1 MAHERAHA 1
1
O Tavite ki merahaga
1Na maneraha o Tavite ki merahaga ngavê. Ngaia ki ama ni marato nga, henaka na kariana ka aruhea renigi na aruhana. 2Tahema na mane ni hagaotonga iana ka vi tanga, ka vi: “Maneraha, naka kami garia ta na gete haoru ke oga henigo ma ke marupego. Ngaia ki page tâtâ ngahisigo, hanana go mahanahana.” 3Ngaira ka gari suria i Isiraele hagenani renia na kere gete bâkoro. Ki rârâ ma i Suneme ka tarahua igê na ani nga i bâkoro. Na atana kani ka Abisage. Ngaira ka merâ i pasina na maneraha. 4Ngaia ki bâkoro teha ngavê na apena. Ngaia ki bâbâsurira na enoni ga vatugia me na maneraha, ki marupea na maneraha ma ki mareha vige memêru.
O Atonia ki pusia marena vi maneraha
5-6Hoi, i murina i me o Abasalome, o Atonia o kareterua o Tavite ma ka Gagita ngaia ki na ani i nago tarata na ani ga tahitahi mêngara. Ngaia ki na mane i bâkoro era na apena. O Tavite ki mareha ngavê, vige ramonia rârâ renia ta na marâ. O Atonia ki gunahia bâraha vi maneraha. Ngaia ki toregi tanga marena na kati ni me, na hosi ma na tangahuru gi rima na mane ni anumasiha. 7Ngaia ki mererâtamasi o Joaba o karena ka Seruia mo Abiatare na mane ni vogasiha. Ngairerua karu aganaria na takoha iana. 8Ma ngaira o Satoke na mane ni vogasiha mo Benaia karena o Joiata mo Natane na poropete, mo Simi, mo Rei ma na mane ni anumasiha iana o Tavite ngaira ka pe pane henia o Atonia.
9Hemuri o Atonia ki vogasi renira na sipi, na goti, na puruka mane ma na kareta na puruka ga binibinikaga i Hênima hagarangia na ve banga i Rogele. Ngaia ki guhira me o karena getera na maneraha. 10Ngaia ki pe guhira o Salomo o vesina, se vi o Natane na poropete, se vi o Benaia, se vi na me ni anumasiha iana na maneraha.
O Salomo ki vora re na maneraha
11Hoi, o Natane ki râ i pasina ka Bateseba kenana o Salomo, ma ki hagatea, ki vi: “I hega, igo ko pe rongoa, vi o Atonia karena ka Gagita ki pusia marena vi maneraha? Ma na maneraha o Tavite ki pe hagarea rârâ, kego! 12Manga igamurua igo ma o karemu o Salomo, ma kamuru obania vigamuru tahitahi, inê be vi tangago, 13ko arâ ototo râ nga i pasina na maneraha o Tavite, ma ko hagatea vikê: ‘Maneraha, i hega, igo ko pe bani tohe tangê, vi o Salomo o kareku ki page maneraha urusigo? Tanu hega o Atonia kani maneraha ngaia?’” 14Ma o Natane ki vi nikâ ki vi: “Hoi, matena go metamasi mênga na maneraha o Tavite, inê kê page bêbanu me ma kê tamanigo igê na tamasinga.” 15Hoita, ka Bateseba ki râ ki bâsia na maneraha igê na kiboru ni mêruha iana. Na maneraha ki merahaga ngavê ma ka Abisage na kere gete ni Suneme ki marupea. 16Ka Bateseba ki tubê so i maana na maneraha ma na maneraha ki hagatea, ki vi: “Na ta ko obania?”
17Ka Bateseba ki arami, ki vi: “Maneraha, igo ko bani tohe renia na atana na Araha God iamu, vi o kareku o Salomo ki maneraha urusigo. 18Ma o Atonia ki bani vora re na maneraha ma igo ko pe hagarea rârâ. 19Ngaia ki bani vogasi renira rako na puruka mane, na sipi na goti ma na kareta na puruka binibinikaga. Ngaia ki guhira o karemu, ma o Abiatare na mane ni vogasiha mo Joaba i bêngenira na mane ni me iamu, ma ki mareha vige guhia o karemu o Salomo. 20Maneraha, na Isiraelita hato ka nasigo, vigo hagarongora, vi o ti kani page maneraha urusigo. 21Manga i mareha, matena go meme râ, o karemu o Salomo menê ka page merongasigamirua ngavê.”
22Matena i tamasi mênga ka Bateseba, o Natane ki ata me i ruma iana na maneraha. 23Ka hagarongoa na maneraha, vi na poropete ki ata me. O Natane ki banu ma ki tubê so tanga na maneraha. 24Ngaia ki hagatea na maneraha, ki vi: “Maneraha, i hega, igo ko bani visia vari, vi o Atonia ki maneraha urusigo? 25I ngekê nga ngaia ki bani râ ma ki vogasi renira rako na puruka mane, na sipi na goti ma na kareta na puruka binibinikaga. Ngaia ki guhira o karemu hato, mo Joaba na mane i bêngenira na mane ni me iamu, ma o Abiatare na mane ni vogasiha. Ma i ngekê nga ngaira ka magoto henia ma ka ngere, ka vi, ‘O Atonia na maneraha ke mêri arihu!’ 26Maneraha, ngaia ki pe guhigami, inê se vi o Satoke na mane ni vogasiha, se vi o Benaia se vi o Salomo. 27Maneraha, i hega, igo ko aganaria vari na tarana ngekana? Maneraha, i tanu hega ko pe hagarongora na mane ni hagaotonga iamu renia vi o ti kani maneraha urusigo?”
28Na maneraha o Tavite ki arami, ki vi: “Vi tanga ka Bateseba ke aporo banu me.” Ma ngaia ki banu me ma ki ura so i maana. 29Na maneraha ki vi tanga, ki vi: “Inê kê tohe renia na Araha mamauri i bani hagatahiê tenigi na ara ni mamasiaganiha iaku, 30vi i ngekê inê be hagamonaria na tohenga iaku tangago, na tohenga renia na atana na Araha God iata na Isiraelita, vi o karemu o Salomo ki page maneraha urusiê.”
31Ka Bateseba ki tubê so ma ki vi: “Araha, maneraha iaku, gu mêri arihu!”
32Na maneraha o Tavite ki vi: “Unira me o Satoke, o Natane mo Benaia.” Matena ga banu me, 33o Tavite ki vi tangara, ki vi: “Mu merarâ na mane ni hagaotonga iaku. Mu hagatagiria o kareku o Salomo igê na tonki iaku mareku ma kamu anumasia matena mu merâ tanga i Vebanga Gigone. 34I ngekana igamurua o Satoke mo Natane, kamuru monea o Salomo ki maneraha i Isiraele. Hemuri kamu uhia na ahuri ma kamu ngerengere, kamu vivi, ‘Na maneraha o Salomo ke mêri arihu!’ 35Ma kamu meaporo me ikê, hanana i gâga igê na atohaku, suria i maneraha urusiê. Ngaia ki page maneraha urusiê, suria ngaia ka na ani gê bani atea, hanana vi marungirerua i Isiraele me Juta.”
36O Benaia ki arami, ki vi: “Hoita, maneraha, ngaia ngekana! Na Araha God iamu ke hagamonaria na tamasinga iamu! 37Maneraha, na Araha ke ngahisia o Salomo manga i bani ngahisigo igo, ma ke katoa na arahanga iana ke tavoraha bâkoro teharia na animu igo.”
38Hoita o Satoke ma o Benaia mo Natane ma na me ni anumasiha iana na maneraha ka hagatagiria o Salomo igê na tonki iana na maneraha o Tavite ma ka anumasia matena ga merâ tanga i Vebanga Gigone. 39O Satoke ki merâ na pi na oile, i bani torea tenia na ruma apuna na gahu iana na Araha, ma ki monea o Salomo ki maneraha. Ngaira ka uhia na ahuri, ma na enoni hato ka ngere, ka vi: “Maneraha o Salomo ke mêri arihu!” 40Hemuri matena i aporo me, ngaira hato ka mumuri, ka ngerengere vagevage, ka uhigi na êhihi ma ka barongo raha ngavê ki angingi na ano.
41Matena o Atonia ma na me hato iana i guhira ka hatongia na magotoha, ngaira ka rongoa na barongoha. Ma na matena o Joaba ki rongoa na ahuri, ngaia ki hagate, ki vi: “E, ga baronga i hinua tanga na ta?” 42Matena i tamasi mênga, o Jonatane karena o Abiatare na mane ni vogasiha, ki ata. O Atonia ki vi tanga, ki vi: “Banu me! Igo na mane koro. Na rongoha koro kanigo merâ me.”
43O Jonatane ki arami, ki vi: “Hetaki, i mareha! Na maneraha o Tavite ki bani kasia o Salomo ki maneraha. 44Ngaia ki bonasira o Satoke, mo Natane mo Benaia ma na mane ni anumasiha iana ka anumasia i tara. Ngaira ka hagatagiria igê na tonki iana na maneraha. 45O Satoke mo Natane karu monea i Vebanga Gigone ki maneraha. Hemuri ngaira ka meaporo i hinua ma ka ngerengere vagevage. Tahema na enoni ka barongo. Na barongoha ngekana kanigo rongoa. 46O Salomo nga kani maneraha. 47Ma ta na marâ nikâ: Na mane ni hagaotonga ka râ, hanana viga hagahigasia na maneraha o Tavite ma ka vi tanga, ka vi, ‘God iamu ke katoa na atana o Salomo ke rongo raha teharigo igo, ma na arahanga iana o Salomo ke tavoraha bâkoro ngavê teharia na animu igo.’ Hemuri na maneraha o Tavite ki susure igê na bea iana ma ki rahesia God. 48Ngaia ki nunginungi, ki vi: “Ge hagarahasia na Araha God iata na Isiraelita, suria i ngekê ngaia i kasia na hitangita na raraha iaku ki maneraha urusiê ma ki nakê kê bâsia!”
49Hoi, na enoni i guhira me o Atonia ka magu. Ngaira hato ka aharaga vê ka râ hegitigi. 50O Atonia ki magutenia ngavê o Salomo. Ngaia ki râ tanga na ruma na gahu iana na Araha ma ki hererâ igê na sukuni na bea ni vogasiha. 51Na maneraha o Salomo ki rongo, vi o Atonia ki magutenia ma ki ama ni hererâ nga igê na sukuni na bea ni vogasiha, suria i vi: “Inê kê obania vi na maneraha o Salomo i tohetohe tangê hagenago, vi ngaia ki asa vige nahuiê kê meme.”
52O Salomo ki arami, ki vi: “Manga vi ngaia ma ki tototo suriê maninga, inê ki asa hagetage be erasia, naka ma vi na kere varehuna gi tage i bêna. Manga i mareha, hoi, ngaia ki page meme.” 53Na maneraha o Salomo ki vi, ka torea me tenia na bea ni vogasiha. O Atonia ki râ i pasina na maneraha ma ki tube so tanga ma na maneraha ki vi tanga, ki vi: “I koro ma. Gu aporo i pasimu.”
Currently Selected:
1 MAHERAHA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific