Salmos 22
22
Ipampoyeacoventiro iquemaatsicatantacarori
(Ivampoyeane David)
1¡Notasorentsite! ¿Paita pojocantaquenari?
¿Paita caari pipocanta poavisaacotena?
¿Paita caari pamenantana nocavintsantacari?
2Notasorentsite, nocantani quitaiteriqui
aisati tsiteniriqui naventavetaquempi;
iro cantaincha te pancacotenaji.
¡Te catsini nomacoreeji!
3Avirotaque cameetsatasanotatsiri, pipincatsariventanti;
ineacameetsajeitimpi ishanincajeitaniri Israel.
4Yora intacantaquenaniri ishiretasanotimpi,
pojocaacoventaqueri;
5yaventajeitaquempi pamitacotaqueri;
poipacaacoventaqueri, te pamataviteriji.
6Irompa nainti te naro atiri,
noquempetacari quenitsi.
¡Ishirontimentana atiripee!
7Yora neayetaquenari yoaaconatana,
ineanatseratimotana aisati itecainajeita iitoqui.
8Icanti: “Tempa ishiretari Tasorentsi,
iriotaque oipacaacoventerine;
tempa inintasanotiri, iroavisaacoterita.”
9Aitaque ocantari, avirotaque vetsicaquenari otsomontequi ina,
aisati pimacoreacaaquena atsotaantaquenari.
10Tequerani nontime, piquempoyeaventaquena;
Ainiroquerani otsomontetana ina, avirotaque Notasorentsite.
11Eiro pinijantareanatsi meeca,
tempa opomerentsitimotasanotaquena;
tecatsi amitacotenane.
12Yora quisanari ishoncajeitaquena,
iquempetacari vacapee quishincari
timatsiri nampitsiqui Basán;
13aisati iquempetacari anteariite maniti,
amoroatsiri iquirancasanotaque,
irimitajashitantenari irantsiquena.
14Noquempetacaro nija isacojayeetiri;
ora notonquipee jeocayetanaque,
aisati noshire ovejaasanotanaca
oquempetanacaro icanteetiri cera.
15Ora novante opirijatasanotanaque
aisati nonene opatacanaca novantequi jenioquiji.
¡Pojocasanotaquena quipatsiqui tsompoina,
oquempevetaca nocamasanotaque!
16Oshequi caari cameetsajeitatsi ishoncaquena,
iquempevetacari otsitiniropee;
iquishaayetapaaquena nacopeequi aisati noitipeequi.
17¡Oconijayetanaque jaoca ocarayeti notonqui!
Yora quisajeitaquenari icantani yamenashetana.
18Ipavacaajeitacaro noitsaare
aisati ineatsatimentacaro ipishonquimentiro mapijaniqui.
19Notasorentsite, avirotaque shintsitacaanari.
¡Eiro pinijantareanatsi!
¡Intsipaite pamitacotena!
20Poipacaacoventena, eiro yoanteetaanatsi,
eiro pishinetiritsi iroyena quempevetariri otsitipee.
21Poavisaacotena, eiro yatsicantanatsi
shiavetariri anteariite maniti.
¡Pimpiacoventena, eiro isatantanatsi
shiavetariri quishincari vacapee!
22Ariorica noncarateri noshanincapee, nonquenquetsatacotempi,
aisati nampatojeitearica, noncante: Picameetsati.
23Avirojei pincatsatiriri Tasorentsi, ¡pimpampoyeaventasanoteri!
¡Avirojeitaque ishanincajeitaniri Jacobo,
pincantajeite: “Icameetsatasanoti Tasorentsi!”
¡Avirojei ishanicajeitaniri Israel,
pimpicatsatasanojeiteri!
24Tempa te impeacoteariji yashinoncaarica coiteaveetatsiri,
te irineashiteariji, aisati te irimanapitsateari.
¡Iquemiri ariorica yaventajeitari!
25Noncarateri maaroni pishanincajeitajari noncantacotempi,
ocameetsati pimayetaqueri;
irineena pincatsajeitimpiri
nomoncaratasanotempiro nocantimpiri.
26Avirojei yoashinonqueetiri,
poajeitea irosati pinquemasanojeitantanaquea.
Aviro coajeitiriri Tasorentsi,
pincantacotapiniteri: Icameetsati,
iroaneasanojeitantempiri osamani.
27Maaroni pashinisatipee atiri
savicayetatsiri nampitsipeequi aisati maaroni quipatsipeequi,
pinquenqueshirejeiteri Tasorentsi.
¡Pimpocashijeiteri pintiyeroimentajeiteari, pimpincatsateri!
28Tempa iriotaque Tasorentsi Pincatsarisanori,
ipincatsariventiri maaroni atiripee.
29Maaroni otimimojeitiri paitapeerica,
poivotashijeiteari, pimpincatsateri apaniro,
aisati maaroni camajantsineri;
tempa tecatsi aneashitachane.
30Yora noshanincajeitajeari impincatsajeiteri Tasorentsi,
aisati inquenquetsatacotapiniteri;
31aisati incamantajeiteri timajeitajantsineri coajica,
cameetsa icavintsaanti, aisati ocameetsajeitaque yantayetaqueri.
Currently Selected:
Salmos 22: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
