Salmos 147
147
Ocameetsatasanoti ampampoyeaventasanoteri Tasorentsi
1¡Icameetsataque Tasorentsi!
¡Ocameetsati ampampoyeeneri pampoyeantsipee Atasorentsite!
Iriotaque ampampoyeacotasanoteri cameetsajenca.
2Yora Tasorentsi irovetsicacantajero nampitsi Jerusalén,
aisati irampatojeitajeri ishanincajeitaniri Israel
jayevetainchari jaocapeerica.
3Ishintsishiretacaajiri oashirejeivetainchari,
aisati iveshireacaajari yoashinonqueevetacari.
4Iotiri impoquiropee jaoca icarajeitiri,
aisati ipajiyetaqueri aparopeeni.
5Itasorentsitasanotaque Atasorentsite,
imatasanoyetiro paitapeerica itasorencaqui;
ora iotantari otsoteiro maaroni.
6Yora Tasorentsi ishintsishiretacairi caari shemejeitatsi;
irintiquea caari cameetsajeitatsi, yoashinoncaasanojeitiri.
7Pimpampoyeacoventeri Tasorentsi, pimpasonquiteri,
aisati pimpampoyeeneri pampoyeantsipee Atasorentsite arpaqui.
8Iriotaque mencorisheacairori jenoqui
oariapinitirori incani quipatsiqui,
ishiocacayetiro paashitopee toncaaripeequi.
9Ipajeitiri poshiniripee yoapinijeitari
aisati irijanipee tsimeeripee ariorica yaventajeita.
10Te irineacameetsateriji Tasorentsi cavaayo shintsitatsiri,
aisati iriori atiripee shintsivetachari,
11irintiquea ineacameetsatasanoti pincatsajeitiriri;
yora shirejeitarori queario inintasanotanti.
12Aviro savicajeitatsiri nampitsiqui Jerusalén aisati Sión,
pincantacoteri Pitasorentsite: Icameetsati.
13Tempa iriotaque ticaacoventajeitaquempiri
aisati itasoncaventajeitaqueri pitomipee pinampiqui.
14Iriotaque savicacaajeitimpiri cameetsa piipatsitequi,
aisati itimacaasanotimpiro tirico cameetsatasanotatsiri, poajeitari.
15Ineanataque Tasorentsi, otsoteanaquero maaroni quipatsiqui.
16Iriotaque tianquirori pariajencatatsiri catsincari, oquempetacaro iviti ovisha,
aisati itimacairo sharaca, oquempetacaro quipatsivane.
17Yovariiro iriniqui, oquempetacaro mapiquijaniqui,
ora catsincaiteri oquisotacairo nija.
18Ariorica ineanataji ovejaanaja catsincaiteri,
aisati ijeoncacairo tampea, oshiaajatantanajari iroori nija.
19Iotacaaqueri ishanincajeitaniri Israel
irineane aisati icantacantiri.
20Te inquempeteariji pashinisatipee atiri,
te iriotacaajeiteriji icantacantayetiri.
¡Icameetsataque Tasorentsi!
Currently Selected:
Salmos 147: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
