Salmos 55
55
Yamani yoijanayeetiri
(Ivampoyeane David)
1Notasorentsite, pinquemero noquenquetsatacaimpiri;
eiro piquemashitarotsi nocantimpiri.
2Pinquemasanotena naventimpi;
pamitacotena, oshequi opomerentsitimotaquena.
3Oshequi notsaroacaacaro irineane quisajeitanari;
aisati icajemacotapinitana caari cameetsajeitatsi.
Yoatsinantaquenaro oashinoncantsi;
ipocashitaquena itsimaasanotaca.
4Oshequi oshevataca nasancane,
notsaroasanotanaque catsini noncame;
5¡Omapocaquena notsaroasanotaque catsini,
nopioncasanotanaca!
6Ari nocanti: “Cantenane novanquitanaquea,
nonquempetanaqueari tsimeeri naranaqueme,
irosati nomaoreantapempa.
7Naranaqueme nojatasanote areejiqui,
nosavicantapempari cameetsa caaraiteriqui.
8Noshiasanotanaqueme, naventantapemparori
ojeonqui tampea shintsijencatatsiri.”
9Notasorentsite, pintsoncasanoteri,
pincomitacayeari irineane;
tempa irointi noneaque oantantsi aisati antavacantsi.
10Icantani quitaiteriqui aisati tsiteniriqui ishoncapinijeitaro nampitsi.
Otimasanotaque caari cameetsatatsi aisati amatavitantsi,
oshequi icaariperojeitaca.
11Oshequi otimasanotaque isavicapinijeitinta atiripee
antavacantsi aisati amatavitantsi.
12Te irio cantimatenane quisanari, ari namavetaquerome;
aisati te irio coatsine iroyena yora quisaquenari,
ari nomanapitsataquearime.
13Irompa avirotaque jivatanari aisati notsipavintsataniri.
14¡Avirotaque nocaratapinitiniri napatojeita anta Ivancoqui Tasorentsi;
aquenquetsatacaavacaa cameetsa, aacameetsatavacaani,
aniijeitini acarajeitiri apatojeitainchari!
15¡Cantenane omapoqueri caamanentsi quisajeitanari!
¡Intijajeiteata omoroqui aneatsiquera;
tempa yashi yoiro iquenqueshirotiro caari cameetsatatsi!
16Iro cantaincha naventeari nainti Tasorentsi,
aitaque iroavisaacotaquena.
17Meeca noncavintsayea aisati nirayea
onquitaitetamane, ishaaviniji aisati tsiteniriqui.
Aitaque inquemaquero noneane.
18Iroshequiasanojeivetea quisajeitanari iromanajeitantenari,
aitaque irojocaacoventaquena eiro nocamantatsi.
19Aitaque inquemaquena Tasorentsi;
tempa iriotaque pincatsaritatsiri icantaitatiani.
Iriotaque oashinoncayerineri quisaquenari.
Tempa te irojocajero yantaqueri aisati te impincatsateriji Tasorentsi.
20Icantanatiri tsipatapinivetariri,
te irimoncaratero icantasanovetariri iraacameetsatanteariri.
21Cameetsajenca ineanaveta,
iro cantaincha iquenqueshiretiro inquisheri itsipapee.
Yanaacotaqueri quejitsi icarenijati.
Iro cantaincha tee inquempeari,
irointi iquempetaro sataamentotsi ameecachari.
22Pincanteri Tasorentsi paitarica pomerentsitimotimpiri, irishintsishiretacayempi;
eiro ishinetiritsi quemisantiriri irashinoncayea.
23Notasorentsite, eiro osamanititsi intime oantajeitatsiri aisati tseeyajeitachari;
incamitajea, eiro ineirotsi irantiashipate.
Naintiquea noshiretasanotimpi.
Currently Selected:
Salmos 55: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
