Salmos 31
31
Ishiretasanotacari catsini Tasorentsi
(Sal. 71.1-3)
1Tasorentsi, aviro naventari, pojocaacoventena.
¡Eiro catsini pishinetanatsi nompashiventea!
¡Poavisaacotena; tempa pitampaticasanoti!
2Pinquemena noncantasanotempi.
¡Pishintsite pojocaacoventena!
¡Avirotaque quempetarori imperita jocaacoventantatsiri,
aisati pancotsi quisotatsiri notsititari navisacotantari!
3Avirotaque quempetarori imperita
aisati pancotsi quisotatsiri.
¡Pijivatena, pojocaacoventena, iriotanteetempiri Pitasorentsitasanoti!
4¡Pamitacotajena, yoashinoncaavetaquena quisajeitanari!
Tempa avirotaque jocaacoventanari.
5Avirotaque naventari, pinquempoyero noshire.
¡Poavisaacotena!
Tempa avirotaque Notasorentsite queariotasanotatsiri.
6Te noneacameetsateriji pincatsajeitirori ijitasorentsiyetiri,
caari mayetiro paitapeerica.
Noshiretasanotacari Tasorentsi.
7Pinintaquena, irotaque noquimoshiretantari.
Pineaquena noashiretaca
aisati piotaquero pomerentsitimotaquenari.
8Te pishinecoventenaji iroyena quisajeitaquenari.
¡Piquempoyeacoventasanotaquena!
9Tasorentsi, pineshinoncatena,
opomerentsitimotaquena covencatatsiri.
Ocatsitimotaquena novatsapeequi;
te namavetajeroji, aisati te namenasanotaje.
10¡Nocatsiyetaque aisati nocavintsaapinitaca,
irotimataintsi noncame!
¡Noashiretasanotaca, te noshintsivatsayetanaje!
11Narotaque ishirontimentari quisajeitanari
aisati yantavintsataquena nocarajeivetari.
Ipiincaquena iojeitanari
aisati ishiapitsajeitana ariorica ineana.
12Ipeacotasanoyeetaquena, oquempetaca nocamaquerica.
Noquempevetacaro choncorina tsirajatsiri.
13Oshequi noquemiri atiri icamantatsatavacaayeta.
“Oshequi ocovencaiteyetaque jaocapeerica.”
¡Iquenquetsatacaavacaajeitaca icoaque iroyena!
14Iro cantaincha, aviro Notasorentsite, noshiretari;
tempa nocantimpi: “Avirotaque Notasorentsite.”
15Avirotaque quempoyeacoventanari.
¡Pojocaacoventena, yoijanajeitaquena quisajeitanari!
16Pineshinoncatena, tempa naro quemisantimpiri.
Poavisaacotena, tempa pinintasanotana.
17Avirotaque naventari.
¡Eiro pishinetanatsi nompashiventea!
¡Irintiquea povashiventaasanote caari cameetsajeitatsi;
aisati poamaajeiteri, intijeata!
18Poimajerenteri tseeyajeitachari,
maaroni shirontimentantachari
aisati cantimatiriri cameetsajeitatsiri.
19¡Oshequi picavintsaasanotiri pincatsatimpiri!
Piquempoyeasanotiri, piquempetacantiro pinatasanotachari.
Ineajeitaquero atiripee pitasoncacoventiri shirejeitimpiri.
20Quiso poaqueri, pojocaacoventiri
iquenqueshiretacovetariri caari cameetsajeitatsi;
icaratimpirica, piticaacoventiri eiro imatantaritsi icantimateri quisajeitiriri.
21Icameetsatasanotaque Tasorentsi, inintasanotaquena;
oshequi imatasanotaquero yamitacotaquena pomerentsitimotaquenari.
22Noquenqueshireashivetaca pojocaquena,
iro cantaincha naventantaquempiri,
piquemaquena nocajemaquempi, pamitacotaquena.
23Maaroni quemisantasanotiriri Tasorentsi, pinintasanoteri.
Iquempoyeacoventiri neanatatsiri tampatica.
Irintiquea shemejeitatsiri, iroashinoncaimentasanoteri yantayetiri.
24Maaroni shirejeitariri Tasorentsi,
piveshireajeitea aisati pishintsishiretanaque.
Currently Selected:
Salmos 31: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
