Salmos 132
132
Icashiacaasanotaqueriri Tasorentsi David
(2 Crón. 6.41-42)
1Tasorentsi, pinquenqueshireteri David,
aisati maaroni pomerentsitimoyetacariri;
2aisati pinquenqueshiretero icantasanotaquempiri,
avirotaque Tasorentsi mayetirori maaroni,
yora iquemisantiri Jacoboni.
3“Eiro noqueirotsi novancoqui,
aisati eiro nonareatsi nomacoreanteari,
4eiro nomatsioquitsi nomanteari capichaji,
5eirorica noneitatsi Pancotsi irinanteariri Tasorentsi,
mayetirori maaroni, iquemisantiriri Jacoboni.”
6Anta nampitsiqui Efrata aitaque noquemacotajirori Cajón
otimantari Icantacantiri Tasorentsi,
aitaque noneajirori iroanequi Jaar.
7Ari nocantajeiti: “¡Tsame ajajeite Inantariqui Tasorentsi!
¡Antiyeroashijeitapempari!”
8Novincatsarite, pimpoque aca toncaariqui
pincaratapaajero Cajón otimantari pitasorenca, pinantapaajearo.
9¡Nocoacaaqueri antaveeyetatsiri Pivancoqui,
irantajeitero cameetsayetatsiri,
aisati yora quemisantimpiri
incajemajeite inquimoshirete!
10Tempa pinintasanotaqueri David, yora quemisantimpiri,
eiro pipeacotaritsi yora pincatsari picoyeaqueri.
11Yora Tasorentsi icantasanotaquerini David;
eiro opeatsi catsini:
12“Yora pishanincajeitajeari coajicani
irio poyetajempineri impincatsaritaje.
Ariorica irimoncaratero nocantasanotaqueriri,
jero nocantacantayetiri noamejeiteriri,
aisati inquempetajea itomipee iriori,
impincatsaritaje pivincatsarimentoqui, incataitatiyempani.”
13¡Yora Tasorentsi, icoyeaquero toncaari Sión intimanteari!
14Tempa icanti: “Irotaque oca toncaari
nocoasanotiri nontimantearo, noncanteani.
15Nontasoncacoventero oca nampitsi
ontimasanote oanarontsi iroajeiteari coiteaveetatsiri.
16Nomatacaasanojeiteri antaveeyetatsiri Novancoqui,
noncantacaajeiteari incajemajeite inquimoshirete yora quemisantajeiterone.
17Aitaque nomatacaasanoteriri irishanincatajeari David, impincatsaritasanote;
nomataquero novetsicaqueneri quempetarori tsiomentotsi
irashi pincatsari nocoyeaqueri.
18Yora quisajeiterineri, noncantacaajeiteari impashiventajeitea,
irintiquea iriori nontasoncacoventeri impincatsariventante cameetsa.”
Currently Selected:
Salmos 132: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
