Salmos 73
73
Icavintsantasanoti Tasorentsi
1¡Icameetsatimotaqueri Tasorentsi ishanincajeitaniri Israel,
maaroni yora cameetsashirejeitatsiri!
2Ariome nompiatsataquea, aitaque nantaquerome caari cameetsatatsi,
onquempetimotaquename naashirincanaque ari nompariaqueme.
3Tempa nonquisanentimentaqueri shemejeitatsiri aisati caari cameetsajeitatsi,
Noneaqueri oshequi iquimoshireventiro timimotiriri.
4Te inquenqueshiretacoteaji incame;
itecatsitasanojeiti, te irimantsiajeiteji.
5Te irashinoncayea iquempeta yashinoncayeta atiri,
tecatsi pomerentsitimotearine iquempeta itsipapee opomerentsitimotari.
6Ora ishemero oquempetaca inenquetacaro,
aisati yoashinoncanti, oquempetaca iquitsaatacaro.
7Yashitaarantasanotanaca, oquempetaca ivatsatasanotanaca catsini,
oshequi catsini caari cameetsatatsi icoashiyetari iranteri.
8Ishirontimentanti, ishemeti aisati yoashiventanti,
isareanta iroashinoncante, irantashiyetearo caari cameetsatatsi.
9Icantimatiri Tasorentsi Jenoquiniri,
aisati iquenayeti itseeyayeta.
10Irotaque ineacameetsatantariri itsipapee,
tee iriotacotiteriji yantayetaqueri.
11Icantajeiti: “¿Ariompa iriotaquero Tasorentsi?
¿Ariompa inquenqueshiretajero yora Inquitequiniri?”
12¡Pameneri yonta caari cameetsajeitatsi!
Tecatsi ashereajeiterine aiquero yashitaarantasanotanacari catsini.
13¡Natsipetashitacaro narori nocameetsashiretaque,
nojocaquero caari cameetsatatsi nantayetiri!
14Tempa oshequi nashinoncaaca maaroni quitaiteripeequi.
15Ariome nonquenqueshiretaqueame nonquempejeitearime iriori,
naacantajeitaquerime pishanincajeitajari.
16Noquenqueshireacotaquero niotacotantearori,
iro cantaincha oshequi opomerentsitimotaquena.
17Aintiquea nojatantajari Inantariqui Tasorentsi,
aitaque niotacotaquerori jaoca irijajeiteri caari cameetsajeitatsi.
18Oquempeta poatiaqueri ocarentsaiteti
aisati pitatsincaqueri irashinoncanteari.
19Intsipaite intsoncasanojeitajea, intsaroajeitanaque.
20Notasorentsite, ariorica pimapocajeitaqueri,
Inquempeteari tinaashitachari imishiroqui;
eiro pineacameetsatirotsi jaocarica icantayetari.
21Oshequi notsimaashiretasanotaca catsini,
aisati ocantimonentasanotaquena;
22tempa te nioteji, noquempetacari caari iotatsi.
¡Noquempetimotaquempi virantsi!
23Iro cantaincha nocantani quiso noaquempi,
oquempetaca pajiricasanotaquena.
24Piotacaasanotanaro picoacaaquenari,
ariorica ovecaratapaaquea, ari paacameetsatavajena ocameetsaitetinta.
25¿Jaanicampa noneapaajeri inquitequi?
¡Apaniro avirotaque!
Ariorica nosaviquimotapaajempi,
eiro noquenqueshireajirotsi oca quipatsi.
26Maaroni novatsa ompeanajea,
iro cantaincha noncanteani noncarateri Tasorentsi anta inampiqui,
iriotaque shintsitacaanari.
27Yora jocanajempineri, incamajeite;
pintsoncajeiteri caari quemisantimpi.
28Iro cantaincha nainti quiso noyeri Tasorentsi,
ocameetsatimotaquena catsini.
Avirotaque Novincatsarite, naventari,
ocameetsati noncamantacotero maaroni pimayetaqueri.
Currently Selected:
Salmos 73: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
