira.
Ngaira ka tatahura na gete, ga obara.
14Inê be hogegi na maani para ni hinua i Raba.
Na gi ke ngêgi na ruma nganagnihaga igê.
Ngaira ka page kasikasi manava
igê na hearihatana maramaguara.
15Ka page henahuraura na maneraha ma na kariana.
Ngaia kani gê visia, inê na Araha.”
Currently Selected:
AMOSE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific