Salmos 25
25
Iquenquetsatacairi Tasorentsi iriotacaasanotanteariri
(Ivampoyeane David)
1Notasorentsite, aviro noquenquetsatacairi;
2avirotaque noshiretari.
Eiro pishinetanatsi nompashiventea.
¡Eiro ishirontimentantanatsi quisajeitanari!
3¡Eiro catsini pishinetiritsi impashiventea shirejeitimpiri!
¡Irintiquea pashiventachane yora piatsatashijeitimpiri!
4Notasorentsite, piotacaasanotenaro
jaoca noncanteari nantantempirori picoacaanari
aisati poametena nosavique cameetsa;
5ponijayenaro queariotasanotatsiri;
tempa avirotaque Notasorentsite oavisaacotantatsiri.
¡Maaroni quitaiteripeequi aviro noshiretari!
6Notasorentsite, pinquenqueshiretero pinintasanotaquena,
aisati picavintsaaquena, ora ponijaapinitaquenari.
7Iro cantaincha, eiro pinquenqueshireacotanarotsi
caari cameetsatatsi nantaqueri,
aisati te nonquemisantempiji nevancaritantapaacari.
Irointiquea, pinquenqueshiretena;
tempa pinintasanotana aisati picameetsataque.
8Icameetsatasanoti Tasorentsi, itampaticati.
Yoasanquetairi antirori caari cameetsatatsi
yoametantariri irisavicaje cameetsa.
9Aisati iotacairi caari shemetatsi icoacaaqueriri.
¡Yoametasanotiri irantero cameetsatatsiri!
10Icantani inintasanotiri aisati icarajeitiri
maaroni moncaratirori icantacantiri.
11Notasorentsite, oshequi catsini
nantaquero caari cameetsatatsi,
pimpeacotajenaro;
irotaque nopincatsatantimpiri.
12Yora pincatsatiriri Tasorentsi,
iroametasanoteri irantantearori cameetsatatsiri,
13irisavicacayeri cameetsa,
aisati impajeiteri irishanincajeitajeari
iipatsite irashijeiteari.
14Ishanincatacari Tasorentsi pincatsatiriri
aisati iotacaasanotiri icoacaaqueriri.
15Noncanteani naventeari Tasorentsi iramitacotena,
tempa iriotaque nijantareacoventanari
maaroni covencatatsiri.
16Pinquenqueshiretena Notasorentsite, pincavintsayena,
tempa apaniro noni, oshequi yoashinonqueetaquena.
17Aiquero ojatatii ocantimonentasanotana;
pojocaacoventenaro pomerentsitimotaquenari.
18Pinquenqueshireacotena,
oshequi noashiretaca opomerentsitimotaquena,
aisati pimpeacotenaro nantane.
19Pameneri oshequi quisaquenari, icoaque iroyena.
20¡Pishentena, poavisaacotena, eiro yoantanatsi!
¡Eiro pishinetiritsi irovashiventena;
tempa aviro naventari!
21Pojocaacoventena; tempa notimi cameetsa;
tecatsi nante, irointi noshiretasanotimpi.
22¡Notasorentsite, poavisaacoteri ishanincapeeni Israel;
tempa oshequi yashinoncaajeitaca!
Currently Selected:
Salmos 25: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
